說好的大禮呢？ Samsung 大派 Gear VR 眼鏡，香港無份！
是咁的，今次版主收到有關 Galaxy S7 以及 S7 edge 的消息，同價錢嚴格來講無乜關係。係香港方面一樣暫時只有 32GB 版本而兩者價錢分別係 $5198 以及 $5998 。不過，唔知大家仲記唔記得，早排 Samsung 就宣佈左，買 Galaxy S7 或者 S7 edge 都會送 Gear VR 眼鏡一副。要知道， Gear VR 定價都唔算好平，要 $888 。即使而家係大鋪或者電訊商都有減價，平兩百蚊大約賣 $699 左右，如果買機有得送都叫抵到爛啊！不過，當全球都有買機送 Gear VR 呢個優惠的時候，好遺憾地⋯⋯香港係無份的！其實， Samsung 無打算係香港推「買機送 Gear VR」活動，唔算係秘密。聰明的網友應該會發現，係香港 Samsung 官網上，首頁已經見到 Galaxy S7 edge 同 S7 ，再 click 入去睇，大家係唔會見到任何有關買機會送 Gear VR 的資料的。相反，已確認買機送 Gear VR 的國家好似美國、英國、澳洲，係官網都可以搵到有關資料。所以，大家可以做定心理準備，係香港買 Galaxy S7 同 S7 edge 係不會有 Gear VR 送的，想要的話一係另外買，一係等耐啲，睇下之後 Samsung 又會唔會送。
▲ 係 Galaxy S7 發佈會上，參與者人人戴住一副 Gear VR ，場面都幾壯觀。
唔送 Gear VR 因為孤寒？主因看來都係價錢問題
知道 Samsung 今次唔送 Gear VR 之後，應該有唔少朋友會問，當中原因係乜呢？經過一輪格價之後，版主認為都係同價錢有關！以下就以 Galaxy S7/ S7 edge 係英國以及澳洲兩個地方的價錢作比較。係英國方面， Samsung 官網除左提供預訂之外，更加有送貨服務同埋比開賣日早 3 日送到顧客手上！不過，係價錢方面， S7 就要 569 磅而 S7 edge 都要 639 磅，換算成港幣即係 $6174 以及 $6934 ，兩部機比香港價錢都係貴差不多一千蚊。係一樣會預售送 Gear VR 的澳洲， Galaxy S7 價錢就係 1148 而 S7 edge 就係 1249 ，換算成港幣即係 $6454 以及 $7021 ，價錢更加貴。
當然，英國、澳洲買機係要計埋稅，有時會比香港貴。但係呢兩個加送 Gear VR 的地方，預訂機價都比香港貴成千蚊，都反映到 Samsung 香港唔送 Gear VR 眼鏡呢個做法，背後其實都有一定理據。最後，聽日就係 Samsung 發佈會啦！如無意外版主聽日都可以即時玩到實機，唔知大家又對於 Samsung 兩部新機，有咩地方想再了解多啲呢？快啲留言講底，版主聽日現場即時試！
（ 帶返個頭盔先，好多人想知的 Droptest 版主應該係試不到的⋯⋯）
▲ 係其他國家的 Samsung 官網上，大家可以輕易找到買機送 Gear VR 的資料，上圖就係澳洲的。
▲ 而英國方面，兩部機價錢當然會比起香港貴，但係有提早到貨呢個賣點。
Samsung Galaxy S7 / S7 Edge 評測及報導
獨家！三星 Galaxy S7/S7 Edge 香港定價搶先爆，比上代平勁多？
版主實機對比話你知！Samsung S7/S7 Edge 外型進步有幾大
Samsung 都要跪低！再次支援 SD 卡兼加大電池，滿意嗎？
f1.7 大光圈＋單反級數對焦！三星 S7/S7 Edge 相機 5 大賣點整合
規格全面比拼 ！f1.7 大光圈 S7 Edge 大戰 LG G5，撐邊個？
G5、S7 Edge 鬥跑分！旗艦效能大戰， Samsung 還是 LG 蠃？
遊戲啟動器 + Always On 屏幕! 三星 Galaxy S7 上手評測 新功能
用戶福音！Samsung Galaxy S7、S7 Edge 大幅減少 Bloatware 數目
未開賣先拆解評測！Galaxy S7 水冷降溫裝置相機模組一次睇晒
評測 Samsung Galaxy S7 Edge 與 S6 相機夜拍成像比較！
插卡又如何？Galaxy S7、LG G5 不支援 Adoptable Storage
Samsung Galaxy S7 真機上手實測! Hands On 動手玩
在文章發佈時， Samsung Galaxy S7 Edge 將於 3 月 11 日開賣，定價為 $5998 ，按此看手機規格及最新賣價。
在文章發佈時， Samsung Galaxy S7 將於 3 月 11 日開賣，定價為 $5198 ，按此看手機規格及最新賣價。