真機到手
上一部香港三星可以插卡換電的產品，係去年年底罕有地推出三防平板 Galaxy Tab Active 3，當時亦獲得本 YK 高度讚賞，詳情可以參考相關的評測內容。唔知係咪市場反應好，今次將一部入門 hardcore 新機光速引到香港，而呢部 XCover 5 建議零售價係 2498 元，本身價錢已經相當合理，再行出街望望，原來部分網絡商已經有淨機優惠 2200 元左右。買翻部咁硬淨的手機做郊遊出行用副機，絕對令人出行安心。 甚至可以話，呢部機係行山友必備工具黎！
▲ 機身重量只有 172 克，採用 5.3 吋的小型屏幕，機身自然相當小巧、一掌輕鬆握緊；揸機相當爽，我急急腳跑到隔離公園影多少少比大家睇。
▲ 塑膠外殼所具備的是通過美國軍規 MIL-STD 810H 的耐衝擊力測試，而機身獲得 IP68 防塵防水測試。
▲ 正面的這塊 5.3 吋屏幕是 LCD 芒，並非 OLED 質材，非常正！ 三星亦相當細心，並沒有強行推行 FHD 解像度，畢竟 5.3 吋咁細的屏幕，用 1480 X 720 的解像度足夠有餘。
▲ 機身右側擁有特大音量鍵和電源鍵，而電源鍵亦特意加入凹凸紋，咁你單憑觸感都知道係 POWER BUTTON 喇；留意機身邊框是加強塑膠硬度，抗跌防撞能力絕對比一般玻璃機身的手機更高。
▲ 機身左側有另一個相當 SHARP 的紅框按鈕 XCover Key 設計，呢個係一個多功能按鍵，有乜特別功能？ 稍後會詳細介紹。
▲ 機身底部自然是 USB-C 接口，以及外放單喇叭； 金屬接點是留給充電座配件用，查詢過三星官方回覆是，暫時未引入相關配件。
▲ 頂部有一個 3.5mm 耳機孔。
▲ 細心看機身背殼，你會發現佢係有個凹位比你開蓋！
▲ 背蓋本身具備防水膠條，所以唔好長期直接曝晒導致機身積熱，咁樣會導致防水膠快速老化。
▲ 大家見到真三卡槽嗎？ 一張 SIM 2 卡槽，另一邊採用上下卡槽方式支持 SIM 1 和 microSD 卡擴充最高 1TB 容量。
▲ 呢部 XCover 優點係真三卡，但要留意電池會頂住卡槽，意味住換任何卡都需要關機拔出電池才能換卡。
▲ 電池自然係可以任意更換，拆得出黎就唔怕老化； 我亦問過三星香港官方，官方電池係客戶服務中心就有得買，一個 298 元都值得買多個黎做後備。
▲ 電池容量約 3000mAh，而電池本身亦是 NFC 模組的所在地，換電池實際上係換埋 NFC 模組。
性能測試
規格上 XCover 肯定唔係旗艦機，而係入門級的性能，採用 Exynos 850 晶片組（LTE 晶片），配 64GB ROM 和 4GB 記憶體。 比較重要的 5GHz WiFi 和 NFC 都出現在 XCover 5 身上。出廠就已經係自家 OneUI 3.1 加持的 Android 11 系統。入門規格三防機黎講，本 YK 覺得絕對收貨。
▲ 入門規格的 XCover 5 在安兔兔綜合性能測試中得分自然唔高，只有 142748 分。
▲ 在 Geekbench 5 性能測試中，單核心 181 分及多核心 1119 分；可以見到獵戶座 850 處理器的性能對標高通 S626 / S636 處理器的水平。
▲ 但入門機不代表操作體驗慢，在 Androbench 的讀寫測試中 XCover 5 獲得令我驚喜的結果：連續讀寫速度分別是 315MB/s 和 232MB/s，隨機讀寫速度亦有 104MB/s 和 68MB/s；在非 UFS 制式的硬件下，這個讀寫表現跟實際用機體驗的流暢度相當吻合。
▲ 在 Geekbench 4 續航測試中，耗時接近 8.5 小時得出 4461 分；成績稱不上亮麗，畢竟只有 3000mAh 電量，但實際用電一天是毫無難度。
系統功能
本 YK 當然知道三防機市場上極少選擇，三星今次引進的 XCover 5 擁有 Hardcore 外觀、規格偏向入門級。 但其實你用落就會發現，三星都相當用心地係 XCover 5 內加入各種實用系統功能。
▲ 具備防止意外觸控，以及提高屏幕靈敏度的手套模式；而實際測試 XCover 5 濕了水的芒依然可以順利操作！
▲ 留意翻 XCover 5 並無指紋解鎖，但就支持人面識別解鎖功能。
▲ 加入 SOS 求助功能，可以預先設定好連續快速按壓「側鍵」，就可以發送定位和求助信息給自訂聯絡人，相當適合需要安心出門的行山人士用。
▲ 入門機亦具備雙開 IM 信息功能，一部機裝兩個 Whatsapp 都無問題。
▲ 而三星的 Adapt Sound 功能亦被加入到 XCover 5 身上。
▲ 比較特別的是 XCover 5 額外多一個 XCover 專用鍵，預設可以比你設定爲各種功能，包括開啓指定應用程式。
▲ 呢個 XCover Key 係非常實用，支持 Zello 對講機按壓對話功能，唔需要再用觸控屏幕講野，又係一個適合安心出山之友的功能。
指定測試項目
本 YK 根據 Patreon 金主提出的額外項目進行測試，係 GPS 衛星定位速度體驗測試。可能呢位金主經常會野外行，所以衛星定位的速度和準確度就相當重要。 我呢度亦透過專業定位軟件進行測試，睇下到底一發出定位要求，XCover 5 順便對比我手上的 HTC U20 邊個定得快！ 當然，定位過程會關閉數據和 WiFi 掃描，確保單純利用衛星進行定位。
▲ XCover 5 支持 GPS、Glonass、Galileo 和北斗四大定位系統；意味住只要任何一個系統下，能夠捉到該系統係天上其中三個衛星，咁就可以完成定位喇！
▲ 定位成功的畫面係可以出到經緯數值，咁就可以輸入 Google Map 得知本 YK 的位置再哪裏； 實測 XCover 5 需要 10 秒完成純衛星定位，而 HTC U20 5G 需要 15 秒。
相機實拍樣本
▲ 令我相當有驚喜反而係 1600 萬像素 f/1.8 單鏡頭，無 OIS 防震設計，但影出黎畫質相當不錯；詳情大家可以自己睇下面的拍攝，都是原裝直出、真機一到手就直接影的樣本。
結論
本 YK 非常滿意呢部 XCover 5，從功能上睇，佢絕對不能成爲主機，但副機的角色相當稱職：美國軍規防塵防水，特別適合上山下海、安心出遊的朋友； 真三卡、可換電設計，更靈活配置手機的使用時間，而雙卡設計可以更好地保證信號接收的覆蓋範圍，同時保留擴充容量的選擇。 對於我這類喜歡與朋友一齊行山的人，有人走得快、有人走得慢的情況下，用 Zello 對講機可以話係指定動作。 估唔到 XCover Key 會咁爽手好用。
如果你正在找一部物理性可靠的手機、支持真三卡、防水防塵的話，不論我荷包預算多 or 少，三星 XCover 5 都應該會係你清單中排第一的手機。 三星香港今次真係 Good Job 喇！
