版主收風 : 傳 3.10 行貨賣! 千幾蚊即入 Full HD 芒 + 4G 魅藍 note

Lawrence | Meizu
早兩日分享有 S801 行貨手機價錢跌至兩千蚊時就有朋友提到想入手 64bit 的手機,亦有網友提到其實用 MTK 6752 的手機使用感覺都唔錯。於是版主就諗其實有無乎合上述要求而價錢又吸引的手機呢?其實有,而且即將會推出!講緊嘅就係魅族魅藍 note ,而且版主仲打聽到呢部主打高性價比的手機好快就有行貨開賣,價錢亦已經定好左!有興趣的朋友就要睇下文啦!icon

//timgm.eprice.com.hk/hk/mobile/img/2015-03/05/201297/lawrencelaw_1_4567_85a7e18c9feb05241deadc240d0f7db1.JPG

魅族的魅藍 note (又叫 m1 note )自從上年推出以來已經受到唔少朋友的期待(亦被 ePrice 經常用來同其他機比拼規格性價比)。當移動版水貨引入左的香港後更一度炒到 $1650 ,比起原價貴差不多 25% !事實上呢部機真係講得上規格唔錯本身定價亦吸引,採用 5.5 吋 1920 x 1280 解像度FHD 屏幕,而魅藍 note 所用的 MTK 6572 1.7GHz 八核處理器配 2GB RAM 版主 Eddie 測試過,安兔兔跑分接近四萬,雖然同 Qualcomm 的 S801 比仍然係有一段距離,但以千元價位機來講實在相當不錯。另外相機方面就有 1300 萬像素主鏡頭和 500 萬像素前鏡頭配埋雙色溫補光燈,電量方面就有 3140mAh 。唯一要留意係魅藍 note 的內置容量有分 16GB 與 32GB 版本,但就唔支援插卡。

//timgm.eprice.com.hk/hk/mobile/img/2015-03/05/201297/lawrencelaw_3_4567_0e74d3f6e26d8babb6160e0282991d0a.JPG
▲  魅藍 note 外型大玩 iPhone 5C 風格,顏色有白/藍/綠/粉紅/黃 5 色可選,但版主收到風行貨魅藍 note 未必有齊咁多種色。

好,提完規格就到最緊要的行貨開賣日期同定價啦,版主去過不少大鋪問,就知道魅藍 note 最快下星期(可能係 3 月 10 號)就會推出,而賣價方面就會係 16GB 版本 $1399 而 32GB 就係 $1649 。講完日期同定價版主都要帶定個頭盔先,呢個消息版主係問左好幾間但只有一間的職員提到,所以大家可以當係一個參考,可能到時賣價同上述數字係會有出入的。icon作為參考,目前水貨魅藍 note 16GB 版大約賣緊 $1530 而 32GB 就係 $1780 呢個水平。如果我地假設魅藍 note 到時真係以 16GB 約係千四蚊而 32GB 係千七蚊呢個價錢開賣的話,唔知大家又覺得吸引力大唔大呢?為左方便大家比較,今次就拋磚引玉,列出部份同樣有 FHD 規格亦唔差的行貨大牌子手機做個比拼,大家不妨留言講下意見啦!icon

(Meizu 香港辦公室已確認:MEIZU m1 mote 於 10/3 正式上市首先推出白色和绿色,售價分别是16GB $1399 & 32GB 1649, 如客人有興趣可到魅族香港專賣店、Wilson衛訊 HKTcsl專門店購買)

//timgm.eprice.com.hk/hk/mobile/img/2015-03/05/201297/lawrencelaw_5_4567_d7cbf3516f221b6a407dc6b503524aa5.png
▲  老規矩,大家 click 入去就可睇到手機比拼啦。

在文章刊登時,魅族 魅藍 note 香港行貨仍未上市,按這裡有詳細規格及最新賣價。
在文章刊登時,LG G Pro 2 賣價為 $3,298 ,按這裡有詳細規格及最新賣價。
在文章刊登時,HTC One E8  賣價 $2,998 ,按此看詳細規格和最新賣價。
在文章刊登時,Asus Padfone S 賣價為 $2,050 ,按此看詳細規格和最新賣價。
在文章刊登時,Sony Z Ultra 賣價為 $2,998 ,按此看詳細規格和最新賣價。
廣告