高層：將推出華為版手機八達通！支援最新華為手機型號！傳 11 月推出

左定坤 (Cho Ting Kwan) 2024-09-17 10:43 | Huawei

自從華為無咗 Google Mobile Service (GMS)，轉用自家 Huawei Mobile Service (HMS) 之後，一開始市場可能擔心八達通用唔用到問題，而後來佢哋就同八達通公司推出咗 Huawei Pay 八達通，等佢可以做到好似 Samsung Pay、Apple Pay 八達通嘅便利。但近年最新型號嘅華為手機，就已經用唔到 Huawei Pay 八達通，因為佢哋轉用咗自己嘅制式，幾時先可以再次用到八達通？佢哋最近嘅傳媒茶聚入面，就講咗解決方法，並且傳會呢個月份推出......



其實呢個八達通中秋傳媒茶聚，我哋就無份去，淨係請咗港聞記者，不過今日八達通就 send 咗當日八達通控股有限公司非執行主席楊美珍發言重點，睇到佢講咗好多嘢，但其中大家可能比較關注嘅，係以下呢一段：

「另外，除了 Android 版八達通以外，我們亦會儘快支援新推出的華為手機，推出一個華為版的手機八達通，令到所有品牌的電話都可以使用手機八達通。」

雖然佢無透露到，到底呢個華為版手機八達通幾時推出，不過市場有消息就傳出，預計會喺 11 月就會有，而到時八達通就唔會再係依靠乜乜 Pay 物物 Pay，而係直接用八達通 App 就用到八達通。但具體玩法係點，就要留意住八達通正式公佈，到時再同大家作 update。