Flickr 刪你相片點算好? 親測免費 Win / Mac 工具 100% 搶救!

YKer 2018-11-04 15:54 | 情報分享
真係不得了!本 YK 一直大力推薦 Flickr,皆因免費 1TB 原相無壓縮分享空間,簡直係攝影師備份 / 分享相片的最佳平台。但早幾日出嗮通知話要改版,好多用戶都仲係懵懵地未知發生咩事:Flickr 會自動刪除你相片呀! 本 YK 當然有辦法應對,下面就立刻同大家分享。

IMG_20181104_171244.jpg

雖然連 Content Farm 都鋪天蓋地同大家講 Flickr 改政策一事,但同不少攝影師朋友們閒聊都發現,無幾多個重視,即使知道都唔清楚可以點樣應對。如果你放左好多相片係 Flickr,而 Flickr 又係你主要的存放空間,你最好睇我下面寫嘅野。

Screenshot_2018-11-04-15-38-00.jpeg
▲ 官方中文宣傳寫到好似大喜訊咁,其實係大災難,隨時你所有作品、美好回憶一鋪清袋!

Screenshot_2018-11-04-15-38-55.jpeg
▲ 魔鬼細節:「在 Flickr 上載超過 1,000 張相片或段影片的免費會員,可於 2019 年 1 月 8 日 (星期二) 前升級到 Pro 或下載超出上限的內容。在 2019 年 1 月 8 日之後,超出內容數量上限的會員將無法再上載新相片至 Flickr。在 2019 年 2 月 5 日之後,我們會開始為免費會員主動移除超出上限 1,000 項的內容,從最舊到最新依次移除,以符合新的內容數量上限。」


官方兩種打包方法
如果你目前存放在 Flickr 的相片少於 1000 張,你可以翻出去;但如果相片超過 1000 張,又唔想咁快課金,你必須留意三個重點:
一、2019 年 1 月 8 日後,不能再上傳新相片;
二、2019 年 2 月 5 日後,除了最近上傳的 1000 張相,其他一律自動幫你刪除;
三、2019 年 1 月 8 日,官方叫你係呢個日期前下載翻自己現有的相片,否則後果自負。


Screenshot_2018-11-04-16-07-29.jpeg
▲ 你登入 Flickr 後,可以在賬號設定頁面內找到上述項目,可以提出要求下載你所有的賬戶資料,包括相片、影片。但全世界咁多用戶要求打包,我排隊排到 2046 都未收到電郵通知!

Screenshot_2018-11-04-16-14-09.jpeg
▲ 另一個等得快少少的方法係,去相簿頁面逐個相簿 Click 下載,都係要等 Flickr 伺服器打包好之後,一個相簿都會分成 N 個壓縮檔比你下載,然後你自己解壓合併翻做一個相簿。


打包神器 Flickr 小幫手
本 YK  認識一些朋友擁有幾個 Flickr 賬號,每個都係打爆嗮 1TB,又有好多個相簿。如果要逐個下載或者等官方打包服務,真心等到聖誕都未知搞掂未,分分鐘等到佛誕 Flickr 幫你刪除嗮相片後先下載得到。

網絡上唔少第三方工具,因為 Flickr 成日改機制的緣故,大部分第三方工具都死得七七八八。我下面推介一個台灣神人編寫的,名為「Flickr 小幫手」的神器,本 YK 親自測試過,一晚將我所有相片打包落黎,完全無遺漏!

Screenshot_2018-11-04-15-41-54.jpeg
▲ 目前版本係 v1.3,支持 Win 和 Mac 兩大主要平台,但需要用到 JAVA 套件,如果你電腦本身無就去 Java 官網免費下載。

Screenshot_2018-11-04-15-43-23.jpeg
▲ 工具本身支持正體中文界面,裡面有齊全的教學,基本上你唔係文盲都懂得用,我都費事多講。

但有幾個注意事項,本 YK 要同大家講解下,令各位 Flickr 苦主都可以順利下載自己的相片、影片:
一、因為下載需時,請不要將電腦設定為限時休眠 / 硬碟省電;
二、你要下載原圖的話,請在設定內確定一次是否已選擇原圖;而原圖佔硬碟空間最大,確保你要下載的相片、影片總大小,比你目前的 HDD / SSD 可用空間大,否則請更改下載位置到擁有足夠可用空間的外置硬碟;
三、請將你 Flickr 的相片、影片設定為公開、隱私設定也設定為任何人,確保工具能完整讀取你的相片、影片;

跟住你就可以順利下載翻自己的相片、影片,訓醒之後就見到所有回憶都已經追回來、成功脫離 Flickr 的魔爪! 但需要注意,神器會將影片副檔名都改為 JPG,所以你需要人手改動為 mp4 副檔名。神器可以在下方的原作者 Blog 下載,如果失效了請 PM 本 YK,我應該會有備份檔。


來源:Flickr 小幫手網頁介紹
 

最新新聞