主題:儲值卡實名制,版主分析有乜利與敝

ePrice HK
  • 發表時間:2021-02-10 20:18
    政府開始為手機儲值卡實名制嘅咨詢。大家有睇開 ePrice.com.hk 網站,就會知道版主一向都係玩開呢啲儲值卡,甚至唔少「行家」都會叫版主 Keith 就卡神,真係除咗版主阿坤之外,最熟都係我。但係嗰咨詢都過咗咁耐,版主「錦鯉有乜膠見」,好啦,今次同大家分享一下我嘅睇法。

    儲值卡實名制,版主分析有乜利與敝
     

    呢個係有聲 Post,下面有聲音檔案


     

    兩個唔 Like 儲值卡實名的主要原因

    其實,大家唔鍾意儲值卡實名制,主要係兩樣嘢,比較政治向係,SIM 卡實咗名,全人類咪畀人監控?但更加多人會批評,以後買卡,係咪仲係咁方便;儲值卡仲係咪好似今日咁,可以揾到咁平嘅選擇。仲有呀,要係 SIM 檔做實名,我嘅私隱又點樣受到保障。

    儲值卡「隱姓埋名」? 唔識用一樣死

    首先,我哋探討一下,加陣可以「隱姓埋名」嘅儲值卡,係咪真係可以保障郅你嘅私隱。儲值卡,唔係得街邊 SIM 檔先可以買得到。csl、CMHK、3HK 甚至 SmarTone 嘅網站,都可以買到,信用卡上網買嘢,有份儲架!加埋免費送貨嘅話,即係話畀網絡商知,呢張卡,係我買架!又例如大家都想嗰號碼跟住自己,帶號碼轉台,咪一樣要身份證明登記,只要你帶號碼轉台,其實同實明無乜好大分別。

    儲值卡實名制,版主分析有乜利與敝

    就算你去街邊買儲值卡,若果你去門市,甚至去便利店。其實,網絡商出貨,都有 Mark 住記錄,加埋一街咁多天眼同埋閉路電視,如果有心人呀要去查返呢一張卡係邊個批次,喺幾時落到嗰間舖頭,佢要再查番啲閉路電視紀錄,係煩啲嘅,但係唔係難㗎!咁所以你話就算唔實名制,如果你買卡嗰陣時唔小心,用卡嗰陣時唔小心,最要堅持一定要 keep 住你個儲值卡號碼,但轉頭又話你要轉台,你嘅私隱一早已經冇保障㗎喇! 

    儲值卡實名制,版主分析有乜利與敝

    實名係咪麻煩到震

    唔講乜嘢政治與隱身問題,相信更多網友會關注,政府要儲值卡實名,每個人幫襯一個品牌嘅 SIM 卡,只能開三張,有數目限制,仲有要將身份證畀 SIM 檔,咪玩啦。其實政府就講咗幾句㗎啦,SIM 卡實名,又未必大家想像中咁麻煩。

    根據政府嘅解釋,佢哋會要求承辦商,主要係 MVO (四大網絡商)、MVNO (租網又有獨立牌照嗰啲) 要建立一套可以網上做實名登記嘅系統。所以,你係街邊 SIM 檔都一樣可以自由買卡,你揾信興姐?火爆哥?佢哋都唔會求你俾張身份證佢哋實咗名先嘅。睇得呢篇文,相信對手機上網都唔會有困難,網上實名,應該難唔到你。咁年紀大嘅「癈老」又點?嗰啲真係要求下火爆哥幫手架啦,或者自己去 csl,CMHK 等嘅門市攪囉。咁細嘅 MVNO 台,好似乜嘢 Happy SIM、Luckily SIM 無門市又點算?老實,呢啲細台,未來嘅 SIM 卡,係唔會再平到。政府要求加器材,儲值資料全部都要錢,成本貴咗,仲會蝕俾你?

    係咪會加價?

    另外,大家最擔心,可能係,咁仲有無平價上網卡?我睇法係,唔駛咁擔心。大家近期最留意邊張儲值卡?相信一定係百佳 SoSIM。呢張卡,係 3 香港自己推出架,bypass 晒全部代理,MVNO 都唔駛用,唔駛再依靠佢嘅合作單位,即係「萬能卡」嘅代理。而有留意 ePrice 嘅報告,剛剛中國移動香港都進行咗反擊。其實,儲值卡一直都係網絡商,充大自己客戶數目嘅招數之一,今次政府攪網絡商,佢哋唔會出招嗎?其實,網絡商痴線起上嚟,為左客戶數目,為咗業績,係可以做好多嘢,例如推出更平價嘅 SIM 卡,去搶市場。實名制都未發生,SoSIM 都平到咁誇張,你估之後,會點?

    儲值卡實名制,版主分析有乜利與敝
     

    三張 Quota 會改嗎

    另外,大家最反感,相信係政府提議每人只可以擁有每間承辦商三張 SIM 卡。係人都知唔夠啦!但細心唸下都知,唔駛咁擔心,三張 SIM 卡呢個 Quota 係製造一個話題畀大家討論,大家圍住係咪三張去意見,最後放生比番十張廿張你用,又有乜問題?反正每一個號碼,佢都知道係邊一個人用架,三張定十張,唔係好大分別,分別就係扮下會聽下民意咁囉。

    最後,我想講嘅,就係雖然你會覺得政府嘅諮詢未必有用,佢都唔會聽你嘅意見,不過反正佢都開咗度門,你有意見,記得大大力講番畀佢知。我唔係叫你反對實名制,但係你真係反對,都係 Send 個 Email 比佢哋知,記得加埋少少理據。有無用?我鬼知咩,唔 send 就一定無用。最後講句:有無得避,我覺得你要一個香港號碼儲值卡,就一定無架啦。

    詳情呢度:https://www.eprice.com.hk/mobile/talk/4247/217687/1/ 

    多謝支持 ePrice.HK

    立即加入Facebook 專頁,新聞/消息/優惠,最快知。

    01樓 ▲TOP 回列表頁