首發開箱
首先講個售價先，香港官方的建議零售價係 Ryzen 5 3500U 版賣 6990 元，而 Ryzen 7 3700U 版賣 7990元，兩者相差 1000 蚊，其實就只係處理器（+ GPU） 差異，其他規格一模一樣的。 而過往經驗話比大家聽，一般文書、玩小遊戲的話，3500U 和 3700U 分別不大。 所以，是否攻頂買 7990 元的 Ryzen 7 版就見仁見智。
▲ 首先當然有個箱啦，外面乜字都無，非常平實的包裝。
▲ 盒身當然會列出你所購入的版本係乜規格，本 YK 手上的是 Ryzen 5 版。
▲ 最重要係封條，在紙盒開口位會貼上完整的封條，買機時可以更容易知道是否有被開過盒的風險。
▲ 正呀！ 原裝盒內係有送一個電腦袋套，而充電火牛、機體、說明書等等亦自然包括在內。
▲ 原廠送的電腦套，看起來是一個普通套，其實係袋 + 套兩用的模式，造工相當好。
▲ 暗格內抽出兩個手帶，就變成手提袋模式。
▲ 講明係原廠袋，亦送上一塊銘牌寫上「For VAIO Premium」，整體質感提高不少。
▲ 一個電腦套睇外觀無意義，重點係內層的用料和保護性是否足夠； 內層是絨面質材，能夠更好地保護筆電外殼不輕易刮花，而附送的肩帶亦可以將電腦袋變成斜揹袋模式，一袋三用相當使用。
▲ 原裝火牛是最大路的設計，並沒有用上最近幾年 Ultrabook 大熱的 USB-C 接口。
▲ 火牛只有單一的 19V/2.1A 輸出模式，不支持快速充電制式。
▲ 你係咪第一眼睇到以為呢個就係機身本體？ 哈哈。
▲ 其實係一個包括機體的內盒，裡面亦有不織布包裹好，VAIO 存留日系細心的文化真係好特別。
機身外觀
一款 15.6 吋屏幕的 Desktop Replacement 筆電，VAIO E15 重量只有 1.77 公斤，而比較特別是採用 AMD Ryzen 處理器。 更重要是對比市場上其他同類定位的筆電，性能和價格的組合相當平衡，工作又得、玩遊戲又得，而且 VAIO E15 具備獨特的日系設計，係本 YK 玩機的時候，隔離位靚女都問邊度有得買，嘻嘻。
▲ 銀白色頂蓋真係好靚，是一貫 VAIO 的配色風格；還記得 N 年前舊代的 E15 又厚又重，新機線條菱角更凸出。
▲ 不變係 VAIO 依然保持鏡面住呢個「VAIO」標誌。
▲ 機背設計相當公整，大量散熱屢空，螺絲亦清晰可見，明顯是方便進行快速維修的設計。
▲ 背蓋並非單純雕空，裡面可以看到暗藏蜂巢式加固板，能夠保持空氣流動之外，亦提高更堅固的機體架構。
▲ 左右轉軸部分均有厚實的防滑膠。
▲ 機身底部左右方，各有一個 1W 功率的喇叭；而喇叭附近亦設有防滑膠，組成的防滑能力相當不錯，但有個注意事項，稍後再講。
▲ 機身右側分別有 HDMI 輸出、USB-C、USB-A 和充電接口。
▲ 機身左側分別有保安鎖匙孔、USB-A、3.5mm 耳機孔和 microSD 讀卡器。
▲ 機身後方有散熱出口，但散熱位卻不是背後。
▲ 需要留意轉軸後方左右各有一個半透明的膠粒，而這個膠粒作用是揭開屏幕後，作為機身和檯面的支撐點。
▲ VAIO E15 採用下沉式轉軸方案，也就說，機身底部的防滑膠只有其中兩個起作用；這種方案的好處是，鍵盤形成自然傾斜角度打字時會更加舒服。
▲ 值得一讚是底部貼紙有香港、澳門、新加坡、馬來西亞四地的售後服務熱線； 呢個做法同以前商務機一樣，但希望各位唔需要打呢個電話啦 ~
內部佈局
▲ 本 YK 手上的是銀白型號，細心的你可能會發現，色彩是銀、黑、銀、黑交錯，十足商務機的設計風格。
