魅族 MX6 開箱，箱內配件立即睇！
首先版主就會為呢部魅族 MX6，作個簡單而隆重的開箱儀式！可以見到，MX6 的包裝盒上方，已經鍍上 MX6 手機的輪廓，大概可以知道，MX6 會有腰形的 HOME 鍵，以及採用了對稱式設計。至於包裝盒的左右兩邊，會見到大大隻寫住 MX6 的字樣。至於包裝盒底部，則有一些 MX6 的基本資料，例如顏色、容量、網絡制式等等。打開包裝盒，會見到裡面係分左「三層」的，第一層唔洗講，當然就係 MX6；MX6 下面第二層，就係用黎篤 SIM 卡槽出黎果枝針；而第三層，就會見到一個細盒，入面裝住支持 mCharge 技術，充電功率達 24W 的專用插頭以及 USB 線﹐記住，係專用呀！所以千祈唔好唔見！
▲ 魅族 MX6 的包裝盒，上面有 MX6 的輪廓，而左右兩側，則有 MX 6 的字樣。
▲ 包裝盒的底部，則有 MX6 一些基本資料，例如係 32GB、型號係 M685H，以及網絡制式資訊等等。
▲ 盒入面分為「三層」，一層 MX6，一層係枝針，最後一層係另外有個細盒，盒入面會有插頭以及 USB Type-C 線。
▲ MX6 跟機的叉頭同 PRO 6 的一樣，都是支持 mCharge 技術，提供高達 24W 的充電功率。
▲ 有關部機的外型係點，版主在另一篇文已經俾大家睇過，所以本文就不會詳講了。
▲ 補充一些之前無講到的資料，魅族 MX6 得 32GB 一個版本，不少網友都已經覺得不夠用，而最慘的是，MX6 係無 microSD 卡槽，只有雙卡槽。
多個跑分軟件，測試 MX6 效能！
版主頭先就讓大家看過魅族 MX6 的安兔兔跑分，接近九萬的分數，而番到酒店，版主再用多個不同的跑分軟件，測試 MX6 的跑分，當中會再跑多次安兔兔，睇下兩次分數出入相差遠唔遠，另外仲會有 Basemark ES2.0 Taiji Free (用來測試玩 3D 遊戲時的效能) 以及 Vellamo。結果發現，從一部已經回復原廠設定的 MX6，開機可用的儲存空間大約為 25GB，而得出的安兔兔跑分更突破了九萬大關，成績比之前跑的更佳。另外，用來測試 3D 遊戲表現的 Basemark ES 2.0，版主發現 MX6 的表現同上代相比無乜進步，好似仲差左少少添，但都係屬於不錯的成績。
▲ 第二次用安兔兔跑分軟件進行測試，今次係 reset 之後再跑，發現分數可以有 91028 分，以 MTK 處理器來說，這個成績相當不錯呢!
