呢兩間公司都推本地口罩!新世界+維特健靈

Keith Yim 2020-02-29 01:14 | 科技新知
香港本土口罩,係呢幾個星期最多人講嘅新興香港工業。大家都知有一間叫口罩工廠,某工會嗰間叫口罩工場,當然仲有王維基嘅 HKTVmall。原來仲有兩個後來者:「新世界發展」仲有本地藥廠「維特健靈」,即係賣靈芝藥丸嗰間。想知道係點,一齊睇睇。

nwt02-fb.jpg

新世界開口罩廠

新世界發展喺 2 月 28 日宣佈會斥資千萬港元研發低成本殺菌口罩。新世界表示透過集團慈善基金喺香港港設立兩條生產線,日產二十萬個「香港製造」外科口罩。佢哋跟本地創科公司 Master Dynamic Limited (MD)合作,研發採用「納米鑽石」專利技術提高口罩物料嘅防護性能, 目標是生產出能導致細菌及病毒加速死亡嘅外科口罩。

MD 公司本來有幫新世界集團旗下嘅周大福珠寶,研發喺鑽石表面應用嘅納米印記技術 (T MARK),以及係金飾表面應用納米抗菌塗層技術,並取得多項發明專利。MD 係研究過程中發現,納米鑽石塗層具高抗菌特性,可以阻擋及抑制細菌、病毒生長。佢哋正研究將有關技術轉移到製造口罩物料上,提高防護性能,在維持外科口高透氣和防水的特性之餘,能高效阻擋、抑制甚至殺死細菌及病毒。佢哋預計四個月內會有初步結果。

新世界集團慈善基金已訂購咗兩部自動化生產口罩機器跟原材料,以及製造成人跟兒童口罩所需嘅模板,並喺香港興建無塵廠房,預備生產符合 ASTM 標準 Level 1 或以上嘅 「香港製造」外科口罩,目標是在今年四月正式投產。每條生產線每日產量預計達十萬個口罩。

01.jpg
▲ 新世界將會用 NanoDiamond 技術生產口罩。

靈芝藥廠都做口罩

另一間會加入做香港本土口罩係一間叫「維特健靈」。呢間經常係 TVB 賣五色靈芝藥品廣告嘅本地藥廠,今次加入做口罩行列。據佢哋嘅新聞發佈指出,佢哋喺生產工場、機器設備、物料採購、人手管理等各方面都作好安排。初步估計共可生產約 3 百萬個口罩,首批預計可於 3 月中推出。呢次計劃生產嘅口罩只會作捐贈之用或以成本價發售,不作任何牟利用途。不過,根據有線財經報導,佢哋預計一個口罩唔會貴過 HK$8,而生產口罩都唔會成為佢哋嘅長期投資,只會係有疫情時才生產。

技術方面,維特健靈會跟本港生產及研發空氣過濾專利物料 MultiH 嘅廠商 Focus 合作,用佢哋嘅納米纖維物料 (Nanofiber) 生產口罩。佢哋預計納米纖維殺菌防毒口罩可達美國材料和試驗協會(ASTM)F2100 指標的第一級防護級別,即其細菌過濾效率(BFE)達 95% 或以上。

留意嘅係,維特健靈合作商 FOCUS 同時係早前化學博士 K Kwong 研發嘅布口罩樣式 HK Mask 指定過濾層供應商,使用技術,同樣是 nanofiber 。K Kwong 更說三月中起,FOCUS 會提供二百萬塊 nanofiber  過濾層。

02.JPG
▲ 維特健靈口罩嘅樣板。

又多間做香港口罩,唔知大家仲會唔會係呢刻去搶口罩呢?
 

最新新聞