▲ 孤島式按鍵間距相當明確，適應大約數十分鐘就輕鬆上手。
▲ 對比現在流行的「超大型觸控板」，VAIO E15 觸控板面積不算大； 但比較好的是保留左右實體按鍵的設計，而且觸控板亦不設下壓機關，從觸控板壽命角度來看是好事。
▲ 上面提到散熱風扇出口不是在機身後方，原因是屏幕打開後，下沉式轉軸的出風口會變成對住屏幕噴熱風，情況跟蘋果電腦一樣，令人關注和擔憂會否跟 Macbook 一樣出現屏幕底部有熱印的問題（但 VAIO 想到了一個辦法來解決，後面再補充）。
▲ 機身內貼紙自然是本機主角 AMD Ryzen 5 處理器。
▲ 買得 15.6 吋屏幕的筆電，大家都係想要個 Numpad 數字鍵盤咋！ VAIO E15 比到「九宮格」大家，但（我估係）為了保留工整的鍵盤佈局，部分按鍵位置都稍有更改，比較難以適應係「+」 和「Enter」鍵。
▲ 而 VAIO 系列標誌性的綠燈亦係 E15 身上獲得保留。
▲ 仲要係充電都有燈呀！ 宜家好多電腦都唔知做乜取消左。
▲ 多段式背光鍵盤係標準配備黎，VAIO E15 自然都有，亮度亦相當高。
▲ 這塊 15.6 吋 FHD IPS 屏幕深得本 YK 喜愛，原因是防眩設計，邊框亦窄身，最正係：磨砂面，一般室內複雜光線狀態下，只有磨砂面能夠抵消複雜光源所產生的炫光，令你眼睛睇得相當舒服，亦係一貫商務機應有的標準配備。
▲ 屏幕頂部亦設有緩衝用軟膠，邊框真係好窄，但窄得黎又保持到一定的穩固度。
▲ 遺憾係，視像會議用鏡頭只有 100 萬像素，亦無近年流行的物理屏蔽開關的功能。
各項性能測試
規格一覽
▲ 手上這部 VAIO E15 採用的是 AMD Ryzen 5 3500U，屬於 Mobile 專用的省電版； 但比較可惜是，雖然同屬 AMD Ryzen 系列，但 3500U 其實是 2019 年的產物，4 核 8 線程的設計，用 12nm 制程工藝製成； 是 AMD 銳意攻入筆電市場的處理器產品。
▲ L3 cache 達到 4MB，而 BIOS 亦理所當然交給了 AMI 負責。
▲ 需要注意的是，AMD 核顯需要分享 RAM 的容量； 一般文書用途的話，雙通道 8GB 還算足夠，如果要剪片、打大作之類就要另作考慮。
▲ 唔好睇少 AMD 的核顯，在過往經驗中，同等級情況的處理器性能與 Intel 不相伯仲，但 GPU 核顯實力超越 Intel 不少，後面會有實測；留意，如果是 Ryzen 7 3700U 版，配備更強的 Vegas 10 核顯單元。
開機速度
▲ 開機只需要 9 秒就完成系統啟動，再19 秒就進入其他應用進入桌面；如果再加埋預載的軟件，也只是額外再多 10 秒左右，速度算快。
綜合性能
▲ 在 Novabench 綜合性能測試中，VAIO E15 獲得 1472 分。
SSD 測試
▲ 採用 WD 的 NVMe 固態硬碟， 測試時顯示溫度的攝氏 57 度。
▲ 在連續讀寫結果中，VAIO E15 獲得 2476mB/s 和 1836mB/s 的成績；而多工隨機讀寫 （4K Q32T1）卻只有 240mB/s 和 166mB/s 的速度，意味住存取大量而零散的檔案時，VAIO E15 的速度會明顯比較慢，但日常使用上，速度跟其他主流 SSD 表現差不多。
CPU 處理器性能
▲ 在 CINEBENCH R20 版測試中（係呀，R23 唔普及 + 無可比性，所以暫時都係繼續用 R20 先），VAIO E15 的 Ryzen 5 3500U 多核心獲得 1195 分；而在單核心方面得分有 225 分；MR Ratio 係 5.31倍，因為單核心偏弱，多核心性能足以跟 Intel i5 八代、10 代睇齊！
