「魔鬼細節」網友鬧爆!Samsung 額外一年保兩大問題要留意

Lawrence | Samsung
雖然正如版主爆料消息一樣,香港地區買 Galaxy S7 / S7 edge 唔會有 Gear VR 送。但 Samsung 係昨日的發佈會上,都算係帶來左一樣驚喜比「早買早享受」的消費者。就係 4 月 3 號前買機的話,會額外加送一年保養。不過,唔少心水清的網友發現原來 Samsung 保養優惠暗藏魔鬼細節,一齊來睇下 Samsung 額外一年保養兩個大問題!

//timgm.eprice.com.hk/hk/mobile/img/2016-03/04/204810/lawrencelaw_1_4523_8c7e935b3e8416857d421869999d4f4f.jpg
 

問題 1:手續繁瑣,錯過限期隨時有保變無保!

先唔講保養內容,諗住襯早買機多一年保養的網友要留意,Samsung 呢個優惠唔係自動幫你續保,官方都提到係有四重領取手續的!首先,大家都知買機要係 4 月 3 號或之前啦。係買機之後 14 日之內,用家必須登記成為 ClubS 會員 (焗你擺低個人資料,焗你做會員),而客戶係成功登記的 5-7 個工作天內會收到「延長保用計劃通知書」,收到先算係登記左「額外一年保用優惠」。但大家要記住,過左 12 個月保養期之後,係要帶埋「延長保用計劃通知書」先可以續享保養。即係話,呢張額外通知書唔好唔見。而且如果買機唔係從指定「特約零售商」入手,都有機會無保㗎!(附上:Samsung 特約零售商名單

//timgm.eprice.com.hk/hk/mobile/img/2016-03/04/204810/lawrencelaw_3_4523_35696710e10799d504975da1d5071bdc.jpg
▲ 係發佈會上, Samsung 公佈限時買機送多一年保養,有驚喜但原來要拎到都唔易⋯⋯
 

問題 2:保養範圍「縮水」,內容含糊?

呢個亦係今次 Samsung 額外保最大爭議的部份,就係 Samsung 額外一年保養範圍同原廠第一年保養範圍是不同的。當中最重要的一點就係額外保養並不包括「消耗性部件」,有關呢一點 Samsung 的解釋就係「‘消耗性部件’指會隨時間自然損耗的部件」,並以電池為例子。但問題係,好多網友都擔心的屏幕算唔算消耗性部件, Samsung 官方就未有提到。作為參考,近日有調查顯示,以智能手機來計,市佔率最高的 Samsung 手機故障率同時係最高的,比起 Apple 甚至係一眾大陸牌子好似小米同 Lenovo 都仲要高!而最常發生固障的部分係相機,僅次就係屏幕同電池。如果屏幕都被列為 ‘消耗性部件’ 的話,再加上 Samsung AMOLED 芒「輝煌成績」,多一年保真係唔知保到幾多呢⋯⋯icon

//timgm.eprice.com.hk/hk/mobile/img/2016-03/04/204810/lawrencelaw_5_4523_519bb623e1254ef6f4d0168c4ed05ce1.png
▲ 以上就係 Samsung 原廠保養以及額外保養的分別啦!

來源:moneydj
廣告