另類的開箱: Alcatel Shine Lite 外型 + 上手感
今次版主要開箱的手機，是 Alcatel Shine Lite。想要高性能、打機順，抱歉，呢部 Shine Lite 俾唔到你。但如果想要一部靚靚仔仔，日常使用無問題的手機，也許呢部 Shine Lite 可以係你一個選擇。你會發現，呢部機似乎無乜人提過，衛訊、百老匯等大舖未見過，甚至乎你可能連聽都未聽過，但事實上呢部機早就在 3 香港有得買， 而且聽聞都賣出左唔少部，建議零售價為 $1699，而深水埗細舖再便宜一點，只需 $1299 左右，就可以入手。
至於呢部 Alcatel Shine Lite 嘅外型，點解可以吸引到版主呢？唔知有幾多人會同版主一樣，對玻璃機背手機情有獨鍾呢？可能市面上太多金屬 / 塑膠機身的手機，所以用上玻璃機背的 Shine Lite，版主覺得就顯得比普遍手機與眾不同。而機身側邊用上金屬材質，並採用類似魅藍 m5 Note 的切割設計，增加手機的美感。 不過，雖然外型係靚，但都唔係無缺點，用上金屬 + 玻璃的 Shine Lite，只有 5 吋芒，但重量則有 156g，拎上手感覺有點墜，而且條邊位會有少少𠝹手。但整體而言，以一部千元手機來說，造工上真係無得輸。
▲ 呢個係 Alcatel Shine Lite 的包裝盒，其實並不特別，不過這不重要。
▲ 盒的背面會有呢部 Alcatel Shine Lite 的基本資料，包括機身體積、屏幕尺寸、相機像素、儲存空間、電池容量等等。
▲ 個盒都唔講咁多了，即刻睇下跟機會有乜嘢配件！打開個盒，會見到除左有 Shine Lite，仲會有說明書、保養證、火牛、USB 線、耳機、保護貼以及 SIM 卡針，配件方面都幾齊備。
▲ 火牛上可以見到，輸出只有 5V / 1A，即係只有慢充。
▲ Shine Lite 採用了 5 吋 720p HD IPS 屏幕，雖然話無 1080p 有點可惜，但好處係相對更省電。
▲ 屏幕上方會有 500 萬像素前置鏡頭以及 Sensor。
▲ 屏幕下方係有三天皇鍵，不過如果唔用佢嘅時候係會收埋，用佢嘅時候先會着燈。
▲ 至於機背部份，有版主最喜歡的玻璃材質，果種望落去可以見到倒影嘅感覺，真係好正！
▲ 機背左上角會有 1300 萬像素主鏡頭以及閃光燈，而機背接近中央部份，會有指紋辨識器以及「Alcatel」的字樣。而 Shine Lite 的指紋辨識器，其實都有佢嘅獨特之處，有幾特別，等陣會講。
▲ 而機背下方會有「SHINE」的字樣。
▲ 可以見到 Shine Lite 的側邊採用好似魅藍 m5 Note 的切割設計，而機身左側設有雙 Nano-SIM 卡槽，不過係用上「三選二設計」。
▲ 而機身右側則設有開關鍵以及音量鍵。
▲ 機頂設有 3.5mm 耳機孔。
▲ 而機底則有雙喇叭以及 microUSB 插槽。
▲ 拎上手感覺有少許墜，同埋條邊有少許𠝹手。
MTK U 又如何？跑分係唔高，不過睇片、播歌一樣掂！
規格方面，Alcatel Shine Lite 配備了 MTK MT6737 四核心處理器，內置 2GB RAM 以及 16GB ROM，放在今日來看，實在是非常入門。至於 Shine Lite 邊部份會相對地出色呢？版主用了一系列的跑分軟件，測試一下這部 Shine Lite 的性能。雖然佢係用上 MTK U，唔使講都知道，在 GPU 方面一定會不太理想，不過，呢部 Shine Lite 本來就唔係 for 你用來打機的，只要唔打機，實際上影響都唔會太大。最基本要知道的，是平時用來睇下片，能唔能夠暢順。即刻睇下啦！
