$800 有找都玩到 Gemini AI + 6000 大電 ! 小米推出 REDMI A7 Pro！市場同價有無對手？

左定坤 (Cho Ting Kwan) 2026-04-17 13:41 | 小米

小米今日宣佈喺香港發布 REDMI A Series 嘅第一款 Pro 型號手機 REDMI A7 Pro。呢部新機最震撼之處係建議零售價只需 HK$799，係目前香港市場絕無僅有「八百蚊有找」嘅新款手機。雖然係入門定位，但就引入咗大量 AI 功能。當然，6000mAH 大電池，都係實用賣點之一。

最平手機玩轉 Google Gemini AI

REDMI A7 Pro 最大賣點係支援多項先進嘅 Google Gemini AI 功能。用家可以透過 Nano Banana 功能直接生成圖片，亦可以用 Gemini Live 同 AI 進行即時對話，就好似有個私人助理喺身邊咁。另外，廣受好評嘅「一圈即搜」 (Circle to Search) ，都係呢部 800 蚊有找嘅手機用得到。最近 Ciricle to Search 亦整合咗 Google Search AI Mode，用家可以直接圈住幅圖問 AI 問題，搜尋資訊更加直觀方便。官方更承諾提供長達 48 個月嘅系統更新支援，確保手機可以長時間保持安全同順暢。Siri。

特大沉浸式屏幕同超強續航力

屏幕同電量亦係呢部機嘅強項。小米 REDMI A7 Pro 配備咗 6.9 吋嘅超大屏幕，支援 120Hz 更新率同 800nits 峰值亮度，就算喺室外陽光下睇芒都一樣咁清晰。部機仲有濕手觸控技術 2.0 同三重 TÜV Rheinland 護眼認證。電量方面，內置咗 6000mAh 超大電池，充一次電可以用超過兩日，足以應付長途旅行或者追劇需求。官方話電池經過 1,000 次循環充電之後仲可以保持 80% 以上容量，非常耐用。

REDMI A7 Pro_6000mAh Battery.png

效能與網絡注意事項

喺性能配置方面，用家需要留意 REDMI A7 Pro 採用嘅係 Unisoc 處理器。雖然足以應付日常基本文書、通訊同社交媒體應用，但整體效能表現相對較弱，唔太適合玩大型 3D 遊戲。另外，要特別注意呢部機係一部 4G 手機，並唔支援 5G 網絡。儲存空間採用 UFS 2.2 高速規格，雖然跟機只有 4GB + 64GB 但都可以透過調配記憶體，把 RAM 增至 8GB，有助提升系統嘅反應速度。但 REDMI A7 Pro 不設外置記憶卡支援。

相機表現同日常實用功能

相機方面，REDMI A7 Pro 用咗 1,300 萬像素嘅 AI 雙鏡頭，進光量升咗 13%，配合 HDR+ 同夜景模式，影出嚟嘅相更加明亮。前置鏡頭就有 800 萬像素兼有埋美顏功能。部機仲保留咗好多實用設計，包括 200% 音量提升、3.5mm 耳機窿、側邊指紋解鎖同埋 NFC 功能，生活機能非常齊全。

市場比較：HK$800 以下唯一新機選擇

版主比較過，香港各大連鎖店去搵 HK$600 至 HK$1000 價位嘅新款 4G 智能手機（淨機價，無合約），基本上只有 REDMI A7 Pro 一部符合要求，不過，由於這款手機只是 4G 手機，若果要用到 5G 網絡，就要考慮 HONOR X6d 5G，但賣價都要過一千的 HK$1199。

分區列表