如果你未 Update 手上嘅 iPhone，雖然就會用唔到「語音隔離」功能，但亦可能未必係一件壞事。每次更新 iOS 版本，用家最關心、最在意嘅，應該係電池續航問題，到底會唔會食電咗，令到手機使用時間更短呢？
最近外國就有個知名 YouTuber「iAppleBytes」發佈咗一條實機測試影片，將 6 款歷代 iPhone 舊機，包括 iPhone 8、iPhone SE 2 代、iPhone XR、iPhone 11、iPhone 12 同埋 iPhone 13 ，升級到最新嘅 iOS 16.4，並且統一返測試條件，將屏幕亮度調到 25%，同埋將自動亮度 Off 咗佢，之後佢就用咗一個叫做 GeekBench 4 嘅應用程式，嚟測試呢 6 款 iPhone 嘅續航力。
▲ 屏幕亮度 25%。
▲ 自動亮度關閉。
測試結果出爐！首先好合理嘅係，愈舊嘅就愈快無電，續航最長嗰部係 iPhone 13，用咗 7 個鐘 48 分鐘 56 秒，先將佢舊電用完。而根據 iAppleBytes 對每一個版本嘅測試之中，就發現升級咗 iOS 16.4 之後，喺電池續航力表現方面，對比先前 iOS 16 發佈以來嘅各個版本，全部都有電力下滑嘅趨勢，當中就以上咗市 2-3 年嘅舊機型，例如 iPhone 12、iPhone13，食電情況最明顯，反而更舊嘅機型，好似 iPhone 8、iPhone SE 2 代，雖然一樣有食電，但就相對無咁明顯。
▲ iPhone 13 用了 7 小時 48 分 56 秒，由 100% 跌至 0%。
作為參考，就以 2 月發佈嘅前一個 iOS 16.3 版本為例，比較返升級到最新嘅 iOS 16.4 版本之後，同樣做 GeekBench 4 耗電測試，由滿電到電池耗盡嘅續航時間，iPhone 8 係 6 款機型之中食電最少，只係比升級之前少咗 2 分鐘嘅電力，而 iPhone SE 2 代、iPhone XR 同埋 iPhone 11，跌幅就介乎 10-20 分鐘之間，都算係合理範圍內。
而手機續航力下滑最明顯嘅係 iPhone 13，同之前嘅 iOS 16.3.1 做比較，少咗大約成 58 分鐘，即係接近 1 個鐘，而 iPhone 12 亦都不相伯仲，少咗 51 分鐘，唔知大家升級咗 iOS 16.4 之後，又有無出現呢個情況呢？同埋唔知大家又有無留意到，呢個測試係無包括 iPhone 14，咁 iPhone 14 又有無影響呢？有無網友又可以分享一下呢？
