又係一年一度的 Google I/O 大會，每年發表的主角係乜，基本上就算未有發佈會，大家都可以估得多。前年係 Android 6.0，上年就 Android 7.0，今年都唔會令大家失望，發表了最新 Android 8.0，亦即是傳聞所說的 Android O。不過，Android 7.0 都仲未普及，好多手機都仲未有得升級，就已經話 Android 8.0，版主心諗，其實我唔要求好多，俾我快啲有得升 Android 7.0，我已經好滿足 (用緊三星 Note 5)...... 不過點都好啦，既然 Google 有新嘢，版主都係要同大家介紹一下，最新 Android O 是甚麼一回事嘅～睇下文啦！
重點 001: 新增「畫中畫」(Picture-in-Picture) 功能
這個功能指的，並非是平時輯圖軟件中的「畫中畫」，而是讓你可以更方便的進行多工程序，特別是當你睇緊片的時候，只要按一按 HOME 鍵，就能夠將影片個畫面縮小，同時你可以繼續做其他你要做的事，例如碌 Facebook、寫 Notes 等等。呢個功能暫時可用於 YouTube、Netflix 以及 Google Maps，當 Android O 正式推出的時候，將會支持更多的應用程式。
重點 002: 新增 Notification Dot
呢個功能主要係當你嘅應用程式有新的動態，例如 Instagram、Facebook 等等，就會在應用程式的 icon 出現一個點，話你知有新動態。而你要睇有啲乜嘢通知，除左可以用下拉式通知欄外，亦都可以長按應用程式 icon，唔使打開應用程式都睇到通知。
重點 003: 加入 Autofill with Google 功能
即係而家 Android O 唔單止係 Chrome，就算係其他所有的應用程式，都可以用到 Autofill 功能，例如你剛剛轉左一部新的手機，然後打開 Facebook / Twitter，因為你平時用 Chrome 開 Facebook / Twitter 都係用同一個 account，所以佢亦都會自動在應用程式中建議用戶名稱、密碼等等，咁登入社交軟件就會更加方便、容易。
重點 004: 加入智慧文字選擇功能 (Smart test selection)
呢個功能主要係方便我哋平時 copy & paste，例如你想在一段文字中，選擇 "bite" 呢個字，只要 double click "bite"，佢就會自動幫你選擇 "bite"，呢個時候你就可以繼續複製、選擇全部等功能。無乜特別？睇埋落去。假如你想在一段文字中 copy 一個地址，以往你可以自行選擇文字的範圍，但而家只要你在地址任何位置雙擊，系統就會自動辨識並選擇完整的地址，不特止，仲可以快速進入地圖。
重點 005: 加強 Google Play 應用程式的安全性
要知道 Google Play 內的應用程式有好多，所以由 Android O 開始，Google 每日都會持續檢查 50 億個應用程式，確保你所安裝的應用程式，並沒有對你的裝置造成威脅。
重點 006: 應用程式啟動速度快 2 倍
Google 表示 Android O 能夠優化智能手機的性能，在開啟應用程式方面，啟動速度能夠比以往快 2 倍，並且能夠讓你的操作更順暢。
重點 007: 比以往更慳電
大家都知道，好多時候你以為自己無開住好多應用程式，但實際上有不少應用程式都在後台運行着，導致電池不斷消耗，用電好快。而 Android O 就會提供一些智能慳電措施，保護電池壽命。
重點 008: Android O Beta 測試版即日推出
只要你是 Nexus 5X、Nexus 6P、Nexus Player、Pixel C、Pixel 以及 Pixel XL 的用家，就可以註冊搶先測試 Android O 預先發佈版。而當 Android O 正式發佈後，你亦可以繼續參與 Android 測試計劃，搶先體驗之後的 Android O 維護發佈版 (MR)。
立即加入Facebook 專頁，新聞／消息／優惠，最快知。
