開箱外觀
ASUS Zenfone 10 同其他嘅大屏幕手機唔同，佢用嘅係 5.9 吋嘅屏幕，所以佢嘅體積好方便攜帶，只有 146.5 x 68.1 x 9.4mm，重量都只有 172g，係一部可以一手操作，而且帶喺身上都唔會覺得重嘅手機。試用期間，真係袋袋友善，著窄身褲都無有怕。一見到 Zenfone 10，你可能會覺得佢只係上一代 Zenfone 9 嘅細改版，因為除咗加咗個新嘅綠色款式外，外型設計同上一代差唔多，我哋今次拎到嘅係紅色版，如果我唔講，你可能只會諗佢係 Zenfone 9。但係實際上，佢用咗最新嘅高通 S8 Gen 2 處理器、相機升級咗，加入新一代微雲台、用咗新嘅前鏡頭感光元件、仲加咗無線充電功能，補足咗上一代嘅不足。
性能同續航力
Zenfone 10 用咗而家高通最新嘅 S8 Gen 2 處理器，我哋今次攞到嘅版本係 16GB RAM ＋ 512GB ROM，性能強。用 Geekbench、PCmark、3Dmark 嘅跑分軟件同佢測試，結果都非常好，真正做到旗艦機種嘅效能。實際上，用呢部手機都好流暢，用嘅時候都無出現過窒機嘅問題。
呢一年我哋測試過好多款用 S8 Gen 2 處理器嘅手機，但係呢部手機嘅溫控表現特別非常突出。因為以前嘅細手機都會因為機身散熱面積細而容易發熱，但係 Zenfone 10 就無呢個問題，或者因為機身厚度相對厚，加埋背蓋材質嘅關係，跑完三款性能測試軟件之後，機身升溫情況非常輕微，真係要俾個 Like！
除咗性能好、溫控表現出色，用咗 4300mAh 電量嘅 Zenfone 10，佢嘅續航力表現都好令我哋滿意。測試過程係用連續播放 YouTube 高清串流視頻嚟測試，我哋 Off 咗自動亮度，同時將屏幕亮度同聲量都調到大概 50% 左右，並開咗自動屏幕更新率，用 Wi-Fi 連網嚟連續播放 YouTube 一個鐘頭。測試一個鐘頭之後，電量由 80% 跌到 75%，只係跌咗 5% 電量，換算過嚟，如果係滿電嘅情況下，Zenfone 10 可以連續播放 Youtube 高達 20 個鐘頭，呢個續航力表現真係令人印象深刻！
之前
之後影音效果
Zenfone 10 配備咗 1080x2400 解像度嘅 5.9 寸屏幕，支援到最高嘅 144Hz 屏幕更新率，不過如果想用到 144Hz，就要喺遊戲嘅時候喺「遊戲精靈度」開啓。如果唔係喺玩遊戲，屏幕更新率就只有最高 120Hz。雖然呢塊屏幕唔算大，但佢嘅色水、亮度同埋可視角都做得好好，就算喺陽光底下都可以保持唔錯嘅閱讀性，而且顯示相關設定都好齊全。
Zenfone 10 嘅雙喇叭低音表現得好厚實，甚至到機身都會有共振嘅感覺，音質同埋音量都表現得非常好，效果接近 iPhone 13、14 系列，屬於「低音勁，中音甜，高音準」嘅朋友 (食字咋，總之就係大大聲好好聽) 。比好多近期嘅大芒 Android 旗艦都要好。
相機效果
喺相機部分，Zenfone 10 配備咗有六軸防震 hybrid 雲台 2.0，仲有 1/1.56 吋感光元件 5000萬像素主鏡頭，配埋 1300 萬像素 120 度超廣角鏡頭，前鏡頭就升級到 RGBW 感光元件嘅 3200 萬像素。除左影相，Zenfone 10 主打智能防手震錄影功能，相機會自己用陀螺儀去偵測晃動程度，去進行數碼防震裁切，穩定嘅時候就用少啲裁切去提供更廣嘅視野，就可以得到更好嘅錄影效果。
實際使用嚟睇，Zenfone 10 喺日夜場景都表現得好穩健，顏色豐富，對比度高，成像風格屬於比較討好眼球嘅風格，喺好暗嘅場景下拍攝嘅時候，微雲台嘅穩定效果可以令到夜間模式拍到更好。開啓智能防手震之後，無論喺行路定跑步，單係用手渣住部機，拍出嚟嘅片都唔震下震下咁。
不過，都有啲地方要彈嘅，第一個就係前鏡頭唔支援 4K 錄影，再一個就係前鏡頭同超廣角鏡頭都唔支援自動對焦（Zenfone 9 嘅前鏡頭同超廣角鏡頭就有支援）。
總結：小屏幕旗艦機嘅好選擇
雖然 Zenfone 10 係小幅升級嘅嘅機種，但係細芒旗艦嘅選擇真係賣少見少， Zenfone 10 升級最新嘅 S8 Gen 2 處理器，加埋 15W 無線充電，就令到佢更加有旗艦嘅氣質。喺我哋實際測試中，佢嘅續航、相機同埋喇叭都表現得好好，如果再配合一直以來 Zenfone 相對親民嘅定價策略 （相信佢係最平價嘅 8 Gen 2 旗旗艦手機之一）相信對於鍾意細芒旗艦手機嘅消費者嚟講，或者想六千蚊有找，買到 8 Gen 2 高效能手機嘅你，Zenfone 10 都係一個唔錯嘅選擇。
原文來自：ePrice.com.tw
ASUS Zenfone 10 於 2022 年 7 月上市，按這裡有詳細規格及最新賣價。
