Sony Xperia 10 VII 正式發表+上手評測！雙鏡頭橫排設計+加入快門鍵，相機升級仲有雙音箱

Sony 今日終於正式發表全新中階手機 Xperia 10 VII，而香港市場亦同步開賣。講真，我覺得 Sony 手機代代設計都無乜太大變動，但今次 Xperia 10 VII 就畀我感覺改動大咗，而且影相、聽歌、打機樣樣掂。想知手機有乜賣點，香港賣價又幾多，睇下文啦！

 

外觀設計：橫排雙鏡頭 + 透明殼，簡約清新

一見到 Sony Xperia 10 VII，就覺得 Sony 今次幾有誠意！機身用咗新設計語言，邊框更窄，顏色方面，有松石綠、炭灰黑以及雪松白。整體感覺簡約大方，輕手感超方便單手操作，仲有側邊加入咗原本 Xperia 1 系列先有嘅快門鍵，短按可以截圖，而長按則可以入相機，入到相機再短按又可以做 Shutter，不過就唔似得 Xperia 1 系列咁，可以撳一半去進行對焦，如果你要對焦，就要用手指喺屏幕篤。

 

最吸睛係後置鏡頭改咗橫排雙鏡頭設計，配合新加入嘅快門鍵，影相時橫向握機更方便。仲有全新透明機殼，唔單止見到機身顏色，鏡頭部份仲凹落去，保護得貼身。呢個殼仲可以 DIY，用家想貼自己相或者貼紙都得，玩味十足。機身防水防塵 IP68 等級，仲支援 microSD 擴充至 2TB。

 

相機升級：感光元件大一圈，夜景細節勁爆 + Google Magic Editor

相機係 Xperia 系列嘅賣點，今次 Xperia 10 VII 主鏡頭感光元件升級到 1/1.56 吋（比上代大 1.64 倍），但雙鏡頭卻可以拍出 3 個不同焦段，分別為 16mm (13MP)、24mm (50MP) 以及 48mm (12MP，由 24mm crop 出來)。夜景表現尤其出色，雜訊少咗，細節多咗，例如放大 100% 睇 building 邊緣或樹葉紋理，都清晰突出，唔會過份曝光或白平衡偏色。比起其他品牌，Xperia 10 VII 嘅顏色自然啲，暗位 detail 保留得好，招牌字樣或光影處理都好好多。

 

功能上，Xperia 10 VI 支援創意濾鏡、散景效果、影片特效，仲加咗 Google Magic Editor，例如 Magic Eraser 功能，可以後製擦走多餘嘅人或物，相當方便。自拍鏡頭都升級咗，單手操作易上手。總之，呢個雙鏡頭組合，影 Instagram 相或日常記錄，絕對夠用有餘。



Sony Xperia 10 VII 相機成像即看：
 

AI + 娛樂體驗：Google AI 即時搜尋，120Hz 螢幕 + 雙音箱

今次最大賣點之一，就係支援 Google AI！可以即時 Circle to search、翻譯等等，日常工作或搜尋資料都方便咗好多。屏幕雖然維持 6.1 吋，但比例由 21:9 改 19:5:9，顯示區多咗 5%，睇片或打機都可以有不錯的視覺體驗。配合 120Hz 刷新率，滾動的時候超順暢，OLED 面板亦令畫面顏色相當鮮豔。

 

音效方面，雙前置喇叭升級咗音箱設計（左右平衡，前後分佈），減少振動同雜訊，播歌或睇 Netflix 音質高質素咗。藍牙 LDAC 傳輸加倍穩定；有線耳機插頭技術升級，空間感擴闊，仲支援 DSEE Ultimate AI 升級音質，就算用平價耳筒，都享受到 hi-res 效果。






 

電池 + 性能：兩日續航 + Snapdragon 6 Gen 3

電池方面，Sony Xperia 10 VII 內置 5000mAh 大電量，正常用兩日冇問題，四年後健康度維持 80% 左右。性能用 Snapdragon 6 Gen 3 處理器 + 8GB RAM，日常多工流暢，仲有四年 Android 系統更新 + 六年安全性更新，長用安心。

 

上市 + 優惠：即日開賣

Xperia 10 VII 即日（9月12日）喺 Sony Store、授權經銷商同電訊商開賣，香港建議零售價為 $3,299，由即日起至 9 月 30 日，只要購買 Xperia 10 VII，即送全新漸層設計手機殼 + Sony 獨家貼紙 + Xperia-to-Xperia 舊有客戶優惠 (減多 $200)。另外，你亦可以額外獲得 $200 超市禮券，或者加 $399 加購 Sony 真無線耳機 WF-C710N (建議零售價 $799)。