868g 輕巧 + 1.12cm 超薄身:三星旗艦筆電 Galaxy Book Pro 港行開箱

YKer 2021-05-13 14:03 | 電腦硬件
同大家分享過 Galaxy Book 的韓版實測後,有網友問我點睇旗艦級的 Book Pro 和 Book Pro 360,機價過萬蚊起跳,是否對得住「Pro」專業命名呢? 如果你有需要經常出街、到處移動的筆電產品,三星係 2021 年推出的 Galaxy Book Pro 只有不到 870 克的輕量,機身厚度只有 11.2 毫米。 更重要係咁輕咁薄的機體竟然配備 63Whr 大電池。部機設計和造工係點呢? 開箱睇睇先 ~

fb.jpg

開箱 
三星在港推出的 Galaxy Book Pro 其實係兩個版本,一個是 13.3 吋屏幕,另一款自然是 15.6 吋屏幕,而本 YK 手上的是 13.3 吋屏幕。不論兩個型號的機身設計、重量、輕薄程度,都明顯係針對有便攜需求的用戶。

photo6118410359351126964.jpg
▲ 外盒水印寫住「Galaxy Book」,實際上底部寫的「Galaxy Book Pro」才正確。

photo6118410359351126967.jpg
▲ 機身纖薄隨之而來的自然是包裝盒都好薄,大大個字寫住「Intel Inside」。無錯,又係第 11 代 Intel 處理器。

photo6118410359351126968.jpg
▲ 三星爲 Galaxy Book Pro 提供 1 + 1 年保養,頭一年係國際保,之後就係本地保。

photo6118410359351126969.jpg
▲ 今代 Galaxy Book 系列都採用的迷你 USB-C 充電火牛,完全就係手機火牛的大小,隨身攜帶相當方便。

photo6118410359351126970.jpg
▲ 雖然牛仔細細,但最高支持 65W 輸出功率!


真機外觀
photo6118410359351126972.jpg
▲ 金屬外殼加持,面蓋只有雕刻「SAMSUNG」字樣不花巧;而 Book Pro 符合美國軍規 MIL-STD-810G 標準,機身纖薄都唔容易好似 Apple 咁變 「iBend」啊 ~

photo6118410359351126975.jpg
▲ 機身底部亦相當乾淨,比較明顯的是一列散熱孔;機身重量不到 870 克,而重量分佈相當平均,幾個攞過上手的網友都大讚,話揸住黎佢行走江湖重量相當就手。

photo6118410359351126979.jpg
▲ 隱約可以見到機身內部的散熱導管和風扇。

photo6118410359351126977.jpg
▲ 左右底部均有一個外放喇叭,獲得 AKG 技術認證,同時獲得 Dolby Atoms 聲效加持。

photo6118410359351126978.jpg
▲ 四角均有方形防滑膠,但記得買翻黎之後要將保護貼拆除才會有防滑作用。

photo6118410359351126976.jpg
▲ 值得留意係 Book Pro 是韓國三星設計、越南組裝生產,絕對係大大加分的優點!

photo6118410359351126984.jpg
▲ 到底 11.2mm 係乜概念? 從前面望落去如上圖般纖薄;題外話,其實 15.6 吋版本的 Book Pro 更加黐線,厚度得 13.3mm、重量得 1.15kg,又係一款羽量級筆電!

photo6118410359351126980.jpg
▲ 機身設計亦無取巧地用視覺效果「偷薄」,你見到從側面望落去都係超級薄,但薄得黎記住佢係通過軍規級標準,呢個工藝技術真心令本 YK 感到驚訝。

photo6118410359351126985.jpg
▲ 還記得 Macbook Air 賣自己輕薄機身然後取消 USB-A 接口,當時有果粉死撐話薄機身只能有足夠空間提供 USB-C 接口; 唔好意思,三星 Book Pro 完全係啪啪聲咁打面,機身右側提供 microSD 卡嘈、USB-A 接口、3.5mm combo jack 接口。 

photo6118410359351126986.jpg
▲ 黎到機身右邊打多 Apple 幾巴,提供標準 HDMI 輸出,以及兩個 USB-C 接口;而最抵死係 Book Pro 機身只有 11.2 毫米,而 Macbook Air 厚度是 16.1 毫米;明顯地,三星設計的筆電係更人性化,而技術亦明顯技高一籌!