▲ 至於用來測試 3D 遊戲效能的 Basemark ES 2.0 Taiji，得出 56.41 的分數，用佢來打機，表現應該會相當不錯。但係如果同上代相比，似乎分數仲要低了不少呢！
▲ Vellamo 軟件係測試三方面的分數，分別為瀏覽器、多核以及金屬，鑑於大部份網友都會用 Google Chrome，版主都係會測試 Chrome 瀏覽網頁的流暢度。Chrome 得出結果為 6534 分，代表用 Chrome 上網的速度會非常快；至於多核、金屬是用來測試手機的整體效能，大家可以見到，分數相當好。而 MX6 在三方面的成績，都是排在榜首，以二千幾蚊買部性能咁勁嘅手機，其實都幾值下！
配備 IMX386 處理器，真係勁過 P9? 版主極速晚間試拍
唔洗發佈會，就算係睇版主的文章，已經知道，十核心並不是今次魅族 MX6 的主打，反而相機方面會更值得留意。魅族表示，今次的 MX6，將會採用 IMX386 感光元件，呢個感光元件同時亦係 P9 所用嘅升級版，P9 影相已經咁勁，咁 MX6 係唔係會更加勁呢? 今次的試相，版主會直接 skip 住日拍的表現，一黎就影夜拍／低光源，原因就係，而家部部手機的相機，基本上日拍表現都做得不錯，而需要特別留意的，應該是夜拍。而魅族在發佈會上講到，MX6 影相好似會勁過 P9 咁，版主就直接用 P9 Plus 再加埋 HTC 10 同 MX6 比拼一下，三部機當中，在不加入任何效果的情況下，邊部機的夜拍表現最好。
【由左至右（手機版由上至下）：魅族 MX6、P9 Plus、HTC 10】
▲ 版主今晚的晚餐，所在的位置比較昏暗。而從上圖所見，MX6 影出黎的相，顏色方面會比較現嘅，亦即係話比較 sharp 啲。而當你放大去睇嘅時候，其實都會覺得，MX6 的成像清晰度比較高啲，不過顆粒亦相當較粗。
▲ 在燈光底下，從縮圖上來看，P9 Plus 的質素最靚，然而當放大來看時，特別留意「清酒」兩字，你會發現，無論是 P9 Plus 還是 HTC 10，影出黎都係好模糊，但 MX6 影出黎的成像，相對最清晰。
▲ 如果影發光的物體，從上圖來看，P9 Plus 同 HTC 10 控制得最好，而 MX6 則控制得無咁好。
▲ 但凡事唔係絕對的，睇下呢 set 相，留意下後面盞燈，你就會發現，MX6 同埋 P9 Plus 曝光無咁勁，當然仔細睇，P9 Plus 比 MX6 好少少，但 HTC 10 曝光得非常明顯。
▲ 呢張情況都係一樣，MX6 同 P9 Plus 的質素不相伯仲。
拍攝後感：成像質素比 P9 Plus 好，但缺少了玩味
總括而言，在相機方面，P9 Plus 用上 IMX286 感光元件，而 MX6 則用上佢嘅升級版－IMX386，結果如何呢? 某程度上，MX6 相比 P9 Plus，相機質素更佳，特別是細緻度方面，拍攝出來的成像會更清晰。而在光線控制方面，MX6 會比 P9 Plus 略為弱一點，但其實差別並不明顯。不過，MX6 都有不及 P9 Plus 的地方，就係唔夠 P9 Plus 好玩，P9 Plus 內置了很多好玩的 Filter，而且其菲林模式，讓相片影出黎好有 Leica 的味道，而 MX6 就無咁多野玩。不過 MX6 相機亦內置一個功能，是而家好多手機都沒有的，就是 GIF 相片拍攝。以上三部手機當中，如果係以相機元件黎計嘅話，其實應該係 HTC 10 最好，因為佢感光元件的尺寸最大，有 1.55μm，而 MX6 只得 1.25μm，再加上 HTC 10 有 F/1.8 大光圈，而 MX6 得 F/2.0 光圈，理論上應該 HTC 10 在低光源表現下佔有優勢。但如果在自動模式下，HTC 10 的成像又不一定會比 MX6 或者 P9 Plus 好，主要原因是 HTC 10 會自動將 ISO 推到很高，而 MX6 同 P9 Plus 在自動模式下，曝光控制相比 HTC 10 更好。不知網友是否認同呢?
▲ MX6 無 P9 Plus 咁多野玩，不過難得地內置了 GIF 動態相片。
▲ 魅族 MX6 GIF 動態相片測試，大約可以拍攝 6 秒的動態相片。
魅族 MX6 發佈會 + 評測相關文章
4GB RAM 金屬機身，相機是重點? 魅族 MX6 發佈會現場直擊
二千五唔駛! 有華為 P9 影相效能! Meizu MX6 勁平
真機拼 HTC 10！魅族 MX6 版主上手，外型、跑分速睇！
夜拍比拼 P9 Plus、HTC 10！魅族 MX6 開箱、效能、相機立即試！
魅族 MX6 在文章發表時，香港上市日期未定，按這裡有詳細規格及最新賣價。