GPU 圖像處理性能
▲ 來到 GPU 測試，在 BasemarkGPU 標準測試的 4K Vulkan 1.0 測試中得到 603 分。
▲ 在 DirectX 12 測試中獲得 632 分；大幅度拋離 Intel 8 代和 10 代的核顯單元，領先接近一倍。
電力續航測試
▲ 電池採自廣東力科，而官網聲稱達 8 小時的續航力，但見唔到網站列明幾多 Wh 數值，軟件檢測到只有 37.24Wh；15.6 吋屏幕的機型中不算多，但如作為 Desktop Replacement 的話，續航力反而不太重要，但本 YK 依然會進行續航力測試。
▲ 利用 Imtec Battery Mark 軟件，在飛行模式下將處理器燒到全開狀態，屏幕亮度調整至最暗進行測試，只能跑出 2 小時 06 分的續航結果，呢個成績可以話係相當差。
▲ 再將 VAIO E15 放係 WiFi 隔離唔超過 1 米距離，利用 Chrome 做播放指定的 720p 解析度 Youtube 影片；開啟省電模式，屏幕調整到最暗下播放影片，觀測一小時播放後的耗電量。
▲ 過了 60 分鐘後消耗了 17% 電量；由此推算，充滿電係可以睇片 5 個多小時。
AMD 的特別
如果你買 Ryzen 處理器的產品，特別是 APU （含有內顯的產品），筆電都會內建一套軟件，讓你可以調整 GPU 的參數，例如畫質、性能、顯示屏之類等。 如果從未用過 AMD 的網友，可以參考一下下方的截圖。 而調整 GPU 參數對遊戲的畫質和表現會有截然不同的效果，當然啦，有部分功能，例如調整 HDMI 輸入需要配合額外硬件。 呢個就大家自己慢慢玩喇。
結論：遲來的好機
相信好多網友見到呢部 VAIO E15 都會同我有一樣的感覺：做乜咁遲出呀！ 事關 AMD Ryzen 系列中， 3 字頭其實已經係舊產品，最新發佈的已經係 5 字頭。 但當然，AMD 出筆電用的處理器係相當慢、相當缺乏效率；而且每次有 AMD 機到貨，都好快被搶購一空。 聽到 VAIO E15 係用 Ryzen 處理器，本 YK 相當興奮，但見到只是不溫不火的 3 代時，確實心一沉，因為人類總係貪心忘舊。 但客觀上對比，處理器性能對比 Intel 8 代 U 和 10 代 U 的低電壓版，VAIO E15 都處於同樣等級，而且 GPU 性能強接近一倍的優勢，對有圖像處理需求的用戶來講，肯定係比 Intel 內顯好太多了。 但偏偏 Intel 11 代急住賣街，年底又出 12 代，睇怕過農曆年之後會有好多 11 代的筆電出現。
如果你需要的是一部非 INTEL Desktop Replacement 筆電的話，VAIO 15 整體 PACKAGE 相當稱職：平衡的 CPU 和 GPU 性能，舒服的磨砂面大屏幕，不需要 Dongle 拖住走，重量亦控制在 1.8 公斤之內，買機包埋原廠袋。 最重要係乜？ 係樣靚呀！ 放係屋企代替 Desktop 的話，節省空間之餘，亦可增添一絲時尚的氣息。 當然講緊我手上呢部「原錫銀」啦！
後記：
有網友提醒，原來忘記了講 VAIO 用什麼方案來減低散熱出風口噴正屏幕的情況。 其實 VAIO 將個散熱風扇設定為進取散熱模式，意味著未到好熱的時候已經主動提高風扇轉速，好處係唔等佢熱到爆炸先噴住個芒，但壞處係夜闌人靜風扇聲會好突出 ~