主題:連 YK 都中伏:香港 Lenovo ThinkCentre 地獄式售後全記錄

  • 發表時間:2019-11-04 21:01 收錄檢舉
    嘩嘩,見到個標題又係大災難。 上一次見到呢類文章係本年初,主角係 Lenovo 的 Think 產品(詳情可以見這裡)。 今次又係 Lenovo,不過今次中伏的主角係本 YK 呀! 我估睇完下文的每一個網友,心裡都會覺得原來香港 Lenovo 商用機 Think 系列的售後服務係如此神奇、頂級、超卓、世界級 ~

    連 YK 都中伏:香港 Lenovo ThinkCentre 地獄式售後全記錄

    以下是本 YK 的第一身哭訴文:
    事情係始於年初,哪怕見到有網友中伏過買了 ThinkCentre 商用系列的迷你主機,但後來見到該名網友又無再反映有乜特別問題,所以趁著父親節入手一部 ThinkCentre M720q 自訂配置版。 做了孝子的本 YK 獲得老父的歡心,佢日日可以開心地睇動作大片。遺憾的是,早幾個星期佢開住部 ThinkCentre 就去瞓覺,但佢訓醒後部機都未醒,結果係一睡不起。

    連 YK 都中伏:香港 Lenovo ThinkCentre 地獄式售後全記錄
    ▲ 網絡圖片:圖中右邊的機型就是 ThinkCentre 的迷你機系列。

    10月17日 - 待機突然死亡
    本 YK 過去診斷下發現,真係開唔到機,一路卡住係藍芒畫面,然後自己會熄機;再開多幾次連呢個畫面都入唔到,只係有嘈吵的金屬刮聲(可能係風扇 / 機械硬碟)。 在我多翻質問下,家父承認佢無關機走去瞓覺,連個 MOOON 都無熄到(明顯唔關事 ~)。 我第二日早上在香港 Lenovo 辦公時間致電 Think 系列的專用維修分線,打上去個 CS 接線生建議我週末出去搞搞資料備份 ,週一再打電話預約上門維修。 

    10月18日 - 預約上門維修 
    聰明的本 YK 當然搞都費事搞,說服家父放棄資料,週一再打熱線結果週三師傅成功上門,仲光速搞好左話 OK 走人。 本 YK 當日深感自豪,自覺有先見之明選擇了『上門維修的售後服務套餐』,沒想到這就打開了地獄之門,來回地獄又折返地獄。。。

    連 YK 都中伏:香港 Lenovo ThinkCentre 地獄式售後全記錄
    ▲ 送上當日的維修單; 本 YK 收工後自然過去打算幫老父安裝一堆軟件。

    10月23日 - 裝錯系統
    一開機就發現,原本應該是 Windows 10 家用版的系統,被裝成了 Windows 10 專業版! 唔熟悉的網友會以為執到寶、免費送專業版。但實情係 Windows 10 改了認證制度,原裝本身係買家用版,如果安裝左專業版係會當你部機係未正式啟動鑰匙。你想更改設定都唔比你改! 本 YK 第二日打上去售後專線,接線生係咁講唔好意思,我都只係瀟灑地一句:唔緊要,你叫師傅上黎裝翻好就得啦!

    連 YK 都中伏:香港 Lenovo ThinkCentre 地獄式售後全記錄
    ▲ 結果排到 NEXT 週一先有師傅上門,同樣光速安裝好個 Windows 系統。

    10月28日 - 無法完成自動安裝
    正當本 YK 食緊午餐時候家父打黎,我以為係佢叫我今晚記得幫佢安裝堆軟件,結果原來係出左一個無法安裝的畫面,家父仲 Whatsapp 左比 me 睇話師傅仔插個手指落去一陣就走左,叫佢等自動安裝,結果又出事!

    連 YK 都中伏:香港 Lenovo ThinkCentre 地獄式售後全記錄
    ▲ 本 YK 翌日打爆個熱線再問:到底你地 Lenovo 維修部搞乜春? 

