千元 5G 手機嚟啦! Nokia G42 5G 五千萬相機 ＋五千大電

Keith Yim 2023-06-28 20:24 | Nokia

好多個 5 字呀！Nokia 即日公佈 Nokia G42 手機！呢部機，同嗰 5 字好大關係：佢係一部 5G 手機，有五千萬像素鏡頭，都有 5000mAh 大電池。當然，賣價唔會五千蚊咁貴啦，呢部 Nokia G52 5G 係入門級得嚟，但又好有特色嘅手機，相信賣價唔會貴過二千蚊。

大芒好睇又好聲

首先，Nokia G42 5G 手機支援 5G 連接，佢用上相對中低檔次嘅 Snapdragon 480+ 5G SoC，喺 5G 頻段上面，除咗 n79 外，香港其他高低頻 4G / 5G 頻段，都對應得到，有咗 5G 上網，手機玩 App、睇片真係做乜都快啲。佢用上 6.65 吋 20:9 大屏幕，睇片好爽，雖然佢係入門級，都支援 Nokia 手機先至有嘅 OZO Playback 音效，令你睇短片同聽音樂都更加投入。

五千萬像素有 AI 人像模式

Nokia G42 5G 有三個鏡頭，但實際拍攝而言，以 5000 像素主鏡頭為主，F1.8 大光圈，應付日拍、夜攝都無大問題。其餘兩個鏡頭是近拍及距離感測。唔好睇少呢兩組鏡頭，令一部入門手機，都支援 AI 人像景深模式，而用係上年夜攝之王 Nokia X30 嘅夜攝 2.0 , 極黑模式及腳架模式拍攝，都一様可以係 G42 5G 出現。

五千大電池

5000 mAH 大電池，令佢電池續航力好強，官方話可以用到三日咁長，而手機本身支援 QC3.0 & PD3.0 即 20W 快充，只係跟機已無再送充電器，係有點遺憾。最後，Nokia G42 5G 手機仲有一個好特別嘅功能，就係可以自行維修。如果有咩問題，透過 QuickFix 設計，可以更快拆開機背，自行更換最易壞的電池，減少維修的難度。



總括嚟講，Nokia G42 5G 手機係一部功能全面，價格又平嘅5G手機，適合想試吓 5G 網絡但又驚 5G 手機太貴嘅你如果你都想試吓 5G 網絡，咁就唔好錯過呢部手機啦。最後，Nokia G42 5G 咁入門，都有 2 年 Anroid OS 升級及 3 年保安升級，好少入門手機咁好照啦！幾時香港有得賣，據知都要七月之後啦。