iPhone 炒賣神話未完?話你知 iPhone 12 / 12 Pro 係咪值得入手

左定坤 (Cho Ting Kwan) 2020-10-16 19:41 | Apple
等陣八點,就係 iPhone 12 以及 iPhone 12 Pro Apple Online Store (AOS) 訂機嘅時間,唔知有幾多網友會打算入手 iPhone 12 或者 iPhone 12 Pro 呢?你會買嚟自用定係搏佢仲有得炒?你可能會話:唔係吓嘛?2021 都嚟,乜 iPhone 仲有得炒㗎咩?據蘋果日報報導,先達「分析員」話可能仲會有水位喎。到底版主又點睇?我哋一齊討論吓啦。

FB.jpg

先達嘅收機佬就提出,上年 iPhone 11 系列開賣第一個星期,都仲有 $1000 - $1500 水位喎,所以用呢個經驗就同大家講,今年好大機會都一樣㗎,炒啦炒啦炒啦......

而我個人係咁睇:

首先你要有機,無機嘅話,佢話炒到十萬,都係多餘。另外,新色 (藍色) 較搶手的確係事實,但係咪真係因為咁而有得炒?未必。根本炒唔炒得起呢樣嘢,有三個因素:

1. Apple 出貨量多與少
2. 大陸有無得首賣
3. 市場需求大唔大

而基本上以上講果三個因素,今時今日已經唔存在。

出貨量多唔多,你見近兩年開賣第一日,好多時都喺大舖有現貨賣,而且有啲良心店舖甚至係原價賣。而大陸有無得首賣,結果好明顯係有。至於市場需求大唔大,其實我會覺得唔係睇香港人需求,而係睇大陸人需求,大陸賣得貴過香港好多吖嘛,咁若果佢哋想平嘅,都會可能落嚟香港買嘅,但而家受住疫情影響,仲會唔會咁多人落嚟買,似乎未必。

不過無可否認,雖然 Apple 出貨量基本唔會少,但總會有例外某啲型號會比較少貨,通常都係大機、特別色,今年情況會唔會都一樣呢?其實等陣留意到貨日期、買唔買得到,就會知道。但用成萬幾蚊去賺一千幾百,仲要都有高風險,係咪真係仲值得將資源投放落去呢?你又點睇呢?

最後,iPhone 12 系列值唔值得入手,我會話,今年 iPhone 12 系列進步咗咁多,若果你唔係用緊 iPhone 11 系列,而係用緊再舊啲嘅 iPhone,絕對值得升級上去。但一般我會覺得,要買,一係買 iPhone 12 mini,夠細芒夠特別,一係就直上 iPhone 12 Pro Max,重點係,你係咪好需要佢個 ZOOM 功能,如果唔係,我相信就算 iPhone 12 mini 影相都唔會差,除咗續航會比較差之外...... #重點係自用
 

最新新聞