據消息指，三星 Galaxy Ring 剛剛完成咗開發程序，並已測試咗原型機，而且硬件都已經 Ready 好，只係等緊決定，要唔要大量生產呢款智能戒指，如果決定好，可能就會喺下個月開始生產。不過，佢哋推出 Galaxy Ring 新產品，仲要經過唔少嘅監管程序，而且需要獲得各種嘅認證，先可以將 Galaxy Ring 定位成一個「醫療設備」。所以，Galaxy Ring 要成功普及，仲有一段好長嘅路要行。不過，根據全球市場洞察研究人員指出，隨住智能設備嘅普及，智能戒指市場到 2032 年，需求有機會會增加，並可以為三星帶來可觀的收益。
咁到底呢款 Galaxy Ring 智能戒指，有乜嘢功用呢？按照現時嘅消息指，Galaxy Ring 會主要用於健康方面同埋電子支付，除咗可以記錄每日嘅健康活動，例如心率、血壓、心電圖、睡眠模式等等，仲可以同手機配對，提供所有必要資訊，而且因為受到疫情影響，電子支付需求大增，所以如果第時用隻戒指，都可以隨時付款，都係一個好方便嘅支付方法。仲有一點，因為戒指無屏幕，電池壽命亦都會更長，確實幾值得期待一下。你又會唔會對呢款穿戴裝置有興趣呢？
來源：GizChina