內部佈局
photo6118410359351126988.jpg
▲ 三星 Book Pro 同樣提供單手揭芒設計,轉軸相當順滑就打開屏幕,可惜無法如其他商務機般做到 180 度攤平屏幕; 但如果你選購 Book Pro 360 的話,唔好話 180 度攤平,360 度變成平板都得(當然會貴千七蚊) ~

photo6118410359351126990.jpg
▲ 而機身做到咁薄係得益於採用 13.3 吋 AMOLED 全高清屏幕,而邊框設計亦做到接近三邊等窄;屏幕支持類似三星手機的可調整屏幕色溫功能,針對遊戲、電影等個別調整鮮豔度、藍光量等; 當然,AMOLED 天生的燒印和 PWM 頻閃亦無可避免。

photo6118410359351126992.jpg
▲ 內置 720p 高清鏡頭,配合雙咪收音下開啓 AI 智能降噪功能,是三星近年主打視像會議的功能,Book Pro 作爲高階型號筆電當然都有齊。

photo6118410359351126996.jpg
▲ 背光鍵盤佈局正常合理,鍵帽面積亦無因爲緊湊的機身設計而縮小,依舊放入大面積孤島式鍵帽。

photo6118410359351127004.jpg
▲ 鍵帽的塗層提供一層額外的摩擦感,能夠更精準和高效地輸入文字。

photo6118410359351126998.jpg
▲ 三星稱呼呢個鍵盤做 Pro Keyboard 確實無吹水,按壓反饋相當清晰,而且鍵帽觸感舒服,更重要係如果呢部機帶上床黎打字,訓係你隔離果個都唔覺得鍵盤嘈,明顯係有加入機械緩衝設計以減少打字時候的噪音;呢個鍵盤的質素係筆電黎講完全係超班無得頂!

photo6118410359351126997.jpg
▲ 玻璃觸控板面積夠大,相當就手順滑,滑到好似摸緊絲綢咁;配合 Windows 10 手勢操作切換效率自然更高。

photo6118410359351126994.jpg
▲ 專登無撕走個貼紙比大家知道,電源鍵同時提供指紋識別功能。

photo6118410359351126995.jpg
▲ 驗明正身,三星 Book Pro 係獲得 Intel evo 平台認可的機型,意味住速度、續航力等都會達到 Intel 要求的高標準保證。


各項性能測試 
規格一覽
香港行貨推出的 Book Pro 有兩個版本,分別是 13.3 吋和 15.6 吋,而每個版本又提供兩個處理器等級,分別是 Intel 11 代 i5 和 i7 處理器,而本 YK 手上到手的是 13.3 吋 i5 處理器。 而睇過上次 Galaxy Book 的評測,大家都知道唔加 MX450 呢類入門顯卡係更佳方案,所以羽量級 Book Pro 自然以核顯上陣。

螢幕擷取畫面 (7).png
▲ 採用 Intel i5-1135G7 四核心八線程處理器,自然係採用 Intel 手上最先進的 10nm 製程。

螢幕擷取畫面 (8).png
▲ 而呢款處理器擁有 8MB SmartCache 快取記憶體。

螢幕擷取畫面 (9).png
▲ 今次 Book Pro 亦是三星自家定製出品的主機板。

螢幕擷取畫面 (10).png
▲ 機身提供 16GB LPDDR4x 記憶體,支持四通道模式。

螢幕擷取畫面 (11).png
▲ 既然是 11 代處理器,當然採用熟口熟面的 Iris Xe 顯示單元,自從有左呢個核顯後,Nvidia MX450 就無用武之地了。

開機速度
螢幕擷取畫面 (19).png
▲ 開機只需要 6 秒就完成系統啟動,絕對係超快速;再過 17 秒就完成載入程序,果然係旗艦機的體驗,開機速度相當快速。

綜合性能
螢幕擷取畫面 (13).png
▲ 在 Novabench 綜合性能測試中,呢部 Galaxy Book Pro 獲得 2046 分,留意同代 i5 的跑分可以打贏 i7 處理器,三星到底點樣調教部機咁黐線?

