現客直減兼狂送七百蚊大禮
其實單睇相機規格，vivo V70 確實有一定吸引力，蔡司鏡頭用嚟影中環霓虹燈海或者銅鑼灣鬧市，的確可以拍出有質素嘅電影感。但係去到四千中呢個價位，今時今日仲只係得 256GB 容量，真係幾趕客。正因為定價離地，開賣即刻要大搞促銷。首先，CMHK 現有客戶根本唔使捱 $4,398 嘅原價，直接享有 $3,798 嘅現客優惠價，未出門口已經自己劈六百蚊。為咗再增加吸引力，買機仲送總值超過七百蚊嘅超筍禮物，包括價值 $299 嘅磁吸機殼及鏡面支架套裝，同埋價值 $438 嘅 Verbatim 10000mAh 雙 Type-C 連 LED 螢幕流動充電池。將機價折扣同埋呢堆禮物加埋一齊，變相一開賣就劈咗超過一千蚊。
拆解千四蚊出機之謎
除咗現客減價，CMHK 仲有一個極具噱頭嘅「$1,398 上台優惠價」。想用千四蚊有找價錢出機，首先你要係新號碼上台或者攜號轉台，然後要申請一個 5G 本地手機券優惠組合。真實玩法係，你要一次過真金白銀繳付 $4,980、$5,480 或者高達 $5,980 嘅預繳總額，去綁死一個 24 個月嘅 5G 服務計劃。畀咗呢大筆錢之後，網絡商先會送 $3,000 手機獎賞畀你扣減原價。你又覺得咁樣出機，又係唔係抵玩方法呢？