001：外型靚仔、手感好
並唔係部部紅米手機，我都可以畀得落「外型靚仔、手感好」嘅評價，但呢部紅米 Note 13 Pro+ 5G，我覺得算係唔差，至少拎上手唔係太似用緊紅米手機，而係有一刻嘅錯覺，係用緊我之前用過嘅小米 13 Pro，但就比較輕身，重 204.5g，無小米 13 Pro 咁墜手。紅米 Note 13 Pro+ 5G 用上咗曲面屏幕，呢個我唔敢講係優點定缺點，畢竟就連三星都開始唔玩曲面屏幕，佢而家先「人棄我取」，但好在佢曲起嚟又唔係好曲，至少未去到單手使用容易碰到嘅地步，而機背同樣嘅四邊同樣係有少少弧度，有助增強手感。除咗用上萬年清唔哂貨嘅 6.67 吋芒之外，紅米 Note 13 Pro+ 5G 喺設計上都有少少特別嘅地方。版主上手嘅係黑色版本，係用上比較光面嘅設計，容易沾油、指紋係缺點，不過特別之處用上黑、灰兩截色設計，正面睇唔覺，似純粹嘅黑色，但喺光亮環境之下側側地望落去，就會見到明顯嘅兩截色，又有少少 POCO 手機嘅感覺，只不過 POCO 手機係成塊拱起裝住相機鏡頭，而紅米 Note 13 Pro+ 5G 就係一整塊平面。而喺上方黑色嗰截入面，又會明顯見到切割成三個方格，一大兩小，大嗰個裝住三鏡頭，右上方嘅細格裝住閃光燈，右下方嘅細格寫住 Redmi F1.65 AI CAMERA，設計嚟講確係有點特色。
6.67 吋屏幕。
穿㝫芒設計。
側面睇落去可以見到係用上曲芒。
黑色機背用上兩截色設計。
燈光下側少少會更清楚，並且見到分割成三個方格。
換個角度睇，可能分割線又會消失咗。
側面有電源鍵以及音量鍵。
機底有 USB Type C 插槽。
機頂部份係咁。002：支持 IP68 防水防塵
以一部中階價位手機嚟講，有 IP68 防水防塵，都係一個賣點，唔可以話係最平有 IP68 嗰部，但開價 $2999 有 IP68 防水手機，算係少有。講到防水，對手應該係 Sony Xperia 10 V，雖然而家已經減咗好多價，出面大舖賣緊 $2699，但初初推出嗰陣開價都要 $3499，而家紅米 Note 13 Pro+ 5G 三千蚊有找，算係唔話得。但唔好忘記喎，Sony Xperia 10 V 得 128GB 容量，但紅米 Note 13 Pro+ 5G 係有 512GB 容量，一較之下，紅米 Note 13 Pro+ 5G 性價比真係高好多。003：性能不錯
紅米 Note 13 Pro+ 5G 配備咗 MTK 天璣 7200-Ultra 處理器，用上咗 4nm 制程，nm 數字愈細，代表手機就愈慳電，而且內置 12GB RAM 以及 512GB ROM，對於大部份用家嚟講，應該都相當夠用。而續航方面，紅米 Note 13 Pro+ 5G 內置 5000mAh 電池，支持 120W 快速充電，而我哋以前喺紅米 Note 11 Pro+ 5G 嘅年代，都曾經有測試過 120W 快速充電嘅威力，大約 21 分鐘就可以 2% 差到 100%，好誇張，當然叉得快都可能對電池壽命唔好，但趕時間嘅情況下，用嚟救命應急相當有用。
安兔兔評測。
GeekBench 6 成績。
3DMark 成績。
PCMark 成績。004：有 2 億像素相機，表現合格
2 億像素相機係紅米 Note 13 Pro+ 5G 嘅其中一個重要賣點之一，市場上擁有 2 億像素相機嘅手機選擇唔多，一係就賣到好似三星旗艦手機咁貴，定位同價位叫做比較差不多嘅對手，應該就係 Honor 90，但價錢上依然係紅米 Note 13 Pro+ 5G 更抵玩，以同樣 512GB 容量嚟講，Honor 90 開價 $3499，Note 13 Pro+ 5G 就平多佢 $500。至於相機成像表現如何呢？版主出去屋企附近海濱公園測試呢部手機嘅時候，時間係接近黃昏太陽落山，天色比較陰暗，但比日拍其實無意思，因為部部手機日拍表現都唔會太差，反而光線唔夠或者偏暗嘅環境下，先可以更見真章。紅米 Note 13 Pro+ 具有 2 億像素超清主鏡頭，支持 OIS 光學防震，另外還有一個 800 萬像素的超廣角鏡頭以及 200 萬像素微距鏡頭，前置鏡頭則為 1600 萬像素。而我覺得以呢個價位嘅手機嚟講，影相表現算係唔錯，夜晚影街燈唔會好似 iPhone 咁，會有眩光問題，而且在色準、細緻度方面都唔會太差。以下係更多呢部手機嘅成像，畀大家作個參考：
 |
 |
 |
 |
 |
 |
 |
 |
紅米 Note 13 Pro+ 5G 在文章發表時，香港建議零售價 $2999，按這裡有詳細規格及最新賣價。
