靚樣大芒、輕薄價平:三星 Galaxy Book 被低估的家用工作筆電!

YKer 2021-05-10 15:22 | 電腦硬件
最近好多網友鬧我,介紹咁多筆電都有一個共同的缺點,就係價錢過萬覺得偏高。 其實呢個唔係產品缺點,而係我地荷包缺點呀! 不過,如果你正在尋找一部大芒、樣子又靚仔、輕薄續航力好的話,三星最新推出的 2021 筆電系列中,有一款八千蚊有找的 Galaxy Book 絕對係嚴重被低估的產品。 雖然香港行貨係 5 月 14 日先正式開賣,但我一早忍唔住搶先借來韓國版真機進行實測!

fb.jpg

無得開箱
三星最近一炮推出三款新筆電,分別是 Galaxy Book Pro 360、Galaxy Book Pro 和 Galaxy Book 系列。 全人類目光聚焦係前面兩款,畢竟是旗艦定位的超商務筆電,但其實被遺忘的三哥先係最吸引到預算不足的用戶。 版主早前貼出的資訊大家不妨過去睇多次,而今次我借到手的卻不是香港開賣的版本,而係正宗韓版筆電,運行 i3 處理器和 Nvidia 獨顯,規格上跟港版不同。香港賣的一共有兩個處理器版本:i5-1135G7 和 i7-1165G7,分別是 7780 元 和 8780 元,並沒有獨顯卡。

photo6106893451791543176.jpg
▲ 一部最厚只有 15.4mm 的平價 15.6 吋大芒筆電,配合 1.6kg 的輕量,輕過 Macbook Pro 又薄過 Macbook Pro。

photo6106893451791543207.jpg
▲ 最抵死係三星重新設計火牛線路和組件,一個 65W 筆電用火牛竟然做到以爲係手機 USB 火牛咁迷你。

photo6106893451791543208.jpg
▲ 平價機都無偷工減料,而係跟足潮流加入 USB-C to USB-C 的充電模式。

photo6106893451791543206.jpg
▲ 提供 5V/3A、9V/3A、15V/3A 和 20V/3.25A 四種輸出模式;真係好細舊,從來未見過咁細的筆電火牛。


真機外觀
係屋企用筆電,好多人都希望芒夠大。傳統上好多 desktop replacement 類的筆電都係又大又厚,外觀亦欠缺「輕型」設計概念。而今次 Galaxy Book 絕對係外型先決,但有樣之外同樣有實力。 機身亦加入好多商務機重視的元素,包括齊全 I/O 接口、全 180 度攤平屏幕等,配合金屬外殼設計,完全係一部被忽視的平價高質家用工作機。

photo6106893451791543177.jpg
▲ 簡潔的 SAMSUNG 標誌;港行擁有兩種顏色,分別是霧光藍、霧光銀,而我到手的當然是藍色; 頂蓋磨砂金屬質感非常舒服。

photo6106893451791543179.jpg
▲ 底部一樣是磨砂藍的配色,仲有一堆貼紙標籤;左右兩側是支持 Dolby Atmos 的雙喇叭。

photo6106893451791543180.jpg
▲ 韓文我就唔識,但都知道佢係韓文,畢竟手上的是開賣前偷跑的國際試作機 ~
 
photo6106893451791543182.jpg
​▲ 散熱用風口亦相當美觀,只有簡單一列的屢空條紋,而四角附上方正接觸面積的防滑膠。

photo6106893451791543187.jpg
​▲ 機身並沒有採用下沉式轉軸,這個設計很適合長期平放在檯面。 

photo6106893451791543188.jpgphoto6106893451791543190.jpg
​▲ 機身最厚只有 15.4mm 我覺得係黐線,網友可能睇完上面兩張圖都未必真正感受到呢個厚度帶給我的震撼程度! 比兩個其他品牌的筆電數據大家參考下:LG GRAM 同級 16-16 吋屏幕都要 17.78mm 厚,號稱超薄級 Acer 15.6 吋 Swift 5 筆電 15.9mm,所以三星呢部 Galaxy Book 的纖薄程度相當驚人。

photo6106893451791543184.jpg
​▲ 接口齊全都係 Galaxy Book 的優點:左側有 USB-C X 2、HDMI 輸出、USB-A 接口。

photo6106893451791543186.jpg
​▲ 右側有安全鎖、另一組 USB-A、3.5mm combo jack 和 microSD 卡槽;硬件上亦支持 WiFi 6 和藍牙 5.1 規格。


