13 吋靚芒「無 M 字額」，首次植入 iPhone 晶片
今次 MacBook Neo 最大嘅賣點，就係佢打破咗近年 Mac 機嘅常規，並無採用 M 系晶片，而係用上咗同 iPhone 16 Pro 同級嘅 A18 Pro 晶片（配備 6 核心 CPU、5 核心 GPU 及 16 核心神經網絡引擎）。對於日常上網、睇片、做功課，甚至係應付裝置端嘅 AI 運算，呢粒晶片絕對綽綽有餘。外觀同屏幕方面，MacBook Neo 都為大家帶嚟驚喜：
- 13 吋 Liquid Retina 屏幕： 解像度為 2408 x 1506，具備 500 nits 亮度同防反光塗層。
告別「M 字額」： 屏幕採用咗無瀏海（No notch）設計，成塊屏幕觀感更加順眼！不過留意返，佢只支援 sRGB 色域，並非高階機常用嘅 P3 廣色域。
- 四款搶眼新色： 採用無風扇鋁金屬機身設計，提供銀色 (Silver)、靛藍色 (Indigo)、胭脂粉 (Blush) 同埋全新嘅柑橘色 (Citrus)，鍵盤部分亦會用上較淺嘅同色系配搭。
規格有取捨：Touch ID 竟然要加錢？
雖然賣得平，但 Apple 刀法依然精準，MacBook Neo 喺某啲硬件規格上確實有明顯嘅妥協，大家買之前一定要睇清楚：- 統一 8GB RAM： 全線只有 8GB 記憶體，完全無得加錢升級更高容量。
- 指紋解鎖被限制： 入門版 256GB 係無 Touch ID 嘅！如果想要指紋解鎖，就必須硬食 $5499 嘅 512GB 版本。
- Cut 走 MagSafe 同閹割 Type-C： 雖然機身左右各有一個 USB-C 接口，但一邊係 USB-C 3.0，另一邊只係得 USB-C 2.0 速度。此外，佢亦無配備 MagSafe 磁吸充電。
其他週邊配置方面，MacBook Neo 配備 1080p FaceTime 鏡頭、雙波束成形咪高峰、支援空間音訊嘅雙側邊揚聲器，並保留咗 3.5mm 耳機孔。連線方面則支援 Wi-Fi 6e 同最新的 Bluetooth 6。至於續航力，官方聲稱最長可達 16 小時。