行貨用 $2,098 入手 LG G3 Beat ？HTC Desire 816 LTE信用卡有得平！
LG G3 Beat 係呢個星期先剛剛上市既新機，咁快就有得減價？其實版主係發現衛訊既「買 $5,000 減 $1,000」優惠適用於同一張帳單，所以賣價 $2,598 的 LG G3 Beat 兩部剛好 $5,196 ，如果同時買兩部就平均每部平 $500，變相 $2,098 就可以入手。其實 LG G3 在入門 4G 機中都算中規中矩，有 5 吋 720 x 1280 解像度屏幕、Qualcomm S400 1.2GHz 四核心處理器、1GB RAM 、8 GB ROM (可外置插卡），賣點就是有鐳射對焦的 800 萬像素主鏡頭以及 2540mAh 電池可以更換，版主問過衛訊入手會多舊電，亦方便大家使用啊！另外版主之前同大家講過， 如果有匯豐信用卡的話，可以在 csl. 以 $2,398 入手 HTC Desire 816 LTE，雖然每人限買一部，但係唔需要上台架！而 HTC Desire 816 既優點就係有 5.5 吋既 720p 大屏幕， Qualcomm Snapdragon 400 1.6GHz 四核心處理器、1.5GB RAM 雖然都係入門水平，但版主上手用過流暢度都算不錯，手機採用 1300 萬像素和 500 萬像素的鏡頭配搭亦係入門級中較高的規格。
當然，網友們如果預算去到 $2,500 左右又追求規格，還有一部 ZTE 的天機 Grand S II LTE，5.5 FHD 屏幕、 Qualcomm S801 2.3GHz 四核心處理器、2GB RAM 、 16GB ROM（可外置插卡)，1300 萬像素鏡頭和 200 萬像素前鏡頭，3100mAh 可換式電池，各方面都同旗艦接近，會唔會係你心水？
▲這是 csl. 的匯豐卡優惠，不用上台，但每人只可以買一部。
平價玩 Qualcomm S801！nubia Z7 Mini 賣 $2,340 有交易！
不少入門 4G LTE 手機會都會採用 Qualcomm S400 處理器，如果想要處理速度更快的手機，其實大陸水貨，韓國水貨都有選擇。就好似版主之前同做家做過跑分既 nubia Z7 Mini ，福仁的細鋪大約賣 $2,340 左右，它採用的是 5 吋 FHD 屏幕、 Qualcomm S801 2.0GHz 四核心處理器， 2GB RAM ，內置 16GB 容量，並採用了 1300 萬像素主鏡頭和 210 萬像素前鏡頭的組合，加上 2300mAh 是可換式也附合不少網友要求吧！根據版主之前做的測試，這部手機在安安兔的跑分及不上其他 Qualcomm S801 2.3GHz 的機款，可能因為時脈不夠快的關係吧，可是 Basemark 2.0 亦有著滿分的水準，圖像處理其實也夠玩不少遊戲了，而且它是支援五模多頻的手機，就算在大陸亦可以用到 3G/4G ，在比 OnePlus One 便宜的價錢下，又會唔會有網友揀佢呢？
▲nubia Z7 Mini 有著 5 吋屏幕，亦有 5.5 屏幕的 nubia Z7 Max ，場價大約 $3,040 左右
韓水 Vega A880 賣 $2,280！跟機 3100mAh 大電量電池 x2 ！
係早一兩年，韓國水貨相當流行，其中一個原因就係韓國水貨可以用到香港的 1800MHz 4G LTE ，而隨著韓國開放 LTE-A ，韓水亦支援到 1800+2600 MHz 的頻段。另外韓國水貨價錢亦降得很快，成為不少網友的性價比之選，在這個時侯 $2,000 頭的韓水有什麼好選擇呢？大約係 1 年前登陸香港既 Vega A880 最近的價錢賣 $2,280 ，這部手機採用的是 5.6 吋 FHD 屏幕、 Qualcomm S800 2.3GHz 四核心、 2GB RAM 、 16GB 容量（可支援外置插卡）、1300 萬像素主鏡頭和 200 萬像素前鏡頭、內置 3100mAh 大電池可以更換，韓水亦會跟兩電兩充。雖然它是採用 Qualcomm S800 的舊一代處理器，其實效能與上面介紹的 nubia Z7 Mini 相去不遠，而有更大的屏幕、電量也是它的賣點啊！
講到 Vega ，版主亦有留意到最近傳出這間韓國手機公司無力還債申請破產，不過就版主所知道韓國的客服還在營運，也希望這家公司可以做下去吧
。
▲除了 A880 之外，前一代的 A860 和 A870 價錢都在 $2,000 樓下，大約賣 $1,980 左右，可惜用更舊的 Qualcomm 處理器
▲對了，韓水版的 LG G-Flex 定價 $2,480 ，比起行貨便宜大約 $1,500 ~ $2,000 左右，版主感受過機背，與行貨號稱可以「自動修復」的質感有點不同，不過這部曲屏幕的手機應該也會成為大家的回憶，有網友會買來玩嗎？
題外話：中移動 and M811 傳聞 $1,000 樓下？店員：等公佈！
如果網友預算真係好有限，係想要一部好平既 4G LTE 手機，可能等多幾日有驚喜。正如今日中國移動香港宣佈， and M811 會係近日登場。號稱要「挑戰性價比極限」既佢會賣幾多錢？版主有參考過網友既留言，有人認為大陸賣 $799 人民幣大約係 $990 港幣，這部機會係 $1,000 樓下；當然亦有網友估上台價會再減一截，或者係 $500 左右有交易？版主 Eddie 今日就去左中移動門市問店員，佢地就話未有確實價錢同埋月費，一切都要留意中國移動香港的官方 Facebook 公佈，版主一收到消息就會同大家分享，大家記住留意 ePrice HK 既更新啦！
▲中國移動香港的門市已經展示了 and M811 的 Dummy ，也許在這兩天就會開賣，大家要留意啊！
![[網友分享] HTC Desire 816 4G LTE 試拍試玩](http://img.eprice.com.hk/img/news_hk/12163/large.jpg)
