本地 SIM 方案，最平用乜上網
今次版主分享，會係香港可以預備，唔駛落地去搵 SIM 嘅方案。香港預備定好處係，唔怕落機係機場仲要搵餐死或語言不通。未過關已可以係 WhatsApp 報平安。當然，版主都歡迎你分享落地買 SIM 最平方法，我分享呢D ， 大家再分享更好嘅！羊年開心 Share!旅遊日本 - 富士卡 / Happy Telecom / 中國移動香港
版主早前分享過日本上網專用嘅富士卡，以又平上網速度合乎預期為賣點，唔少朋友用過都讚。富士卡其實係中國大陸出品，但出奇地接通到 Facebook、Google 動新聞！係呢到提提，平價富士卡，係深水埗桂林街，好多 SIM 檔都有，不過，SIM 檔把不同用量的日本上網 SIM 分左類，富士卡只有 1.2GB 用量版本，3GB 版本已絕跡。七日 5GB 用量變左推 Happy Telecom（其實係中國聯通日本上網卡變種)，再有 20GB 用量用七日嘅中國移動香港 3G日本數據卡。三個價由平至貴，SIM 檔其實好識做生意，連 Product 種類都幫你分埋。關於富士卡實測 : 版主東京行！中國聯通富士卡 七日漫遊上網 新嘗試
關於中國移動香港日本漫遊卡：中國移動香港漫遊數據卡消息：韓國／台灣 ＋新加坡 + 日本
▲ 售價 :富士卡 約 $120 (1.2GB 用七日) 。售賣地點：深水埗桂林街。
▲ 售價 : Happy Telecom 日本上網卡 約 $198 (5BGB 用七日) 。售賣地點：深水埗桂林街。
▲ 售價 : $288 (20BGB 用七日) 。售賣地點：中國移動香港門市。
▲ 特價 : 約 $250 (20BGB 用七日)，售賣地點：深水埗桂林街 。
▲ 最平售價： $248 ，售賣地點: (1cm) 網站。
旅遊韓國 - 中國移動香港 3G 南韓數據卡
其實中國移動香港跟中國聯通香港係旅遊上網卡鬥得好厲害，大家都有韓國上網卡， 都係七日有 5GB 用量，版主會揀中國移動香港個張，因為呢張卡係中、韓兩地都用得到，開卡即用，用得晒當然最好，用唔晒返來香港幫補一下數據用量都唔錯。而中國聯通香港個款，就送了首爾免費 WiFi，不過都有 SIM 卡啦，5GB 用七日數據量都夠多，WiFi 變得可有可無。最主要係出發前上網登記，太麻煩。關於中國移動香港漫遊卡：中國移動香港漫遊數據卡消息：韓國／台灣 ＋新加坡 + 日本
▲ 原價：$288，售賣地點：中國移動香港門市。
▲ 特價：$183，售賣地點： (1cm) 網站。
▲ 最平售價：約 $160 (5GB 用七日，中韓聯用)，售賣地點：深水埗桂林街。
旅遊台灣 - 中國聯通「台灣七日上網」卡
好多人都會覺得，尤其日間桃園機場落機嘅網友，落地係機場買 SIM 最抵。版主朋友石先生都 Share 佢嘅體驗。但若果你係台中、高雄落機，或者你要坐深夜機，係香港買 SIM 卡都唔算貴。版主推介中國聯通嘅「台灣七日上網」卡，包左七日 3GB 後限速嘅無限上網，仲送 100MB 中港數據，等你係香港機場用。
▲ 原價：$199，售賣地點：中國聯通香港門市。
▲ 最平售價：約 $150 (5GB 用七日，中韓聯用)，售賣地點：深水埗桂林街
旅遊泰國 - Happy SIM
真係無敵！呢張 Happy SIM 其實係泰國本地 SIM。泰國跟香港一樣，買 SIM 卡俾錢就得，唔駛登記，所以當地 SIM 卡都係香港買到，仲係平過係當地機場入貨! 一張 Happy SIM 除了包七日 1GB 後限速上網，仲有 33 分鐘可以俾你打番香港！不過，要注意係，Happy SIM 選用嘅 3G 網絡，以 850 為主頻段，香港用開的 2100 是近年才建成，若果你部手機同時支援 3G 850 / 2100 會收得比較好。
▲ 最平售價：約 $50 (1GB 後限速無限上網， 用七日)，售賣地點：深水埗桂林街
旅遊中國 (高速版) - 中國聯通中港七日上網 SIM
