相機是重點! MX6 感光元件用上 P9 的升級版
早在兩個月之前，版主虎仔已經同大家分享過，安兔兔在微博爆料，爆出魅族 MX6 的規格資料。不過果陣的資料只係好基本，而且未必準確，而最新傳聞表示，相機部份魅族用上 1200 萬像素主鏡頭，而非當初安兔兔所爆的 2070 萬像素。雖然像素比上代 MX5 細了不少，不過像素大未必一定差，以前像素夠大，但鏡頭質素一直都不算出色，咁其實仲要睇埋佢嘅感光元件。在今年推出的手機當中，版主個人覺得，撇開「假相」事件來說，華為 P9 影相屬最靚，而有傳魅族今次在 MX6 相機上用到的感光元件，更是華為 P9 所用 IMX286 的升級版本－IMX386，相信如果魅族真係用上 IMX386 的話，咁魅族應該可以大大聲講，相機是 MX6 的賣點之一！對於中意影相的網友來說，應該都算值得期待吧！
一貫風格! 魅族強調：沒有粗天線!
除左相機之外，似乎外型方面亦會是魅族會強調的「賣點」。魅族在發佈會前幾天，亦都按照慣例，係咁在佢地嘅微博上，「暗示」有關新機的資訊。而在外型方面，魅族就話，當其他廠商仲係咁模仿金屬三段式機背時，佢地已經走先一步，開始鑽研「天線一刀」。另外，屏幕顯示質素，亦可能會是 MX6 的重點。其中一個微博的 post 係咁講的：「在我們追求顯示效果和功耗的最佳平衡時，你們還在糾結超窄邊框。」俾版主感覺係，有少少好似笑緊其他對手咁，不過再進一步想暗示，MX6 應該不單止會有超窄邊框，而且屏幕質素都會不錯，同埋會相對更省電。還有的是，魅族 MX6 應該都會配有快速充電功能，但魅族表示，快速充電並不會是最大亮點，而是一部手機最基本有的功能，已經將這個功能「標配化」。
▲ 魅族在發佈前幾天，在其微博上強調自己點樣做得比對手好。
專用手機保護配件，不只一項功能
相信有留意開的都知道，魅族好大機會會在今次的發佈會上，介紹一款全新的智能保護套。呢個套的功能，不單止淨係用黎保護手機，仲會有「開蓋喚醒、合上休眠」的功能，呢項功能亦都方便一些成日忘記關屏的朋友，而且能夠減輕開關鍵的損耗。另外，呢個保護套亦有傳會具有提示燈功能，例如當你有未接來電、訊息等等，盞提示燈就會亮起作出通知，不過有國內媒體明串，乜呢個功能唔係 Sony N 年前玩剩架咩？點解黎到魅族又會變左新功能? 當然，到時會唔會真係發表呢個保護套，仍是未知之數，又會唔會有更多的隱藏功能，都係未知，想知的話，就要特別留意發佈會的直播了。
▲ 有傳新的保護套，仲有「開蓋喚醒，合上休眠」以及提示燈的功能。
魅族 MX6 售價資料流出
有傳今次 MX6 的售價，將會比上代賣得更貴，有傳媒猜測，也許是相機上用到的 IMX386 感光元件不便宜的關係，令到整體成本提高，所以賣價都要跟住上漲。早幾日版主虎仔同大家提過，有外媒爆料 MX6 32GB 版本定價約 HK$2288，而 64GB 版本約售 HK$2366，不過以上兩個價錢，都係根據美金折合番做港幣的。而呢幾日亦有關於 MX6 更具體的消息。根據一份魅族內部文件的消息，表示 MX6 + 保護套的「組合價」將會為 2299 人民幣，折合港幣約 $2665，並未清楚呢個組合係講緊邊個容量版本。
▲ 日前網上有魅族內部文件資料流出，表示「MX6 + 皮套套套餐」，價格為 2299 人民幣。
來源：和訊網 | 新浪新聞