華為 Mate 9 下周強勢登場!6 吋四千電旗艦 劈價劈到二字頭

左定坤 (Cho Ting Kwan) | Huawei
提到六吋大芒旗艦手機,相信不少人第一時間就會想起,華為的 Mate 系列。版主入 ePrice 前最後用的一部手機,正正就是 Mate 7,不過當時未覺 Mate 7 的強大,畢竟 specs 來說並不算是特別強,真係要提佢最大的賣點,就是其 4100mAh 大電及其省電效能。入行後,曾經試用過 Mate 8,終於感受它的進步,相比 Mate 7,使用體驗更為順暢。華為 Mate 9 下周發表,聽聞將會非常強勁,新處理器效能更勝 S820,而且可能還有不少「黑科技」,的確令人期待。而隨着 Mate 9 發表愈來愈近,舊有旗艦開始減價,最多劈到二字頭。睇下文啦!

場料(Facebook).jpg

華為 Mate 9 下周強勢登場!超強 Kirin 960 處理器 + 快充「黑科技」
可以確定的是,華為 Mate 9 會在下星期四 (即 11 月 3 日) 發表,版主不時行場時,會同一些店舖職員吹下水,傾下手機,聽到大部份都幾看好這部 Mate 9,到底這部 Mate 9 有乜咁勁呢?大舖同細舖的觀點有少許不同,有細舖店員係覺得,黎緊 Mate 9 上用果粒 Kirin 960 處理器好屈機,由台積電代工,採用 16nm 制程,有 4 粒 Cortex-A73 以及 4 粒 Cortex-A53,性能相比上代提升 15%,GPU 效能亦增加了 180%;不過,大舖職員反而就覺得,其實佢講到有幾快都好,實際使用你已經唔會太感受得到,反而賣點應該是它的低壓快充技術,5 分鐘即可將 3000mAh 電池充至 50%。當然,Leica 鏡頭仍然是存在的,但網友認為,邊樣先係你最期待的賣點?

huawei-mate-9-pro.jpg

舊代 6 吋旗艦有四千大電,劈價劈到二字頭?
雖然 Mate 9 下星期就會發表,不過距離香港上市,相信還會有一段時間,加上華為旗艦大舖一出,一般減價不多,就算部手機真係有幾強大都好,一出即買未必是最好的入手時機。反而舊代旗艦,網友又會唔會考慮呢?回顧上年,舊代 Mate 8 標準版及高配版分別開價 $3980 以及 $4580,隔了都差不多就一年,大舖依然只減 $400,高配版依然未跌穿四千關口。細舖價錢就相對合理一點,標準版同高配版的最新賣價為 $3280 以及 $3880,比大舖平多三百左右。不過其實呢個價錢真係未算抵玩,標準版水貨價已經跌穿左三千好耐,大約賣緊 $2700,而高配版則大約 $3300。呢個價錢,已經玩到 6 吋大芒 + 四千大電,而且性能唔差,不少人用過都讚,而且國行更新比港行快好多,網友會考慮嗎?

14826394_334255600266586_2114083255_n.jpg
▲ 可以見到,大舖價錢一直都企到好硬,由 1 月開賣到而家,都仲係見到「即減 $400」。真係抵玩的,可以考慮細舖或者水貨,細舖價比大舖平多 $300 左右,而水貨價最平則減到 $2700 左右。不過提提大家,雖然國行版本更新比港行快好多,但買水貨始終會有風險,而且維修上會有點兒麻煩,這點要慎重考慮唷!

唔想用大陸機,呢個價錢仲有乜野 6 吋手機選擇?
唔想用大陸機,講到 6 吋大芒手機的選擇,真係不是太多,如果以差不多價錢的手機來說,Samsung Galaxy A9 (2016) 也許是其中一個可以考慮的手機。不過,講到規格配置,A9 (2016) 只屬中階機種,效能未必及得上華為 Mate 8,但叫做同樣有 6 吋芒以及四千大電,而且都係出自大廠,「理論上」應該會有一定的保證。A9 (2016) 現時的大舖賣價為 $3098,而細舖價則只便宜 $100,賣 $2980,Mate 8 同 A9 (2016),你又會如何選擇呢?

14877651_334255440266602_783785864_n.jpg
▲ Samsung Galaxy A9 (2016) 同樣有 6 吋芒 + 4000mAh 電池,不過規格屬中階機,效能未必及得上 Mate 8,網友又會點揀呢?

來源:壹讀 | TechNews

Huawei Mate 8 (標準版) 在文章發表時,大舖賣價為 $3580,按這裡有詳細規格及最新賣價
Huawei Mate 8 (加強版) 在文章發表時,大舖賣價為 $4180,按這裡有詳細規格及最新賣價
Samsung Galaxy A9 (2016) 在文章發表時,大舖賣價為 $3098,按這裡有詳細規格及最新賣價
廣告