正過小米?realme 4K Google TV Stick 評測: Netflix、Disney+ OK,但黃 Viu 仍失敗

左定坤 (Cho Ting Kwan) | 數碼影音
內文.jpg

過年之前版主同大家分享過一件新玩具:小米 4K TV Stick,最初玩都覺得幾不錯,可以將我房入面部 Hisense Smart TV 變身成為 Android TV,不過後來發覺有個問題,就係唔知點解,小米 4K TV Stick 連接咗我部電視之後,就算我電視調校到廿幾三十度音量,都依然覺得好似好細聲咁。咁版主唔係電視方面專家,或者有高人可以指點一下迷津,不過後來 realme 都寄咗隻 TV Stick 嚟,係用 Google TV,就令我直接將隻小米 4K TV Stick 收埋咗。即刻同大家做個簡單開箱評測啦!
 

realme 4K Google TV Stick 開箱評測 + 使用體驗分享

用過兩款唔同嘅 TV Stick,對比起小米,真心講句,realme 4K Smart Google TV Stick 我會覺得更加好用。雖然,其實 Google TV 定係 Android TV,對我嚟講用落其實都係差不多,核心始終都係 Android,用乜系統都好,最終你最常用嘅,都係果幾隻 App:YouTube、Netflix、Disney+、ViuTV 等等。

最明顯差別係個介面,除咗首頁同樣會有不同 App 的推介內容,同時你會發現對比 Android TV 會無咗個「Google Play」的應用程式,因為已經直接整合咗去「應用程式」的一欄,只要你移去「應用程式」位置,就可以直接搜尋 App 或者遊戲。

另外,用得呢啲 TV Stick,十有八九都係因為你部電視唔支援 App Store 下載軟件,所以就想將佢變身成為 Android TV / Google TV,方便可以睇到 Netflix / Disney+ 等內容,所以睇片嘅體驗好重要。如上次寫小米隻 4K TV Stick 一樣,因為我部電視只係支持 HD (720p),所以佢 4K 影視質素點樣,呢度我測試唔到,suppose 佢話支持 4K,同埋支持 HDR 10,理論上一般要求唔太高嘅用家嚟講,應該都唔會太差,而我可以感受到嘅,係聲音方面,小米 4K TV Stick 唔知點解喺我部電視度,勁細聲,電視音量校到廿幾三十,都係相當細聲,而 realme 4K Smart Google TV Stick,就無呢個問題,音量只需正常咁八至九度,已經夠我同老婆睇戲用。至少,我哋用佢睇哂全套 Netflix 嘅《殭屍校園》,都基本上完全無任何怨言。
 
P.S. 補充網友提供小米 4K TV Stick 音量解決方法:
「入viutv app求其播段片 㩒remote中間個掣 見到音量較反最大 就會同步返電視個音量」

技術層面嘅我就唔講太多,畢竟我唔係呢方面嘅專家,我都無謂班門弄斧,所以以上我只係喺用家層面,去分享我用完之後嘅整體感覺,以及到底近期用過兩款唔同嘅 TV Stick,到底邊款感覺更加良好。結論呼之欲出,係 realme 4K Smart Google TV Stick,我會覺得在整體體驗上會更勝一籌。當然,講到尾我都係同大家一樣,係個普通嘅用家,所以如果大家有乜嘢想知,而我又無講到嘅,都可以喺 Facebook 留言話我知,睇下我又試唔試到。

以下就先畀啲開箱圖大家睇睇:
   

市面方法安裝黃 Viu 測試

至於之前大家關注睇唔睇到黃 Viu 嘅問題,上次寫完小米 4K TV Stick,有網友就話 HKTVapp 網站有得下載 apk,安裝佢可以睇得到,咁今次版主就利用 realme 4K Google TV Stick 去跟住做個測試。坊間測試方法如下:

Step 1: 去「應用程式」位置,搜尋「Downloader by AFTVnews」(其實直接搜「Downloader」就得,搜完撳「安裝」,然後開啟。

Step 2: 進入「Downloader」,首頁會見到叫你輸入 URL 或者「Search Term」,如果你想下載黃 Viu,直接打「85820」就得。

Step 3: 之後會跳入一個等待頁面,然後自動下載「Viu for Home」。

Step 4: 安裝「Viu for Home」之前,要先去設定允許安裝「不明來源應用程式」。

Step 5: 安裝「Viu for Home」後開心觀看 (理論上)。


但無奈地,結果係:下載到,安裝到,入到首頁,但要播片時,卻一直黃色打圈圈,Load 唔到,結局又係失敗。我真係好想喺電視度睇套《Ghost Doctor》呀,有無網友可以教下我呢?

(P.S. 原來其他人情況都係一樣 fail,就算 Google Chromecast 用同樣方法都係唔得,稍後我又試下拎返小米出嚟,睇下係唔係 Android TV 先得而 Google TV 唔得)

IMG_7016.JPG
▲ 成功入到呢個頁面,好過 Google Play 下載話唔支援。

IMG_7017.JPG
▲ 問題係想播片係咁打圈圈,未知可以點解決。
 

realme 4K Google TV Stick 價錢

不過,又老實講,對比起小米 4K TV Stick,realme 4K Smart Google TV Stick 價錢上會再貴一啲,香港推出建議零售價 $599,甚至似乎比起 Google 親生仔更貴,但同樣叫做係一款香港買得到行貨嘅 4K TV Stick。若果用落體驗唔差,除咗暫時未成功睇到黃 Viu 之外,其他地方都正正常常,唔知網友又會唔會考慮佢呢?
廣告