見到呢個價,版主瘋了!256GB 紅色 iPhone 四千幾入手,可遇不可求!
|
Apple
唔少網友日日都有睇版主文章,都知道我寫得最多嘅,就係手機減價、著數、優惠等等,而尋日我諗住上 csl. 淨機激賞價頁面,睇下有乜手機減價,突然俾我見到,iPhone 7 256GB 居然賣緊 $4888。但喺果個 Moment,我係相當懷疑,點解,原因就係當我撳去網上商店嘅時候,係見唔到有呢個 offer。因為懷疑,於是乎我就決定,直接去 csl. 門市問下,係咪真係呢個價,同埋係咪真係有貨。
而版主去到旺角西洋菜街的 csl. 分店問,居然俾我問到,真係仲有貨,而且最驚喜嘅係乜,最驚喜嘅就係居然剩返紅色,而唔係其他顏色。紅色呀!!!iPhone 7 紅色我真心搵咗好耐,周圍都話無貨,而我甚至去過先達問過,128GB 二手都要成四千幾蚊 (其他顏色平啲),而家 csl. 居然只係 $4888 就買得到,比起官網 128GB 還要便宜,雖然話就話 256GB 一早斷咗貨,但我覺得真係算抵。
點算好呢,版主我真心好想買 (呢篇文章講咗好多次...... 可見我果種激動),但版主 Keith 就覺得我都有咁多手機用,無謂浪廢錢去買舊代 iPhone 啦~ 不過,我自己又咁睇,呢部機就如同我嘅夢想一樣,堅持咗咁耐,周圍搵咗咁耐,而家終於搵到呢個機會,四千幾蚊仲要係 256GB,而且有保養喎,真的要放棄嗎?網友覺得我應唔應該豁出去,出手好呢?不過講明先,問過貨量唔多,旺角旗艦店就有幾部,而店員表示 check 唔到其他分店有無。所以某程度上,都係要靠運氣,手快有,手慢無。有興趣的話,搶還搶,記得留住一部俾我呀
5/9 23:05 更新:不知是幸運抑或不幸運,版主寫完文章再想返去旺角門市買,已經話無哂了。然後經了解,店員表示可能係俾人喺 The Club 果度 Hold 住咗部機,部機 Hold 住就唔賣得,版主唯有留下我的 contact,等佢最後有返貨先再決定買唔買啦