本來打算選擇價格最便的 P735 50 吋，建議零售價約 6000 多元。 但思考後覺得 C635 罕有地獲得 ONKYO 音響系統加持，而不少店鋪提供超級大折扣。 咁，唔需要我多講你都識揀啦！
開箱
一分錢一分貨，但 TCL 係做爛市，成日玩高規低價。以我手上這部 C635 50 吋為例，塞落 4K HDR QLED 顯示屏，也塞了 ONKYO 喇叭系統，仲有完整的國際版 Google TV 系統，成個 Package 街價都係六千零蚊有交易，睇唔到市場上有乜對手。
▲ 有關電視導購，本人一律建議視乎空間有大買最大。前任韓系 47 吋萬元級電視壞了，輪到 TCL C635 50 吋登場！ 紙箱上寫出幾大賣點，包括原裝 Google TV 系統、 杜比聲 + 畫、ONKYO 和 HDMI2.1 等。
▲ 要注意紙箱上的指示，開箱過程中要避免按壓電視面板，最好是兩個人合作開箱。
▲ 外箱亦細心寫上哪一邊是正面，讓移動搬運過程更安全。
箱內配件
▲ C635 的左右腳架需要自行安裝，一共 4 粒螺絲，使用普通十字螺絲批即可；腳架末端亦貼有防滑膠。
▲ 如果想改用掛牆架，跟機文件清楚顯示你需要的零件和產品規格。以我這部 C635 50 吋為例，只要任何符合 VESA 標準的電視掛牆架（支持 300mm X 300mm 孔距），配合 M6 18mm 和 12mm 長的平頭螺絲，就可以自行鑽牆安裝啦！
▲ 電源線和 AV 分色線，後者適用於舊式影音設備如錄影帶讀播機。
▲ C635 系列採用雙遙控設計，各自側重的功能不同，一個是有數字鍵的電視遙控。
▲ 另一個是 Google TV 遙控，能配合 OK Google 語音輸入指令。
▲ 值得留意是，過往 TCL 電視採用 3 + 3 保養模式，從 2022 年 5 月開始改為 3 + 1 模式，依然有首 3 年全機保養，另加第四年免檢查費，新政策跟市面上大部分廠商睇齊。
外觀設計
▲ 登登！ 先比大家睇部機完全設定好的狀態，是電視又是電腦芒，這部 C635 身兼多職。
▲ 超窄邊框設計當然正，連我手指都粗過條黑框。
▲ 既然 C635 系列主打喇叭，機身前框亦刻上 ONKYO 品牌字樣！
▲ 咁電視屬於 TCL 產品，底部中央位置亦會有 TCL 銘牌； 指示燈和遙控信號收發區域亦位於電視主體的底部，而指示燈是可以選擇完全關閉。
▲ 電源鍵位於機身底部中央；我們從下方向上望，TCL C635 的機身並不薄，原因是強勁的喇叭系統物理上佔據了一定的體積空間。
▲ 機背簡潔，看不到任何 I/O 接口，TCL C635 的 VESA 開孔位置是中央偏下，因為重量側重於機身下方，連腳架重量不到 11 公斤。
▲ 機身接口相當齊全：USB 2.0、 RJ-45、 HDMI X 2、電視天線訊號；
▲ 光纖信號、HDMI、USB3.0、AV 三色線和 3.5mm 耳機孔；而 C635 亦具備藍芽 5.0 和雙頻 WiFi 制式，5GHz WiFi 連接能抗干擾和保證無線網路質素。
系統介面
▲ 一如過往，TCL C635 亦預載 Youtube、Netflix 等香港人常用的第三方網路串流平台。
▲ 內置聲效設定亦相當完善，例如播歌期間可以關閉屏幕、各種音效增強模式。
▲ 如果嫌太複雜，TCL 亦提供懶人設置模式，不論是圖像和聲效都交給系統自行判斷。
▲ 強烈建議長期打開 Dolby Atmos 聲效，不論是音樂或電影聲效瞬間更立體、置身當中的感覺會更強烈。
視聽效果
▲ TCL C635 搭載 QLED 顯示技術，DCI-P3 覆蓋達 93%，配合 Dolby Vision 規格認證； 觀看 Demo 片的感受：畫面真係好亮麗，層次明顯，色彩豐富，可視角度亦相當廣闊，並沒有明顯偏色的情況。
呢度要講多少少關於電視機的顯示效果，好多唔太熟悉廣播或者電視技術的朋友，落去鋪睇完比錢買新機，返到屋企就話：點解自己收到部機同鋪頭睇有好大分別，好似無咁靚？ 其實好多時候原因係，你部電視太靚啦！ 唔少朋友買 4K HDR 技術加持的電視，但又真係好老實咁睇電視。 睇電視廣播訊號的內容，是沒有畫質可言。香港大台發射出黎的電視訊號畫質差，無辦法完整展示你部新機的實力。 如果要測試，最簡單的方法是連接 5GHz WiFi 進入 Youtube 或者 Netflix，選擇 4K 解像度的影片。呢個亦都係我成日講：「靚 Sources 唔夠多係高級電視的煩惱」。
▲ 針對 ONKYO 喇叭系統，影片內有一連串的播放試聽。雖然 2 X 10 的 ONKYO 喇叭是 2.0 聲道，但大家不妨留意鼓聲低音的表現，相當厚實有力，低頻推力質素好； 而歌手谷上高音聲域時喇叭亦游刃有餘，只開三份一音量亦已經足以充滿整個 200 呎的小房。 配合 Dolby Atmos 立體感十足，尤其適合演唱會或電影播放內容。
總結：抵玩、好玩、必玩！
最近幾年本地電視機市場，TCL 絕對是其中一個主力玩家，性價比奇高吸引不少嚐鮮客。在預算不多的情況下，要玩新技術、要有靚畫面。今次 C635 連 Sound Bar 都覺得多餘，直頭內置 ONKYO 喇叭幫你節省空間，滿足晒、甚至超乎一般家庭的娛樂享受！ 開箱之夜，獨自在房內埋頭設定，然後聽歌、睇戲，而屋內的成員由「嗤之以鼻」到「搶遙控」變化之大，亦說明 C635 是憑實力說話。愛上睇電視，或許需要很多優秀電視節目，但愛上睇電視機，只要一部靚機就可以了。