香港人返大陸都唔會用當地 SIM，主要因為 Google、Facebook、動新聞全部唔俾用。好采香港賣嘅儲值卡 are OK! 呢張中國聯通中港七日上網 SIM，包了 1GB 七日用量。若果你只係去廣東省，有另2張 跨境王粵港共用上網卡，有 1GB 及 3GB 用量選擇，開卡可以用 90 日，寫明只可以係香港及廣東省內使用。呢兩張卡都係 Facebook Friendly，大家放心用。有關另一張大中華，中港台澳都用到嘅 1GB 漫遊卡
有關中國聯通嘅跨境王儲值卡：中國聯通跨境王新版! 一卡兩號儲值卡比拼
▲ 原價：$150 (1GB / 7日）。售賣地點：中國聯通香港門市。
▲ 最平售價：$135 ( 1GB / 7日）。售賣地點：深水埗桂林街。
▲ 原價：$299 (3GB / 90日） 、$129 （1GB / 90 日)。售賣地點：中國聯通香港門市。
▲ 最平售價：$260 (3GB / 90日） 、$98 （1GB / 90 日)。售賣地點：深水埗桂林街。
旅遊中國 (低速版) - 中國移動香港漫遊儲值卡
中國聯通嘅中港上網 SIM，用中國大陸中國聯通嘅 3G WCDMA 網絡，上網速度跟香港 3G 差唔多。不過，若果你仲想收費平 D，又唔介意上網慢 D ，不如用中國移動香港漫遊儲值卡，若果只係用來上網，呢張卡好處係唔收每月行政費，唔用可以擺埋佢最多 180 日。返大陸上網，逐 MB 數據扣錢，3.8/MB，但每日有封頂 $48，簡單來說 $48 無限上網。若果你有中港 3G / 4G 手機，即支援 3G TD-SCDMA 網絡，就可以係大陸用到跟香港限速 3G Plan 差不多的速度上網，若果你無呢 D 手機，就會用 2G GSM。中國移動香港漫遊儲值卡係大陸上網都係 Facebook 同 Google Friendly。有關中國移動香港 2G 儲值卡特別用途：
$50 4G LTE 無限一個月任用! 瘋狂試玩 CMHK 4G LiTE
$20 玩 30 日無限 Data＋ WiFi ！版主教路買平價儲值上網卡
▲ 原價：$88，售賣地點：中國移動香港門市。
▲ 特價：$73，售賣地點： (1cm) 網站。。
▲ 最平售價：約＄55，售賣地點：深水埗桂林街。
旅遊澳門- 3 澳門澳門遊預付卡 / 港澳游預付卡
澳門上網 SIM 卡，可以有好多選擇，先來高用量。版主推介 3 澳門澳門遊預付卡，呢張卡雖然係澳門出品，但係深水埗一樣有得買。包左三日共 8GB 3G 上網。若果只係用得少，不如買張港澳游預付卡，呢張卡開到 4 日澳門數據服務，每日 100MB，少用量的最好不過。提提你港澳游預付卡是逐日開 Plan，若你只係 One Day 澳門 Trip，仲可以開到 9 日香港 5GB FUP 3G 無限上網數據，計落有賺。
▲ 最平售價：$90 (8GB / 4日） 、售賣地點：深水埗桂林街。
▲ $65（$186 面值，$38／日，100MB 澳門上網)，售賣地點：深水埗桂林街。
歐洲 6 個 + 加拿大 - 3 香港「歐洲」漫遊流動數據儲值咭
以前版主介紹過，呢張 3 香港「歐洲」漫遊流動數據儲值咭，包括 14 日係英國、瑞典、意大利、丹麥、奧地利、愛爾蘭及加拿大無限上網。若果你去呢六個國家，想係香港準備 SIM 卡，呢張卡基本上係不異之選。詳細介紹：歐洲漫遊最平每日 $23 無限上網
▲ 原價：$328，售賣地點：3 香港門市。
▲ 最平售價：約＄288，售賣地點：深水埗桂林街。
歐洲 33 個 - SimplyRoam 歐洲通
歐洲上網費好貴！若果你唔係上面個六個國家，得番以下呢個選擇。 SimplyRoam 歐洲通係荷蘭 KPN 網絡商產品，等你可以用一張 SIM 卡，去到世界不同角度都上到網。SimplyRoam 歐洲通係香港、中國大陸及台灣都有代理化身成不不同 SIM 卡，香港呢？版主搵到中國聯通以「歐洲上網卡」出售。呢張卡係中國聯通網站已消失，但係深水埗仲有得賣，$550 包三十三個歐洲國家一個月共 500MB 數據！香港有一間小型網店 Bookingsim 以自己品牌賣緊同一類產品，但卡價只係 $480。Bookingsim 更寫明可以係 Simplyroam 網站為 SIM 卡增值，500MB 用爆左都唔怕。
