衛訊開賣優惠詳情：直接減$1,000，贈品總值超過$3,000
今次衛訊嘅優惠可以話係「多重奏」，計落條數相當和味。HUAWEI Mate X7（16GB+512GB）嘅建議零售價為 $15,988，而家衛訊限時優惠價 $14,988，即場慳 $1,000。如果用 DBS信用卡付款，可以再享 $300「一扣即享」折扣，變相入手價低至 $14,688。贈品方面更加豐富，包括價值 $1,588 嘅 HUAWEI MatePad 11.5 WiFi 平板（或者可以選擇 Trade-in 額外折扣 $700），以及價值 $1,099 嘅 HUAWEI FreeBuds 6 藍牙耳機（或 Trade-in 額外折扣 $400），再加埋價值 $199 嘅 HUAWEI 智能體脂磅。換言之，如果你唔需要 Trade-in，贈品總價值已經超過 $3,300，仲未計尊享保養服務。另外，eShop新會員用迎新優惠碼，購物滿 $2,000 可以再減 $100。
新機焦點：可靠與影像大幅升級
Mate X7 作為新一代摺疊旗艦，升級重點好明確，就係解決用戶對摺機最大嘅兩個顧慮：耐用度同影相質素。首先係 「超可靠摺疊玄武架構」，機身外屏用上 第二代玄武鋼化崑崙玻璃，更堅硬抗摔，而內屏就首創三層複合超韌結構，官方稱抗衝擊性提升20%，耐彎折能力更大幅提升100%。而且今代終於支援 IP58/IP59 級別防塵抗水，日常使用遇上雨水或塵埃都多一重保障，呢點對於摺機嚟講意義重大。其次係影相系統，Mate X7 搭載第二代紅楓原色影像系統，色彩還原度提升43%。主鏡頭配備業界少有嘅 10檔物理可變光圈（F1.49 - F4.0），可以像相機般靈活控制景深同光線。加上 5000萬像素長焦微距鏡頭，無論係遠距離拍攝還是近距離影細節都得心應手。官方強調其感光元件媲美電影攝影機成像，動態範圍高達17.5EV，影夜景同HDR效果會更出色。
硬件規格速覽
規格方面，HUAWEI Mate X7 配備 Kirin 9030 Pro 處理器，內置 16GB RAM 同 512GB ROM。屏幕係佢嘅一大亮點，內屏達到 8吋 OLED 規格，支援 1-120Hz LTPO 自適應刷新率，而外屏則為 6.49吋 OLED，同樣支援 1-120Hz LTPO，確保內外體驗一致流暢。電池容量為 5600mAh（典型值），支援 66W 有線快充及 50W 無線快充，續航力有保證。機身設計亦相當輕薄，摺疊時厚約 9.5mm，展開後僅約 4.5mm，重量約 236g，便攜性唔錯，可使用雙 Nano SIM 或一 Nano SIM 加一 eSIM。