OnePlus 5 評測:說好的執著呢?

EriChan | Oneplus
以「Never Settle」為口號,喺智能手機市場以一石激起千重浪嘅 OnePlus,總算推出旗下第四代旗艦作 OnePlus 5(嘛... 跳過 4 嘅老套命名做法,果然係中國公司)。一間手機公司能夠成長至今,其實已經跳出左新創公司嘅標籤,需要正正經經搵到長遠發展嘅方向。所以喺理論上,呢一部 OnePlus 5 應該可以俾到我地少少提示嘅。所以呢篇嘅文會係側重「評」多於「測」,有需要嘅朋友可以配合阿坤嘅另一篇文去睇㗎!

1200px.jpg

 

外型設計 + 硬件


DSC01068_web.jpg

其實眾所週知,就係 OnePlus 同 Oppo 兩間公司有著千絲萬縷嘅關係,去到呢一部 OnePlus 5 就更加體會到,因為成體機嘅外型設計就同 Oppo R11 非常相似!好啦,其實近年陸牌手機都係用緊相類似嘅公模設計,咁呢個位置就交返俾大家各自表述啦。不過雖然話個樣已經冇左頭兩代嘅品牌特色,但好彩嘅係 OnePlus 5 嘅真機造工都非常唔錯,以只有 7.25mm 機身厚度,配合俐落線條嘅金屬機身,以機論機黎講就真係冇乜好投訴。非常適合低調咁當普通一部手機用,喺街都唔會俾人咁易認得出你用緊乜機咁囉... (ching,你部機巧熟面口,但又講5出係乜)。

硬件一如既往地係 OnePlus 嘅強項,因為佢地目前都仲係小數喺歐美市場以超低定價出售超高規格手機嘅品牌,但當然喺香港呢個咁高競爭嘅市場,呢個只係一個噱頭。送測嘅 OnePlus 5 係 8GB RAM + 128GB 儲存空間版本,香港定價 HK$4,188。說真的,補多一千幾百就可以買到其他傳統品牌嘅當代旗艦,所以 OnePlus 5 喺香港嘅競爭力唔算真係好高,何必要咁執著非 OnePlus 不可?

講左咁耐,好似彈到部機一無是處?其實作為普通香港消費者又真係㗎... 不過,OnePlus 嘅目標客人「應該」係同佢地一樣,有著「Nevet Settle」精神嘅玩機發燒友,因為只有呢班人先會真正會因為 S835 處理器 + 8GB LPDDR4X 嘅組合動心。因為呢兩樣野就代表左 OnePlus 5 喺智能手機市場上舉世無雙嘅獨有地位,亦係呢部手機嘅真正價值。當然呢兩個代號亦只係數字,使用體驗上可以話係無感,所以只有睇跑分成績先會知道有幾勁。

DSC01072_web.jpg

得閒有睇下手機新聞嘅大家,一定會知道有部分 OnePlus 5 出現「啫喱螢幕」問題」,即係喺垂直滑動螢幕嘅時候,畫面會好似啫喱咁有輕微拉長回彈嘅「特殊效果」。都唔知好彩定唔好彩,送測嘅呢部機係中左招!呢個問題尤其喺慢速碌 Facebook 嘅時候影響最大,因為 FB嘅使用方式剛好係就垂直、慢速捲動。但如果你問我,呢個問題嚴重咩?咁其實又唔會直接影響到使用,純綷係有不和諧感,用落有少少奇怪咁囉。

軟件 + 使用體驗

DSC01075_web.jpg

OnePlus 雖然喺硬件部分開始有「settle」,但軟件依然仲係「始終如一」地爽快!當然可以歸功於 8GB RAM 嘅高規格,不過本身系統只有好少嘅預載軟件或者花巧功能亦係一個好重要嘅因素。

介面上,OnePlus 5 所以嘅 Oxygen OS 係借左 Pixel Launcher 嘅設計,再保留自家嘅小工具頁(正式名稱係儲櫃),整個使用方式都係可以靠向上(開 app launcher)、下(開快速通知頁)、左、右掃動而去到自己想用嘅頁面,而且仲有長按 app 圖示彈出功能捷徑嘅用法。配合埋一直沿用至今嘅雙擊喚醒、翻轉靜音之類嘅手勢操作,OnePlus 5 嘅使用方式係非常直覺,幾乎冇額外學習成本,拎到上手就識用。而現今好多手機廠都會有嘅「遊戲免打擾」、「夜間模式」,甚至 aptxHD 高音質藍牙傳輸嘅功能都有加入,所以用應有盡有去形容 OnePlus 5 其實都唔算過份。

只係如果你問到部機有咩獨有功能?呃... 嗯... 獨家村嘅 DASH Charge 快速充電囉!?不過要專用嘅 5V/4A 火牛先有,而且叉得快又唔代表粒電嘅續航力夠高,因為 OnePlus 5 嘅電池只係得 3,300mAh,一日其實唔多夠用... 

不過有一個位係擺明要罵嘅!就係 Oxygen OS 嘅繁體化工作唔夠仔細,喺設定頁裡面有好某幾個字都仲係簡體中文... 咁唔小心啊...
 

相機


DSC01071_web.jpg

OnePlus 5 嘅最主要賣點其實係佢嘅相機,連包裝盒上面都寫明「Dual Camera. Clearer Photos.」就規格而言,IMX 398 廣角鏡 + IMX350 標準鏡嘅雙相機組合其實並唔算吸引,像素尺寸只有 IMX 398 係稍稍大嘅 1.12µm;IMX 350 更只係 1.0µm,所以相片質素都會唔可能過高期望。幸好就係軟件方面,OnePlus 5 嘅整體拍攝體驗都係爽快嘅,只係 HDR 相片會有明顯嘅處理過程,但都唔會影響相機嘅操作。只係昏暗環境下嘅相機表現,真係只能用強差人意去形容,因為像素尺寸細,相機要用更多時間吸取足夠光線(亦即係慢快門時間),所以手震、噪點、雜訊、油畫化等等等嘅問題都有適當地反映喺成像上面...

IMG_20170713_194103_web.jpg
▲食物近拍:中央部份銳利清晰,但周邊鬆郁濛兼起渣...

IMG_20170718_151648_web.jpg
▲超高光差:咁極端嘅情況嘅成像又接受到喎!

IMG_20170713_132838_web.jpg
▲昏暗處近拍:中央夠光、夠清、顏色偏淡,但周邊起晒渣...

IMG_20170711_084448_web.jpg
▲自動 HDR:吓?HDR 咗?

IMG_20170711_185515_web.jpg
▲自動 HDR 效果:效果有改善,但暗位(下方嘅樹)仲係略嫌推得唔夠光。

zoom
▲變焦效果,人有我又有咁囉。

 

總結


DSC01077_web.jpg

OnePlus 曾經代表住智能手機界嘅清泉,以獨有嘅創新同特色去影響整個市場。但一路走來,當初所叫喊嘅「Never Settle」精神,其實都已經被磨滅唔少,自上代 OnePlus 3 嘅公模設計就初見端倪。去到 OnePlus 5 就更加係變到毫無反抗嘅另一部「公模手機」,當初嘅執著就好似盪然無存一樣。如果 OnePlus 係不甘心於只為小眾人而欣賞,想要打入大眾市場的話,寧願再加入更多花巧噱頭,正面挑戰傳統品牌,無謂搞到今日嘅半上不下。
廣告