▲ 售價：$550，售賣地點：深水埗桂林街。
▲ 售價：$480，售賣地點：Bookingsim.com
美國 - 美國30日無限通話上網 SIM
呢張卡係美國 Ultra Mobile 出品，係佢地 Ultra Orange 上網卡，由香港中國聯通代理。收費方面，聽落好抵：包括三十日無限美國上網及無限打電話香港。不過，有兩點要注意，首先呢張卡，唔係一插即用，要經過係美國本地 SMS 開卡，或者由手機瀏覽器開卡。此外， Ultra Mobile 係美國用 T-Mobile 網絡，香港好少手機兼容用到。你要Check 一 Check 自己部機係咪支援 3G WCDMA 1700 + 2100 (AWS) 2G GSM 要支援 850 與 1900 頻段，唔係連打電話都打唔到。此外，版主查過 Ultra Mobile 網站，沒有全速無限上網計劃，你要預左可能用用下變限速，得番 128kbps 速度。
▲ 最平售價：$299，售賣地點：中國聯通網站
▲ 售價：約 $398，售賣地點：深水埗桂林街。
One2Free 160 卡
版主第三次提及呢張神卡了，之前已有兩篇文章介紹過。係呢到簡單講講，呢張卡俾你申請每日 100MB 數據計劃，覆蓋亞太區、澳洲及紐西蘭十一個地區! 用呢張卡，平均每日 $17 上到網，用到九日，最平方案無可比。有關 One2Free 160 卡資料：
抵玩漫遊卡：日韓台星 + 澳紐 上網逐日計 $17
SIM 檔神卡，解 One2Free 160 卡無限上網之謎
▲ 最平售價：$160，售賣地點：深水埗桂林街。
終極：$22 全球用 WhatsApp
上面提及地國家地區，相信已有三十幾四十個！若果你打算係 28/2 之前出發，仲要唔係去上面提及國家，版主一樣有方法，令你每日 $22，Keep 住同家人日日 WhatsApp! 圖中個張 PCCW-HKT All-in-One $98 儲值卡，有一批係 28/2 係最後開卡日嘅卡，深水埗桂林街大特價 $25 一張，$110 五張，平均 $22 一張。玩法係咁：PCCW-HKT 品牌全線 SIM 卡 (記住，唔係 CSL 都唔係新 csl. ) 都開到 $88 / 20MB 嘅漫遊數據套餐，張卡面值 $98 即係開到一日。你要用一日就買一張，五日就五張，如此類推。跟住香港時間每日凌晨 12 點換卡 (反正你唔換，都唔比你再用，你一定記得)，咁每日就有 20MB 你用。20MB 都夠你send 收大量 WhatsApp 文字訊息！呢張卡上網覆蓋達 134 個漫遊地方，連南美巴西都有。
▲ 最平售價：$25 / 張、$110 / 五張，售賣地點：深水埗桂林街。
ePrice.HK 儲值卡分享與報導
1) 歐洲漫遊最平每日 $23 無限上網
2) 抵玩漫遊卡：日韓台星 + 澳紐 上網逐日計 $173) 版主東京行！中國聯通富士卡 七日漫遊上網 新嘗試
4) 中國聯通跨境王新版! 一卡兩號儲值卡比拼
5) 台灣大哥大推台灣 4G LTE 上網儲值卡
6) 中國移動香港漫遊數據卡消息：韓國／台灣 ＋新加坡 + 日本
7) $58 / 1.8GB 用半年! 7-11 本地八達通儲值通話卡 平價上網
8) 中國聯通跨境王新版! 一卡兩號儲值卡比拼
9) $50 4G LTE 無限一個月任用! 瘋狂試玩 CMHK 4G LiTE
10) $20 玩 30 日無限 Data＋ WiFi ！版主教路買平價儲值上網卡
11) 版主教你: 一蚊雞玩 WhatsApp ! 每月加 300 分鐘 $36 攪掂
12) 台、日、英、韓有齊！$80 買 SlimDuet 一卡用多國漫遊方案抵唔抵？
13) SIM 檔神卡：揭 One2Free 160 蚊無限上網儲值卡 身世之謎
14) SIM 卡唔駛買! 版主教你 零蚊係東南亞用 WiFi 上網