主題:【含劇透】點樣理解? 爛片或神作? 到底《TENET 天能》講緊乜?

  • 發表時間:2020-09-13 00:10
    已經算遲買飛入場睇呢部 Nolan 新作《 TENET 天能》,離場時候如果你聽到有人問一大堆「點解乜乜?」其實姐係未睇得明白套電影。 如果你唔係擁有基本物理認知的觀眾,要你睇呢套電影的結局可能就只係一套動作好睇的諜戰片。 又話同時光倒流有關? 到底成套戲的時間線係點?  以下的分享含有劇透,正確黎講係建議你睇完套野再黎閱讀,然後再入場睇多次~

     爛片或神作  到底《TENET 天能》講緊乜

    Nolan 呢套電影的脈絡唔複雜,而且非常簡單:是一個英雄救美的故事。但堪稱神作的是電影對「時間」呢個抽象觀念的表達,而且係透過電影畫面黎呈現出時間係線性的觀念。當然,電影裡面的所謂物理概念並不正確,但擁有佢自身一套的設定: 用「Entropy 熵」這個名詞來延伸出時空向前,或者向後推演。 過往不少電影所演繹的時空旅行是透過一個媒介,例如時光機,人進入時光機就自動從一個時間點,跳到另一個時間點,就像經典電影《回到未來》一樣,部車就係媒介,一上去一出發就到達你想回到的時間點。 

    但在 Nolan 這套《TENET 天能》的演繹卻不是這種即時「點跳點」,而係好似以前卡式錄影帶咁,正常係磁帶向前播放,而進入時光逆轉機後出來就是按下回帶播放,在 Nolan 的角度睇時間線上其實只有「Forward」和「Reverse」兩個按鈕。也就是說,當主角進入一個樣子非常簡陋的雙柱體迴轉站,這兩個圓柱體你細心看會覺得好似卡式錄音帶咁,一邊軸心向左轉時,另一個軸心就向右轉,寓意當人進去雙柱體迴轉站時,離開 Forward 的順時間世界進去 Reverse 的倒帶世界。 但其實咁樣講都唔正確,這個雙柱體迴轉站其實並沒有把世界倒帶,只是把你倒帶。 而倒帶和前進是相對概念,試想像下你坐火車睇窗外風景,你知道自己係前進緊,相對風景就係倒退中。在 Nolan 的設定中,雙柱體迴轉站的作用,就是讓進去的人,可以用倒帶方式回到過去,而一路處於回到過去狀態的人,他的行為將會係調轉,但從佢視覺睇出去,反而係其他人逆轉行緊路。 電影一開始就用一個簡單例子告訴大家,子彈正常係射出黎,但 Reverse 狀態子彈是被槍接翻住。

    當然,電影始終係電影,拍攝細節和執行上自然永遠都會有不完美、講不通的遺憾。當然,電影提到的時光旅行相關的論述例如「Grandfather Paradox」,Nolan 這部電影亦無提供一個合理的解答。 梗係解答唔到喇,畢竟只係一套電影。但《TENET 天能》中用正向、反向動作黎表達時間前進和後退的狀態,對觀眾而言係非常新鮮,而且拍攝難度係相當高,尤其是最後一個大混戰場景,一個利用時間線相反玩聯合攻擊行動。 而電影真正做到「難以用筆墨來形容」,皆因劇情的鋪排、畫面前後的配合,以及各種伏筆的安排,看得懂的觀眾包括我應該會有一陣暖流傳遍全身! 

    男主角無名無姓,無人叫過佢個全名,佢自稱自己叫「主角」。到了最後先會知道原因。 到底一開始歌劇院戰鬥中係邊個救佢,搞到最後原來係自己曾經懷疑過的、一開始突然出現的「GAY 友」尼爾,而呢個好 GAY 友被暗示其實係來自未來一直幫助佢。 點解幫助佢? 因為未來的佢叫佢黎幫助佢囉! 係咪好混亂呢?

    「X 你黐線 Nolan 咁都得?」呢個係我睇完的感想,同上一次《Dunkirk》用藝術風的手法黎展現戰爭中細微的人類行為截然不同。 普通人進場看《TENET 天能》亦可以獲得官能上的滿足,炸黎炸去、打黎打去、逆轉時間的動作場景設計相當新鮮,但看不懂的人會帶住一堆問題離場。其中最多觀眾講的係女主角最後跳海離開的一幕,被以為是吻合電影前段的自白。但其實從時間線上看,那個跳水女人並不是同一個女主角,但女主角最想獲得的自由,在最後巧合地獲得,並巧合地與佢曾經羨慕的跳水女人一致。你唔明白我講乜係好正常,入去睇的時候記得留意就知道。

    好多影評都會嘗試用物理學的認知角度走去批判呢套《 TENET 天能》,話裡面好多 BUGS 好多物理邏輯無解釋。 大佬,呢套野唔係教育電視、唔係 Discovery Channel 科學頻道呀!  從電影拍攝的角度來看,逆轉時間的玩法算新奇,而且係用動作逆轉來表達時間逆轉的過程。 單係睇呢個拍攝手法已經值回票價,唔好唔記得呢個黐線「佬爛」最愛用乜機黎拍片啊:黐線佬中意 IMAX 菲林,而呢套野全程無用過「綠幕」搞後製,大玩實景爆炸實景飛車黎,而 CG 特效鏡頭都只係得幾百個都無。點樣拍出倒帶效果? 自己走去修改底片盒同改電路囉! 絕對係名副其實的黐線佬,呢種執著宜家無幾多個導演係咁。

    總結而言,雖然「英雄救美拯救世界」老套平庸成缺憾,但從拍攝技術和故事演繹上《TENET 天能》絕對可以成為今年的神作。 題外話,主角 John David Washington 電影造型真係好似 NBA 火箭球星 James Harden 啊! 成套戲我都以為係 Harden 係度做緊。

    立即加入Facebook 專頁,新聞/消息/優惠,最快知。

    01樓 ▲TOP 回列表頁