真正屬於香港人嘅 AI 隨身拍檔
以往戴住智能眼鏡喺街度要用國語或者英文同 AI 講嘢，硬係覺得有啲尷尬。今次 VIVE Eagle 透過深度整合 Google Gemini AI 模型，正式解鎖廣東話語音對話功能。更新之後，用家只需要用最親切嘅廣東話講一句「Hey VIVE」，就可以直接用語音操控眼鏡。無論係叫佢幫手記錄開會時間，定係去旅行遇到唔識嘅外語餐牌，都可以直接叫 AI 幫你即拍即譯，成件事即刻變得貼地又實用。
重溫 VIVE Eagle 規格
對於仲心大心細想入手嘅朋友，同大家快速重溫一下呢部賣 HK$3,988 嘅智能眼鏡有幾好玩。首先外觀極致輕巧，機身重量只有大約 49g，同普通潮流眼鏡無異，全日戴住都唔覺重。而喺眼鏡框前方，隱藏咗一個 1200 萬像素超廣角鏡頭，可以隨時隨地影相，紀錄第一人稱視角。效能方面，佢內置專為智能眼鏡而設嘅 Qualcomm Snapdragon AR1 Gen 1 處理器，確保運算處理順暢。至於聽覺體驗亦交足功課，眼鏡臂內置大尺寸聲學單體揚聲器，加上指向性收音咪同環境噪音過濾技術，就算喺嘈雜嘅香港街頭，都可以清晰收音同聽歌。
今次加入廣東話支援，絕對係 HTC VIVE Eagle 喺香港市場嘅一著「殺手鐧」，大大提升咗日常使用嘅實用性。