    10月30日 - 收機檢查
    有 Lenovo 維修部的員工打黎話家用版原來無辦法用呢個方法安裝,安排唔到師傅上門;再過一陣就話,部電腦有問題要帶走翻廠檢查下,仲話要留下一個星期先搞掂; 我如實告知家父需要維修,佢聽到之後差少少就打算維修埋本 YK! 咁本 YK 都語重心長同 Lenovo 維修部員工說明事態嚴重,多次上門都搞唔掂,叫佢儘快派人上門收機。

    連 YK 都中伏:香港 Lenovo ThinkCentre 地獄式售後全記錄
    ▲ 隔日就有師傅上門,但為何係寫收 Notebook 呢? Anyway 佢搞得掂我就少理。

    連 YK 都中伏:香港 Lenovo ThinkCentre 地獄式售後全記錄
    ▲ 終於又一個 Monday,聽講維修好的主機仔會在下午送到,但原來部機週六已維修好。

    11月4日 - 又再一次裝錯系統 
    家父收到機,本 YK 自然又要光速飛過去幫佢安裝堆軟件,結果一打開設定:@#$%¥##@!#,天呀! 又係專業版!?  一部 Think 系列的商用產品線,提供的上門售後服務竟然係叫你係地獄跳出跳入,實在係世界級。

    連 YK 都中伏:香港 Lenovo ThinkCentre 地獄式售後全記錄
    ▲ 呢個就係聲稱安裝好的電腦中,再次顯示錯誤安裝 Windows 10 專業版的畫面。

    連 YK 都中伏:香港 Lenovo ThinkCentre 地獄式售後全記錄
    ▲ 偉大的 Microsoft 自然係叫你比多舊錢,買一條專業版的 KEY 升級上去啦。

    11月5日 - 再打熱線
    本 YK 在早上致電偉大的香港 Lenovo 技術支援熱線,睇下到時候有乜新說法。 接線生雖然不停講唔好意思,亦承諾明日會派師傅上門做好整個安裝、確保能啟動無誤後才離開。 本 YK 唯有接受呢個方案,但亦直接要求主管回覆我的投訴和解釋維修屢做屢錯的奇景。

    其後,聞說此投訴文驚動了香港 Lenovo 的客戶服務部,故對方於下午亦有專責同事致電跟進本案。 本 YK 亦長氣地描述和表達對如此匪夷所思的售後服務,確實令本人對其產品大失信心。 這位同事亦鄭重地作出誠懇的道歉,稱是次屬個別事件,她亦承諾會檢視內部維修流程出現了什麼問題。

    可惜,家父今日就無辦法用電腦睇世紀大戰,宜家就等明早師傅黎睇睇,希望可以搞掂~

    11月6日 - 努力多時終完好
    早上 10 點多,師傅準時上黎開工:重新安裝 Windows 10 Home 版,整個過程老父都睇住佢個安裝進度,師傅在安裝完後亦協助更新埋 BIOS 等軟件,在啟動好 Windows 10 Home 之後,確認部腦正常運作就離開了。

    連 YK 都中伏:香港 Lenovo ThinkCentre 地獄式售後全記錄
    ▲ 前後搞左三個小時,慢工出細活 ~ 

    事後香港 Lenovo 的維修部亦致電給身在遠方的我確認已維修好,並說明師傅在幾個小時中到底做了什麼工序。 最後,本 YK 身為孝子自然係狗衝翻去幫家父安裝一堆軟件,聽日家父又可以睇新聞、睇大片,王子與王子過著幸福快樂的日子,好似係 ~ 


    事發後第一感
    熟悉本 YK 的網友都會知道,我絕對係 Lenovo Think 系列(尤其是 Thinkpad X)多年來忠實的支持者,自己目前的主機亦是 ThinkCentre 迷你機。 過往無數朋友詢問該購買什麼電腦時,Lenovo 的 Think 系列總會有一兩個型號是我的推薦機之一,皆因我親身感受到其一貫優良的造工和體貼的售後服務。

    但隨著越來越多網友向我投訴(包括商用級 Think 系列的產品),而我亦親身感受到號稱「專業」的售後服務後。 試想想,如果你買了電腦,而電腦出問題需要維修:上門維修你要有人平日可以現身,或者你要親身在辦公時間過九龍,但換來的卻是三番四次「被維修」,哪怕我唔覺得煩,網友睇住我上門堆字都覺得煩啦! 

    如果繼續推薦比網友用,分分鐘會有網友因而壞電腦而走黎伏擊本 YK 啊~ 所以,本 YK 正式宣佈,暫時不再建議網友購買任何香港的 Lenovo 電腦產品。


    更新:後記
    正所謂「愛之深責之切」Think 字頭的經典除了造工和品質之外,更重要的是售後服務。 本 YK 很高興見到香港 Lenovo 能在文章刊登後快速反應過來,正面回應消費者的訴求。當然,我希望官方並非單單因為文章刊登的緣故而主動作出一次性的調查,更重要是希望能藉此不幸的事件正視問題,把產品做得更好、把服務做得更完善,更貼近消費者期望。

    好了,事件正式告一段落,歡迎網友繼續收睇 ePriceHK 的其他文章,多謝 ~ 

    立即加入Facebook 專頁,新聞/消息/優惠,最快知。

    01樓 ▲TOP 回列表頁