時隔五年回歸！HUAWEI WATCH GT Runner 2 登場：鈦合金機身 + 智能馬拉松模式

左定坤 (Cho Ting Kwan) 2026-02-27 11:28 | 科技新知

等咗足足五年，華為終於 update 佢哋條專業跑錶 line 啦！尋晚華為喺西班牙馬德里舉行發佈會，正式宣佈 HUAWEI WATCH GT Runner 2 回歸！版主知好多人當年買第一代都係貪佢夠輕夠準，今代華為可以話係將跑錶需要嘅元素推向極致，由機身材質到定位天線都全面升級。究竟呢隻等咗五年嘅「神錶」有咩進化？睇下文啦！

航天級鈦合金機身與超光亮屏幕

作為一隻專業跑錶，輕巧同耐用係非常重要嘅。HUAWEI WATCH GT Runner 2 採用咗航天級鈦合金錶殼，配合第二代崑崙玻璃鏡面，做到又輕又硬淨。手錶嘅厚度只有 10.7mm，而唔連錶帶嘅重量更加只係得 34.5g，戴上手跑步絕對唔會有負擔。屏幕方面，佢擁有高達 3000 nits 嘅峰值亮度，就算喺烈日當空嘅戶外跑步，畫面資訊依然清晰可見。另外，華為仲為佢配備咗全新嘅 HUAWEI AirDry 編織錶帶，採用中空設計令透氣度提升 25%，能夠有效排汗防潮。

升級 3D 懸浮天線與超長續航

定位系統對於跑錶來講係靈魂所在。今代手錶加入咗業界領先嘅 3D 懸浮天線，配合智能融合定位演算法，令定位準確度大幅提升咗 20%，就算穿梭喺高樓大廈或者隧道都可以精準記錄軌跡。電池方面，佢採用咗堆疊式矽電池同低功耗技術，令能量密度提升咗 68%。喺一般輕度使用下可以維持高達 14 日續航，典型使用都有 7 日；而喺開啟精準定位嘅戶外運動模式下，依然可以支撐高達 32 小時，足夠應付超馬賽事。

智能馬拉松模式與全面健康管理

功能上，華為同 dsm-firmenich 跑團合作開發咗「智能馬拉松模式」，提供賽事管理、智能訓練計劃同埋比賽指引，預測完賽時間，幫助跑手打破 PB（個人最佳成績）。除咗跑步，手錶仲內置超過 100 種運動模式，包括越野跑、內置全球超過 17,000 個球場數據嘅高爾夫模式，以及支援深達 40 米嘅自由潛水模式。健康監測亦都非常全面，手錶配備升級 NPU 同演算法，支援心電圖（ECG）分析、全天候心率變異性（HRV）監察、睡眠呼吸暫停風險提示等多項功能，全方位照顧你嘅身體狀況。