SSD 測試
螢幕擷取畫面 (3).png
▲ 待機狀態下 NVMe SSD 溫度只有攝氏 31 度,採用的是三星自家出品 512GB 固態硬碟。

螢幕擷取畫面 (6).png
▲ 在連續讀寫結果中,Galaxy Book Pro 獲得 2189mB/s 和 1257mB/s 的成績;而多工隨機讀寫 (4K Q32T1)達 455mB/s 和 410mB/s 速度,連續讀寫速度對比其他採用 PCIe 4.0 的筆電屬於慢,但日常使用中最影響使用體驗的隨機讀寫,破四百速真心嚇死人。

CPU 處理器性能
Intel 第 11 代處理器的 i7 和 i3 我都實測過好多次,黎到 i5 呢個中階型號的性能又如何呢? 呢粒處理器支持廠商主動調教 TDP,意味住性能會根據筆電定位進行降頻省電,最好當然係唔好有性能封頂。 而三星呢部 Book Pro 係有一個特殊設計,支持一鍵解鎖性能,意思姐係話,平時省電佢好省電,需要性能一按就爆到比你。

螢幕擷取畫面 (14).png
▲ 預設自動模式下,在 Cinebench R23 的跑分結果:單核心 1112 分、多核心 3428 分;三星自家另一款採用 i7-1165G7 處理器的輕薄筆電 Book Ion 2 得分是 1025 分和 3823 分,明顯旗艦機調教得確實係好少少。 

螢幕擷取畫面 (17).png
▲ 上面測試跑完之後一於唔比佢冷卻,本 YK 立刻打開高性能模式再跑多次,結果係分數相當好:單核心 1274 分、多核心 4092 分,性能瞬間提升屌打埋 i7-1165G7 15W 版!

photo6118410359351126994.jpg
▲ 我貼多次比大家睇,一鍵解鎖加速就係 F11 按鍵,滿足用戶有臨時簡單剪片或者遊戲的需求。

GPU 圖像處理性能
螢幕擷取畫面 (20).png
▲ 在 Basemark GPU 標準測試的 4K Vulkan 1.0 測試中得到 1199 分,符合 Iris Xe 核顯應有的分數;再講多次, Intel 核顯係第 11 代處理器中已經脫胎換骨,同過往 8、9、10 代完全係兩個世界。

電力續航測試
螢幕擷取畫面 (12).png
▲ 內建高達 63Whr 電池容量,同樣是自家出品電池,一部 870g 不到的筆電可以有咁大容量電池,宜家科技真係進步得好快。 

螢幕擷取畫面 (21).png
▲ 在 Full Load 測試中只係得到 3.5 小時的成績,絕對係超級短超級短,原因當然好明顯,三星允許呢粒 i5 提供無鎖性能, CHUR 盡處理器的性能下自然續航力縮短。

螢幕擷取畫面 (23).png
▲ 而利用 Chrome 做播放指定的 720p 解析度 Youtube 影片恆常測試中(亮度最暗、WiFi 附近); 過了一小時後 Book Pro 還有 93% 電量,也就是睇 Youtube 最長可以睇到 14 小時先無電,續航力相當不錯。

自家套件
螢幕擷取畫面 (1).png
▲ 好多網友都會問,旗艦定位筆電除了性能強大之外仲有乜特別? 好似三星咁會提供一整套自家實用軟件,一開箱就立刻用得,對商務人士黎講最有用當然係 Samsung Notes 和 Voice Note ,支持同手機同步以及語音筆記。

螢幕擷取畫面 (4).png
▲ 如果你本身用三星手機,配合 Galaxy Book Pro 的同步軟件可以做到更簡單方便的資料傳輸。

螢幕擷取畫面 (2).png
▲ 如果偶然要剪下公司活動片,甚至小朋友家庭樂影片,三星都內置左 Studio Plus 比大家簡單方便製片。


結論
三星係筆電市場的佈局越來越完整,而且每一部產品定位相當清晰,更重要的是設計、造工、功能越來越明白消費者真實的需求,本 YK 覺得其他老牌筆電廠商要開始擔心、開始努力了。呢部 Book Pro 完全是三星頂尖技術的示範,超輕薄機體設計但同時提供完整接口,要客戶拖住條 Dongle 真係好唔貼心囉! 而最令我印象深刻係,極少見到其他廠商會花心思改良充電火牛,細到好似手機 USB 火牛咁,成套野帶出街都唔知有無 1 公斤,呢個先係真正的移動筆電方案。

建議零售價 10280 元起買到 Book Pro 其實唔算貴,限時送一年 Office 365 訂閱,再送真無線藍牙耳機、送套送滑鼠,基本上就係即買、即開、即刻落場用得! 當然,如果你唔介意多少少 1.04kg 的重量,升上去買 Galaxy Book Pro 360 超旗艦筆電,會多左一個非常適合商用場合的 360 度反轉芒,亦送埋 S Pen 比你觸控書寫,機身同樣係通過美國軍規標準。對於有需要做 Demo 展示的用戶黎講係極大方便和優勢。
 

最新新聞