AI 生活助理登場：一句「Hey VIVE」搞掂日常瑣事
HTC 今日正式宣佈在香港推出 VIVE Eagle 智慧眼鏡，建議零售價為 $3988，將於明日起正式開賣。今次 VIVE Eagle 最大賣點，係想徹底改變你同科技互動嘅方式。佢內置嘅 VIVE AI 語音助理，採用開放式架構，全面支援如 Google Gemini 等大型語言模型。簡單嚟講，即係你可以好似同秘書講嘢咁，用自然語音同佢連續對話。朝早返工趕時間，你可以叫佢幫手記低聽日個會議入 Google Calendar；去到陌生地方揾食，可以即刻問佢附近邊間咖啡店評價最高；甚至乎連自己架車泊咗喺邊個黑暗角落，都可以問返佢。呢種「動口不動手」嘅體驗，正正就係 HTC 想帶出嘅核心概念：讓科技無感地融入生活。只可惜嘅係，暫時未支持廣東話，預計到 2 月先會推出廣東話，暫時要先用普通話或者英文同佢溝通。旅行拍檔新定義：第一身視角拍照、即拍即時翻譯
除咗做你嘅 AI 秘書，VIVE Eagle 亦想取代你拎出手機拍照嘅習慣。眼鏡樑上內置咗 1200 萬像素超廣角相機，只需要講一句「Hey VIVE，拍照」，就可以用你雙眼嘅第一身視角，瞬間記錄低眼前所見。無論係旅行時巴黎咖啡館嘅黃昏光影，抑或同朋友相聚嘅歡樂時刻，都可以用更直覺嘅方式捕捉。對於經常去旅行嘅朋友，VIVE Eagle 就更似一個隨身翻譯官。眼鏡支援超過 40 種語言嘅即拍即譯功能，遇到睇唔明嘅外文餐牌、路牌或者博物館介紹，只需指令眼鏡拍攝，它就能將翻譯內容讀出嚟，無需再人手撳手機翻譯 App，對於解決旅行中嘅語言障礙，概念上相當方便。
硬件設計有心思：輕量化、護眼鏡片、開放式聆聽
作為一副需要長時間佩戴嘅智慧眼鏡，舒適度同外觀同樣重要。VIVE Eagle 以極簡同半透明設計作為主調，全機重量控制喺 49 克以內，並針對亞洲人面型設計鏡架，追求長時間佩戴嘅舒適感。佢提供兩種專業鏡片選擇：與 ZEISS 合作嘅太陽鏡片款，以及專為長時間對住屏幕用家而設嘅「抗藍光透明鏡片款」，兩者均具備 UV400 防護，照顧唔同場景需要。續航力方面，內置 235mAh 電池，官方數據指連續聽音樂可使用約 4.5 小時，支援磁吸快充，充電 10 分鐘可補充約一半電量，方便外出時快速補能。音訊方面採用開放式耳機設計，讓你聽歌或通話時仍能感知環境聲音，保障出行安全，同時官方聲稱其技術能改善傳統開放式耳機漏音嘅問題。
本地化購買策略：捆綁5G月費、溥儀眼鏡專屬配鏡服務
講到點樣買，今次 HTC 嘅策略唔係單賣硬件，而係聯同本地電訊同眼鏡零售龍頭，打造一站式體驗。用家如果選用 1O1O、csl 或 SmarTone 嘅 5G 服務計劃，即可以專案優惠價入手 VIVE Eagle。同時，HTC 與 溥儀眼鏡（Puyi Optical） 獨家合作，為有度數需求嘅用家提供專業驗光同配鏡服務，購買時更會附送 $500 配鏡優惠券，解決智慧眼鏡最常遇到嘅「度數點算」問題。
小結
總括而言，HTC VIVE Eagle 展示出 AI 穿戴裝置一個頗具潛力嘅發展方向：成為一個貼身、無屏幕嘅效率助理。對於科技嚐鮮者、頻繁出差嘅商務客或旅行愛好者，其整合嘅語音 AI、第一身拍照與即時翻譯功能，確實有其實用吸引力。不過，用家亦需留意，其粵語語音對話功能要等到 2026 年上半年才支援，對本地用家而言可能要耐心等待。近四千港元嘅定價，以及實際續航表現同 AI 反應速度，仍有待實機開賣後市場驗證。但無可否認，HTC 今次聯同電訊與零售生態夥伴嘅打法，比起單純賣硬件，似乎行對了第一步。