內部佈局
Copy of photo6106893451791543194.jpg
​▲ 商務機比較熱門的全 180 度攤平屏幕設計,竟然可以係部 15.6 吋大芒筆電見到。

photo6106893451791543196.jpg
​▲ 這塊 15.6 吋全高清 LCD 屏幕,達 170 度可視角度,再配合磨砂防眩光技術,不論是睇電影或者睇文書檔案都相當舒服。

photo6106893451791543197.jpg
​▲ 全鋁金屬機身加持,亦更可靠地支持三邊超窄框設計。

photo6106893451791543198.jpg
​▲ 嚴格黎講,屏幕下方邊框唔算闊,可能爲左放 「SAMSUNG」個 Logo 所以先保留,哈哈 ~

photo6106893451791543199.jpg
​▲ 提供 720p 高清解像度的鏡頭當然唔係乜勁料,但你見唔見到鏡頭旁邊的收音咪,Galaxy Book 擁有商務機常見的智能降噪功能,可以針對性區分人聲以外的雜音,可以更好地應付家居開會的需求。

photo6106893451791543201.jpg
​▲ 一般 15.6 吋屏幕筆電都具備數字鍵盤,方便你炒股票入代號,亦方便 Excel 文書輸入。

photo6106893451791543203.jpg
▲ 背光鍵盤手感一般,對男性用戶黎講應該是鍵感太輕,無乜明顯的反饋感,會比較適合指力比較弱的女性用戶使用。 

photo6106893451791543202.jpg
▲ 觸控板面積足夠大,你見容納得晒本 YK 大手掌就知喇!

photo6106893451791543204.jpg
▲ 要注意,港行只有核顯版本,Nvidia 獨顯只有韓國偷跑機先有咋! 港行買到的是更強勁的 i5 和 i7 版,而本 YK 極度同意香港三星推出無獨顯版本的決定,下面會有進一步解釋。

photo6106893451791543205.jpg
▲ 但要留意係爲了遷就緊湊的機體,Galaxy Book 數字鍵盤的佈局並非傳統方案,確實需要幾天的時間適應。


各項性能測試 
規格一覽
事先講多次,港行並無提供 i3 + 獨顯的版本,呢部係韓國版 Galaxy Book 黎。最特別的地方係,我從來未玩過 Intel 第 11 代的 i3 處理器,而且我都想知道到底 MX450 獨立顯示卡性能同 11 代內顯單元差距幾大。 性能測試結果都可以比大家做一個參考。 

Screenshot (3).png
▲ 過往幾部測試的 11 代 Intel 處理器都係 i7-1165G7,今次反串黎一個 i3-1115G4 雙核心處理器,同樣採用最新的 10nm 製程。(港行會採用 i5-1135G7 和 i7-1165G7)

Screenshot (4).png
▲ 今代 i3 擁有 6MB Smart Cache 快取記憶體。

Screenshot (5).png
▲ 部機可以做到咁薄,主機板自然係三星自家定製的產物。

Screenshot (6).png
▲ 入門 U 配入門 RAM,機身擁有四通道模式的 8GB 記憶體,如果要睇片做野玩多工操作肯定唔足夠,所以香港三星引入係 16GB RAM 版本!

Screenshot (7).png
▲ 韓國版擁有 MX450 獨立顯示卡(咁薄都有獨立顯示單元,黐線),而港行係無呢樣野,我係高度讚賞呢種做法,下面跑完分你就知道點解。

開機速度
Screenshot (2).png
▲ 開機只需要 9 秒就完成系統啓動,相當高速的表現; 再過 23 秒先完成載入程序,以非旗艦機定位黎講,呢個速度令人滿意。

綜合性能
Screenshot (12).png
▲ 在 Novabench 綜合性能測試中,呢部 Galaxy Book 獲得 1729 分,對比同代 i7 處理器自然分數上慢,但實際體驗速度卻依然不錯。「i3 都咁 X 爽,咁 i5、i7 咪不得了?」呢個係我玩幾日後的評語。 

