HONOR Robot Phone 8 月搶灘香港！手機鏡頭識彈出兼會跳舞？
左定坤 (Cho Ting Kwan)
2026-08-06 15:52
|
Honor
諗都諗唔到，手機竟然可以變身成為機械人？ HONOR 最近喺香港 Facebook 官方專頁預告，全新旗艦機 HONOR Robot Phone 確定會喺 8 月正式喺香港登場！官方仲大字標題話要「顛覆業界標準，突破手機設計極限」。呢部號稱係「全球首款機械人手機」嘅神級新機，背後到底有乜嘢令到一眾手機迷「流晒口水」嘅黑科技？即刻同大家拆解！
隱藏式 4DoF 機械臂雲台：鏡頭會彈出嚟追住你拍
講到 HONOR Robot Phone 最爆嘅賣點，肯定係佢個前無古人嘅鏡頭設計。平時睇落同一般旗艦手機無異，但只要一開相機或者啟動 AI 功能，裡面個 4DoF（4 自由度）機械雲台就會自動彈出嚟。
呢個由 HONOR 團隊自主研發嘅微型機械臂，唔單止可以左右上下旋轉，仲可以做到 360 度無死角 Smart tracking。以後自己一個出街拍 Vlog 根本唔使再帶手持雲台，部手機自然會眼觀四方追住你個樣嚟影！
Embodied AI 具身智能：識跳舞又識配合音樂拍拍手
如果你以為佢只係個識伸縮嘅鏡頭，咁就太小看佢啦！ HONOR Robot Phone 注入咗全新嘅 Embodied AI（具身智能）技術，配合 YOYO 大模型，令部手機直接賦予靈魂。
當你播歌嗰陣，個鏡頭雲台會跟住音樂拍子「Dance To The Beat」打拍子跳舞；平時同佢講嘢或者拍影片通話，佢仲會透過鏡頭嘅點頭、扭頭等肢體語言同你互動。真係好睇又好玩，完全打破咗傳統手機冰冰冷冷嘅印象！
CIPA 5.5 級數防震：影相拍片唔怕手震
對於平時鍾意影相拍片嘅朋友嚟講，防震絕對係重中之重。 HONOR Robot Phone 嘅機械雲台自帶 3 軸物理防震，防震能力達到 CIPA 5.5 級數，就算一路跑步一路拍片，畫面依然穩定，加上鏡頭規格超 OK，擁有 200MP 主鏡頭、 200MP 潛望式長焦鏡頭同 50MP 超廣角鏡頭，仲支援 ARRI 電影級調色!
Snapdragon 頂級效能加超大電池：續航力打爆機
要推動咁複雜嘅機械馬達同 AI 運算，粒心臟一定要夠強大。 HONOR Robot Phone 採用咗高通最強嘅 Snapdragon 8 Elite Gen 5 晶片，部機配備咗高達 6000mAh 至 7060mAh 嘅超大容量電池，仲支援 120W 極速快充，就算玩足一整天都完全唔使驚電量告急。 HONOR 香港已經預告 8 月會喺香港發售，大家會搶嚟玩嗎？