▲ 用 MTK MT6737 四核心處理器，跑分尤其是 3D 性能低，並不意外。不過在 UX 性能以及 CPU 性能方面，還是勉強可以接受的。
▲ 無錯講跑分，Alcatel Shine Lite 絕對唔高，但如果你平時唔係用黎打機，純粹日常使用，最多出街搭車睇下片，其實佢用黎播放 720p 的影片，都可以好順暢。另外，版主亦都將 Shine Lite 的音量調到最高，雖然未必有好似 Huawei MediaPad m3 果種令版主嚇一跳的音量，但係平時喺屋企，就咁擺喺枱面播下歌，都足夠聽得清清楚楚。
平平地一部機，影相能力又如何呢？
Alcatel Shine Lite 配備了 1300 萬像素主鏡頭以及 500 萬像素前置鏡頭，用上 Samsung S5K4H8 感光元件。不過一部千幾蚊的手機，絕對係唔能夠要求好高。版主在試用呢部 Shine Lite 影相的時候，發現佢嘅快門速度偏慢，影相嘅時候真係需要手好定先得，而影完出來在手機上睇，可能因為用上 720p 屏幕的關係，並不算太清晰，感覺雜訊較多。不過相片放到落電腦看，倒還可以接受，然而放大來看 details 位做得唔夠，而且感覺比較模糊，但都算對得住千元機的質素。
1300 萬像素主鏡頭試拍
▲ 左圖攝於比較昏暗的環境，快門速度相當慢，已盡量讓手保持穩定，但出來影像放大來看還是比較模糊。而在光源充足的環境下，則明顯好好多，唯獨放大來看，始終顆粒夠多，有油畫化的情況。
▲ 放大左圖車上黃色的小字，雖然 details 並不足夠，但都勉強睇到寫左乜嘢字。
▲ 景深效果並不算太明顯。
▲ 剛才提到快門唔夠快的問題，從左圖中可以睇到，架模型火車並唔係郁得好快，而且光源都算充足，但依然無法捕捉火車的一瞬間，變得比較模糊。
500 像素前置鏡頭試拍
▲ 純粹試相，兩張已足夠 (唔係會俾人打
)。因為相機預設 16:9 的緣故，所以如果打橫影嘅話，就會好似右圖咁，淨係影到個頭。另外，同主鏡頭的情況一樣，成像 details 唔夠「實」，放大看比較鬆散模糊。特別功能試玩: 玩指紋？快速啟動應用程式
睇完 Shine Lite 的外型、跑分、影片播放、相機，係時候同大家講下，到底呢部手機有啲乜嘢特別功能。要強調的是，係「特別功能」，即係一啲 Gimmick 嘢，而非賣點 (至少我是這樣認為)。呢個特別功能是同指紋有關，佢就係「快速應用程式訪問」，你可以自訂不同手指指紋，去開啟不同的應用程式，例如食指解鎖後直接開啟相機，中指解鎖後直接開啟 Whatsapp 等等，最多可以設定 5 組指紋。聽落好似好方便，不過版主用落有個問題係，當我設定左 5 組指紋的話，每次解鎖之前都要諗下，到底我要開的應用程式，係用邊隻手指解鎖，呢個情況就似乎變左，將一啲簡單的事情複雜化。不過，可能這只是版主個人問題，或者習慣左之後，就會變得好方便。網友又覺得呢？
▲ 以上為 Alcatel Shine Lite 用指紋快速啟動不同應用程式的示範。
小結
試用過呢部 Alcatel Shine Lite 一段時間，無錯呢部手機或者會有不少缺點，例如 GPU 效能差、影相唔夠靚等等，但基本上作日常使用，其實並沒有甚麼大問題，系統操作方面都相當順暢，平時搭車用黎睇 720p 高清片都無問題。特別係呢部手機在造工方面，真係非市面上一般的千元手機可比擬。假如嫌手機得 16GB 儲存容量太少的話，你亦可以插入 microSD 彌補不足。以千元機來說，版主會選擇呢部 Shine Lite，多過選擇紅米手機。網友又點睇呢？