披露港鐵 5G 覆蓋! 邊個台最勁,邊個站四個台都有份?

Keith Yim 2021-01-05 17:41 | 網絡消息
若果要慳時間,你點都要坐吓港鐵。但無論你坐定係企,坐港鐵嗰陣百無聊賴想用手機上吓網,都可能遇著網絡擠塞,「Load 空氣」、「上網塞住晒」嘅感覺都出晒嚟。到咗 5G 世界,港鐵上網係咪好啲?理論上應該網速快啲、時延短啲。5G 至今推出咗超過半年,到底喺港鐵四間網絡商覆蓋成點?csl 跟數碼通都有公佈過佢哋 5G 覆蓋到邊嗰站,咁其他兩間呢?版主最近從業界得到最新港鐵 5G 覆蓋圖,透過呢張圖同呢份資料,加埋網絡商嘅官方公佈,大家可以知道邊個台喺港鐵站內有最多覆蓋、邊個站有齊四個台嘅 5G 覆蓋。

FB01.jpg

港鐵部份,暫用 N1 頻段覆蓋

其實,喺 ePrice.HK 免費版,或者喺專講 5G 技術嘅 ePrice PatreoN 收費平台,版主都講過港鐵 5G 採用嘅技術。香港嘅 5G 覆蓋係有兩層嘅。大家講得最多嘅 5G 黃金頻譜,即係 N78 (3.5GHz) 及 N79 (4.9GHz) 頻段,無錯可以提供好快嘅網速,但建設成本高,最重要係要花好多時間,所以網絡商 (香港現時有三間) 選擇加多一層用本來用係 4G 嘅 b1 (2100Mhz) 重耕至 5G 嘅 N1 (2100Mhz) 做另一層覆蓋,令網絡商可以短時間內提供全面覆蓋嘅 5G 服務,N1 網起先,再喺人流密集且繁忙地點,加建 N78 / N79 提供充足容量。

重耕 b1 至 N1 喺港鐵部份,可以講係無選擇下嘅選擇。相信好多有跟開網絡商消息嘅網友都知道,係港鐵起基站,唔係可以短時間內大量做到。港鐵每日關站後,只有幾個鐘進行各類唔同工程,包括加建基站及測試,所以用 N1 方案,係最快做到 5G 覆蓋嘅方法。事實上,SmarTone、csl 及 3HK 嘅港鐵覆蓋,都係用上 N1 方案。

Screenshot-2019-03-18-at-10.42.49-AM-696x420.png
▲ 早前數碼通曾表示,若果於港鐵採用 N78 頻段用作 5G 網絡,除了港鐵網絡基建要全面光纖化,再要作規劃先可以做到,相信要花一年至兩年時間。

djdgdpfojz.jpeg
▲ 中國移動香港,去到文章刊登嗰日,暫無 N1 5G 網,所以佢哋都有提供港鐵 5G 覆蓋,但只限部份架空或見到地面嘅站,透過其他戶外基站提供訊號。

四大網絡商港鐵覆蓋圖

翻查資料,一直以來,只有 SmarTone 與 csl 公佈過佢哋有幾多個港鐵站有 5G 覆蓋,例如早前 SmarTone 就講過有 55 個站已完成 5G 覆蓋。csl 最近無公佈,根據早前資料就係 50 個站左右。雖然我哋之前已發現咗 3HK 嘅港鐵訊號,但官方一直無公佈過。至於中國移動香港亦係一直都無提過任何港鐵覆蓋嘅官方資料。

不過,我哋最近從業界人士,得到一份截止 2020 年 12 月 31  日嘅港鐵 5G 覆蓋圖,數盡四間網絡商嘅 5G 覆蓋。我哋走訪過部份站頭,發覺都係可信嘅。相信呢一 Part 資料,對用家來講應該最有用。

station01.jpg
▲ 由上圖可見,有三間網絡商都用咗 N1 做 5G 覆蓋。中國移動香港因為無用呢招,暫時嚟講,只能有約 22 個站有 5G 訊號,留意嘅係,當中車站本身是架空或係戶外為主,即係靠戶外基站覆蓋。此外,原來 3 香港嘅港鐵覆蓋係最多,有 96 個站,可以話係全綫覆蓋。

3 香港 港鐵覆蓋

港島綫:堅尼地城、香港大學、西營盤、上環、中環、金鐘、灣仔、銅鑼灣、天后、北角、炮台山、鰂魚涌、太古、西灣河、筲箕灣、杏花邨、柴灣
港島南綫:金鐘、海洋公園、黃竹坑、利東、海怡半島
荃灣綫:中環、金鐘、尖沙咀、佐敦、油麻地、旺角、太子、深水埗、長沙灣、荔枝角、美孚、荔景、葵芳、葵興、大窩口、荃灣
觀塘綫:黃埔、何文田、油麻地、旺角、太子、石硤尾、九龍塘、樂富、黃大仙、鑽石山、彩虹、九龍灣、牛頭角、觀塘、藍田、油塘、調景嶺
將軍澳綫:北角、鰂魚涌、油塘、調景嶺、將軍澳、坑口、寶琳、康城
東涌綫:香港、九龍、奧運、南昌、荔景、青衣、欣澳、東涌
迪士尼綫:欣澳、迪士尼
東鐵:紅磡、旺角東、九龍塘、大圍、沙田、火炭、馬場、大學、大埔墟、太和、粉嶺、上水、羅湖、落馬洲
西鐵:紅磡、尖東、柯士甸、南昌、美孚、荃灣西、錦上路、元朗、朗屏、天水圍、兆康、屯門
屯馬綫一期:啟德、鑽石山、顯徑、大圍、車公廟、沙田圍、第一城、石門、大水坑、恆安、馬鞍山、烏溪沙
機場快綫:香港、九龍、青衣、機場、博覽館
高鐵:香港西九龍

