三星 S23 Ultra 相機功能有升級！呢幾方面完勝 iPhone 14 Pro Max

左定坤 (Cho Ting Kwan) 2023-02-02 02:00 | Samsung

好多人會問，今時今日想影相靚，買邊部手機好？一般嚟講，如果你唔係乜專業影相人士，我一律會建議用 iPhone 啦，簡簡單單，無乜花巧功能，就算你係一個唔識影相嘅人，只要你有一定審美眼光，揸住部 iPhone 求其影，基本上都可以影到質素唔錯嘅相片。不過，如果你想玩到啲望落去好似好 pro 嘅效果，其實我會覺得，三星 Galaxy S23 Ultra 喺相機功能完勝 iPhone 14 Pro Max。點解我會咁講？等我同大家講下啦！

001: 200MP 超高像素

講到大像素，講真 iPhone 就真係輸蝕咗，玩咗咁多年 12MP 像素，今年終於肯換下 48MP，但市場上大部分品牌手機，甚至有啲平價手機，都玩到 108MP，咁 iPhone 14 Pro 系列嘅 48MP 感光元件，似乎唔算得係啲乜。而今代三星 Galaxy S23 Ultra，更加玩到 200MP 咁誇張。雖然像素高唔代表啲乜，唔代表影出嚟張相會靚，但起碼叫做可以捕捉到更加多 detail。

不過，去到咁大像素，我會覺得呢點都只係 Gimmick 嚟，唔係真係咁實用，畢竟你平時影相，有幾可需要用到咁大像素，而且影完普通一張 200MP 相片，要佔你成四五十 MB，若果下下要影到咁大像素嘅相片，真係多多 ROM 都唔夠你用。但毫無疑問，講到高像素嘅話，三星 Galaxy S23 Ultra 可以話係手機界目前嘅 No.1！

002: Astrophotography 銀河星空拍攝

記得之前 iPhone 14 Pro Max 未發表之前，坊間傳得好火熱，話 iPhone 14 Pro Max 會支持星空拍攝，可以影到星軌之類，但結果正式出到嚟，原來係無嘅。不過都有睇過有台灣 YouTuber 分享過，利用 iPhone 14 Pro 「手持」夜間模式 10 秒，可以影到銀河的效果，不過要有兩個元素，一個係現場星星真係要夠多，另一個元素係，你需要後製調高曝光率之類，先至可以做到好靚嘅銀河效果。

然而，今次 Galaxy S23 Ultra 上推出嘅 Astrophotography 做到嘅功能不止於此，影星星銀河相信已經係比較低層次，甚至連星軌都影到，先係值得一提！只要打開 S23 Ultra 相機，揀縮時模式，右上角嘅按鍵選擇 300，落腳架就可以影到星軌。之前 S22 Ultra Expert RAW 入面有個天文攝影模式，影星軌大約要半個鐘，估計 S23 Ultra 而家內置呢個模式，都係一樣需要時間達至長曝光嘅效果。

螢幕截圖 2023-02-01 下午11.50.52.png

▲ P.S. 以上相片是由 iPhone 14 Pro 拍攝，從 YouTube 影片內截圖及經過裁剪，第一張是原圖，第二張是經後製調校後達至的效果。

▲ 根據三星的介紹，Galaxy S23 Ultra 是可以拍出類似這種星軌的效果（注意，上圖並非由 S23 Ultra 拍攝，只是話畀大家知，可以影到類似咁嘅效果）。

003: Expert RAW

iPhone 14 Pro Max 可以拍攝到 12MP 以及 48MP 的 ProRAW 相片，然而今次 Galaxy S23 Ultra 更進一步，將 Expert RAW 像素提升到 50MP，變相捕捉到的細節會比 iPhone 14 Pro Max 更多，而且 Expert RAW 入面仲有好多特別玩法，例如今代新增咗多重曝光效果，呢樣比起 iPhone 14 Pro Max 普普通通影張相，好玩得多！唔知大家又點睇呢？