SSD 測試
Screenshot (8).png
▲ 輕薄機身下對 SSD 溫度控制可以話係相當大的考驗,而 Galaxy Book 實時檢測是攝氏 34 度,採用翻自家的 SSD 組件。 你可能會話 256GB 邊度足夠呢? 梗係唔夠喇! 所以香港行貨係跟 512GB NVMe 固態硬碟。

Screenshot (9).png
▲ 在連續讀寫結果中,Galaxy Book 獲得 2587mB/s 和 1200mB/s 的成績;而多工隨機讀寫 (4K Q32T1)達 447mB/s 和 407mB/s 速度,隨機讀寫有呢個速度真係嚇死人,其他品牌旗艦機都未必做得到。

CPU 處理器性能
到左最令我期待的環節,實測到底 11 代 i3 處理器性能有幾好?而比較有趣係 11 代 i3 處理器亦支持廠商主動調整功耗,最高可以去到 28W 火力輸出,但一般情況下考慮到發熱量問題,廠商的調教都會偏向保守策略。

Screenshot (13).png
▲ 傻左,多核心測試中 i3-1115G4 竟然跑得出 3310 分,你要記住佢係一個雙核心處理器,但跑出黎分數同四核心的 i7 15W 版處理器的 3769 分差距並不大,但就唔知道係 Intel 11th i3 黐線定三星黐線。

Screenshot (14).png
▲ 至於單核心表現都相當滿意,達到 1084 分的水平,作爲一粒 i3 可以話係收晒貨,普通日常文書睇片上網絕對難唔到佢。

GPU 圖像處理性能
Screenshot (16).png
▲ 我係上面大讚香港三星唔引入獨顯版係智者之舉,你睇到 Basemark GPU 4K DirectX 12 測試中,MX450 只係得到 1135 分咋! 如果係 i7-1165G7 粒 iRis Xe內顯都有 11XX 分水平。

Screenshot (17).png
▲ 唔好話 i7 粒內顯,連 i3 粒 UHD 顯示單元都有成 933 分,完美說明 Nvidia 塊 MX450 真係多舊魚,浪費電力之餘,仲會可能有撞 Driver 問題的風險。 所以,香港版大家可以安心入貨。

電力續航測試
Screenshot (10).png
▲ 三星官方聲稱電池配備高達 54Whr 容量,亦屬於自家出品的電池;一貫對 Desktop Replacement 的印象係續航廢,畢竟預左你拖住 AC 電源長期放係屋企用,從來無考慮過臨時出街的可能性。

Screenshot (19).png
▲ 但呢部機竟然可以係 Full Load 測試中跑出接近 9 小時的成績,當然 i3 會比 i5 和 i7 省電,但以一部平價大芒機黎講呢個續航力相當不錯。

Screenshot (20).png
▲ 而利用 Chrome 做播放指定的 720p 解析度 Youtube 影片恆常測試中(手動調整亮度最暗、WiFi 隔離),過了 60 分鐘後 Galaxy Book 仲有 96% 電量。 意味住最高續航力可以達到 20 小時,收晒貨喇、超出晒預期喇!


結論
好耐未試過有一部大芒筆電係令我係各方面都相當滿意,滿意唔係因爲佢性能爆錶,又或者薄到喊、又或者續航力超強。 一部性能平衡、造工紮實、價錢宜人的筆電,本 YK 經常都話三星最近幾年推出的筆電產品,都可以見到佢全力進攻的野心和決心。 三星筆電產品確實屢有驚喜,而且無「頭大身細」的產品。 

今次推出的 Galaxy Book 是「MORE THAN ABOVE AVERAGE」:機身輕薄、全金屬外殼、充足的記憶體和 SSD 容量(可擴充)、喇叭音效立體有力、續航力亦有驚喜。 可惜係偷跑評測未能獲得 Galaxy Book 港行版完整的體驗。 雖然呢部機價錢平,但完整的三星產品體驗佢係有比足你,包括 IoT 控制中心 SmartThings 和平板當芒洗 Second Screen 功能,而具有配合三星手機高速傳送檔案的 Quick Share。 

題外話,Galaxy Book 香港有官網開賣優惠,限時送 ITFIT TWST808 真無線耳機和無線滑鼠一個。 我就唔建議大家爲贈品而買機,最好係落去專門店摸過部真機再決定,可能你都會好似我咁比佢靚仔機身震撼到。
 

最新新聞