csl 港鐵覆蓋

港島綫:中環、金鐘、灣仔、銅鑼灣、天后、北角、炮台山、鰂魚涌、太古、柴灣
港島南綫:金鐘、海洋公園、黃竹坑、利東、海怡半島
荃灣綫:中環、金鐘、尖沙咀、佐敦、油麻地、旺角、太子、深水埗、長沙灣、荔枝角、美孚、荔景、葵芳、葵興、荃灣
觀塘綫:黃埔、何文田、油麻地、旺角、太子、石硤尾、九龍塘、樂富、黃大仙、鑽石山、彩虹、九龍灣、牛頭角、觀塘、藍田、油塘、調景嶺
將軍澳綫:北角、鰂魚涌、油塘、調景嶺、寶琳
東涌綫:奧運、南昌、荔景、青衣、欣澳
迪士尼綫:欣澳、迪士尼
東鐵:紅磡、旺角東、九龍塘、大圍
西鐵:紅磡、南昌、美孚、元朗
屯馬綫一期:鑽石山、顯徑、大圍、車公廟
機場快綫:青衣、機場
高鐵:香港西九龍

SmarTone 港鐵覆蓋

港島綫:中環、金鐘、灣仔、銅鑼灣、天后、北角、炮台山、鰂魚涌、柴灣
港島南綫:金鐘、海洋公園、黃竹坑、利東
荃灣綫:中環、金鐘、尖沙咀、佐敦、油麻地、旺角、太子、深水埗、長沙灣、荔枝角、美孚、荔景、葵芳、葵興
觀塘綫:黃埔、何文田、油麻地、旺角、太子、石硤尾、九龍塘、黃大仙、鑽石山、九龍灣、牛頭角、觀塘、藍田、油塘、調景嶺
將軍澳綫:北角、鰂魚涌、油塘、調景嶺
東涌綫:南昌、荔景
迪士尼綫
東鐵:紅磡、旺角東、九龍塘、大圍、火炭、大學、大埔墟、太和、上水
西鐵:紅磡、南昌、美孚、錦上路、天水圍
屯馬綫一期:鑽石山、大圍、車公廟、沙田圍、第一城、石門、大水坑、恆安、馬鞍山、烏溪沙
機場快綫
高鐵:香港西九龍

CMHK 港鐵覆蓋

港島綫:柴灣
港島南綫:海洋公園、黃竹坑
荃灣綫:葵芳、葵興、荃灣
觀塘綫:黃大仙、九龍灣、牛頭角、觀塘
將軍澳綫:寶琳
東涌綫:奧運、青衣、欣澳
迪士尼綫:欣澳
東鐵:紅磡、旺角東、大圍
西鐵:元朗
屯馬綫一期:顯徑、大圍、車公廟
機場快綫:博覽館
高鐵:香港西九龍

有齊四個網絡商嘅 5G 覆蓋港鐵站包括:海洋公園、黃竹坑、柴灣、黃大仙、九龍灣、牛頭角、觀塘、葵芳、葵興、紅磡、旺角東、大圍、車公廟

* 全部資料截至 2020 年 12 月 31 日,非官方公佈。

a02.jpg
▲ 部份港鐵站暫時得一個網絡商有 5G 覆蓋,例如測試嘅大窩口站,我只揾到 3HK 嘅 5G 覆蓋,係 RX MoNitor 呢個 App 見到真係行緊 5G。


▲ 5G 上網比起 4G 上網感受係好好多,例如睇片嗰陣,要去片就差唔多做到即時效果。

點解港鐵開 5G 有快有慢

相信有跟開 ePrice 嘅報導都知,N78 與 N79 黃金頻段嘅 5G 覆蓋,可以有更大容量同埋提升上網速度至極速。但點解港鐵起得咁慢?

早前數碼通都表示過,若果於港鐵採用 N78 頻段用作 5G 網絡,除了港鐵網絡基建要全面光纖化,再要作規劃先可以做到,相信要花一年至兩年時間。版主有問過幾位業內人士,佢哋補充若要加設全新頻段 5G 網絡,需要各家電訊商自行協議興建,分擔數以億元計嘅開支,仲要每月繳交一筆使用費俾港鐵,但在建成後網絡設施全屬港鐵所有,對網絡商不公平。而港鐵範圍只容許喺深夜施工,加上部分舊管道已沒有空間建網,故在港鐵站內升級流動通訊網絡極有難度。

呢幾位業內人士仲話,由於港鐵係逐個車站及逐個頻段,向網絡商收取月費,故網絡商即使透過較簡單方式,即重耕 b1 變為 N1 提供5G 服務,係好自然嘅事。而因為每個站去收月費,部份網絡商傾向慢慢開站,所以就算都係用 N1 頻段做 5G 覆蓋,都有快慢之分。
 

最新新聞