51mm 鈦合金巨獸！Amazfit T-Rex Ultra 2 戶外旗艦智能手錶抵港，賣 $4198！
左定坤 (Cho Ting Kwan)
2026-03-18 09:26
|
科技新知
如果你平時鍾意行山、越野跑、潛水或者玩極限運動，對智能手錶嘅「硬淨」程度同埋續航力一定好有要求。LRT 日前宣佈引入 Amazfit 全新戶外旗艦智能手錶 —— Amazfit T-Rex Ultra 2 ！呢隻新錶將 T-Rex 系列嘅專業運動基因推向極致，專為極限探險者及高要求運動用家而設 。想知詳情，睇下文啦！
51mm 鈦合金機身，藍寶石玻璃抗刮防撞
第一眼望到 Amazfit T-Rex Ultra 2，版主就覺得佢非常有霸氣。作為系列嘅巔峰之作，佢將錶徑拓展到去 51mm，係 T-Rex 家族裡面最大尺寸，特別為腕圍較大嘅極限玩家量身打造 。機身結構方面亦落足料，錶圈同底殼均採用 5 級鈦合金鍛造，兼具高強度與輕量化特性 。屏幕面頭更配備咗高硬度嘅藍寶石玻璃，硬度僅次鑽石，有效抵禦刮擦與撞擊，無論在岩石、沙礫或惡劣氣候環境中，仍能保持穩定可靠 。
3,000 nits 極高亮度 AMOLED 芒，極端光線依然清晰
戶外運動最怕睇唔清個芒，Amazfit T-Rex Ultra 2 嘅屏幕升級幅度就相當大。佢搭載咗 1.5 吋 AMOLED 高亮度顯示屏幕，解像度為 480 x 480，而峰值亮度更躍升至 3,000 nits 。即係話就算你喺烈日、雪地或水面反光等高對比環境下，畫面依然清晰易讀 。操作方面，手錶設有四個實體按鍵與觸控式屏幕，即使戴上手套或於濕手狀態下亦可準確操控，進一步提升戶外使用嘅可靠性 。
內置 64GB 大容量，全彩離線地圖精準導航
導航功能係今代一大賣點，唔使再下下攞部電話出嚟睇地圖。手錶內置高達 64GB 大容量儲存空間，出廠已經內置全彩離線地圖 。用家可以直接於手錶上進行路線設計或匯入 GPX 檔案，無需依賴手機亦能完成導航操作 。配合多衛星及雙頻 GPS 定位系統，即使在山區、森林或高樓密集環境中，仍可提供快速而準確嘅定位表現 。導航過程中，系統會提供清晰嘅轉向提示與路線指引，如偏離原定路線更可即時重新規劃，結合地形圖及等高線顯示，大幅降低迷路風險 。
30 日超長續航，雙色照明燈 + 潛水認證
對於長途探險，電量同求生功能就係保命符。Amazfit T-Rex Ultra 2 內置 870mAh 電池 ，喺日常使用模式下續航力長達 30 天，喺高精準雙頻 GPS 模式下，亦可提供約 50 小時連續定位使用 。為咗應付突發情況，錶冠上方加入咗雙色照明燈，除了高亮白光外，更新增綠光照明模式，適合夜間活動或需要低干擾光源嘅場景使用 。有需要時更可啟動 SOS 警示閃爍功能增加被搜救機會 。另外，手錶支援 10 ATM 防水等級及雙重潛水認證，自由潛水最深可達 45 米，實現真正「上山下海一錶搞掂」 。
支援 180+ 運動模式與全面健康監測
講到運動功能，Amazfit T-Rex Ultra 2 絕對係一個專業嘅隨身教練。佢支援超過 180 種運動模式，亦係 HYROX 官方合作夥伴，專為功能性健身挑戰打造 。手錶搭載先進嘅 BioTracker™ 6.0 PPG 生物辨識感測器，可全天候監測心率、血氧、壓力及睡眠質素 。配合 Zepp Coach™ 智能訓練系統，能根據個人體能與訓練表現提供個性化建議，幫助用家提升運動表現同時避免過度訓練 。
香港賣價與開賣優惠
大家最關心嘅定價同開賣資訊來喇！Amazfit T-Rex Ultra 2 即日起在香港推出，提供 51mm 的黑岩漿配色選擇，建議零售價為 HK$4,198。即日至 4 月 30 日，於 amazfit.hk 網店及零售店惠顧嘅客戶，可到指定地點免費換領價值 HK$238 嘅手錶支架充電座一枚及 HK$200 超市禮劵，禮物總值 HK$438，先到先得，送完即止 。
