提到 iPhone，雖然我哋成日笑 iPhone 好多嘢都比起 Android 落後，人哋出完之後先跟住出，但有啲嘢卻係由 iPhone 帶起潮流！就好似取消 3.5mm 耳機孔！雖然 Apple 唔係第一間咁做嘅手機廠商，但就由 iPhone 7 開始帶起潮流，記得嗰陣 iPhone 7 連 3.5mm 耳機孔都取消咗之後，有啲 Android 陣型嘅手機品牌就走出嚟抽水，又話佢哋嘅手機有 3.5mm 耳機孔㗎，點知過多排，曾經笑過 iPhone 7 抽過水嘅品牌，自己咪又係出無 3.5mm 耳機孔嘅手機？
又好似 Apple 響應環保，買機唔跟火牛，嗰陣又係畀人抽水抽到上天，最後點樣？好似三星呢啲手機品牌，咪又係跟風唔跟叉電火牛～所以 Apple 係咪好有影響力？絕對有！
去到 iPhone 14，美國版就連 SIM 卡槽都唔要埋，淨係支援 eSIM，變相逼人一定要用 eSIM，而最新消息就表示，Apple 甚至會擴大取消 SIM 卡槽手機嘅範圍，嚟緊下代 iPhone 15，可能連歐洲版都會無埋 SIM 卡槽！
根據 iGeneration 嘅消息來源指出，Apple 嚟緊 iPhone 15 同埋 iPhone 15 Pro 喺法國上市嘅時候，唔會再有實體 SIM 卡槽，淨係支持 eSIM，而睇返因為 Apple 並無生產過所謂嘅法國版，所以取消實體 SIM 卡槽呢個決定，可能會適用於歐洲更多嘅國家。
對於唔習慣用 eSIM 嘅用家嚟講，無咗實體 SIM 卡槽可能會覺得麻煩，但其實如果無實體 SIM 卡槽，淨係用 eSIM，都會為 Apple 帶嚟一啲好處，例如其他零件可以有更多嘅空間去放置，同時亦都可能進一步增強到防水嘅能力。
Apple 會唔會將所有國家嘅 iPhone 都取消哂實體 SIM 卡槽呢？暫時唔會，相信都要一段更長時間，先會做到，就好似喺中國大陸嘅版本，就唔支持 eSIM，但就反而有兩個實體卡槽𠻹！咁我想問下大家，你哋會 prefer 用 eSIM 多啲，定係要兩個實體卡槽多啲呢？
來源：AppInsider