小米 Max 會是 Samsung A9 Pro 對手嗎？
嚴格來講，小米 Max 同 Samsung Galaxy A9(2016) 又或者係大陸已經開賣，但完全沒有來港消息的 A9 Pro，都好難相比。因為係屏幕大小上，小米 Max 傳聞有 6.44 吋大芒，比起兩部 A9 的 6 吋芒都要大，但單靠大芒都好難贏得消費者的支持，版主就將小米 Max 傳聞中的賣點集合起來，而家同大家分享。變成「紅米 Note 放大版」，但機身會超輕薄？
之前版主都提過，小米 Max 係外型上出人意表地用左近似紅米 Note 3 的金屬機背而非小米 5 的玻璃背。但原來外型都係小米 Max 的賣點，因為小米 ceo 雷軍係事前已多番強調，小米 Max 係有巨芒的同時，都會相當輕薄。另外，新一輪的官方實機照亦都釋出了。至於有幾輕有幾薄，都係發佈會先知啦！
▲呢個就係小米 Max 官方宣傳圖，唔知點解感覺上屏幕邊框沒有之前工信部實機圖咁窄。
用上 Qualcomm 處理器，效能會比紅米 Note 3 更強嗎？
從之前資料已經可以睇到，小米 Max 係一部定位比起紅米 Note 3 高階，但又比不上小米 5 的巨芒機。由此推斷，小米 Max 都係會用返新一代的 Qualcomm 處理器，但就會係 6 字頭。好多大陸媒體都指出用上 Qualcomm S650 ，但版主個人就覺得，為左同紅米 Note 3 有所分別，小米 Max 用 S652 的機會其實更加大。再加上小米好耐之前，官方發佈左張有成 11 萬分的安兔兔跑分圖，呢個分數都不是 S650 的紅米 Note 3 做到呢！
▲ 小米官方之前披露了小米 Max 的跑分，當時就盛傳會用上自家製「步搶」處理器，但而家就幾乎可肯定是 Qualcomm 處理器了。
支援最大 128GB SD 卡！但用左「孤寒卡槽」
大家都明白，小米的手機是否支援 SD 卡，真係睇彩數。好似紅米 Note 3 的 MTK 版本不支援 SD 卡，去到 Qualcomm 版又支援，而小米 5 同上代小米 Note 等「小米系列」產品就一律不支援。不過來到小米 Max ，支援 SD 卡又成為賣點了。可惜，雷軍係宣佈小米 Max 支援最大 128GB SD 卡的同時，亦提到手機用上「三選二卡槽」，即係第二張 SIM 卡同 SD 卡只能二選一，呢樣野正係唔少網友討厭呢。
▲雷軍事前已經提到小米 Max 會支援最大128GB SD 卡，但就用左「三選二擴展卡槽」。
價錢不會是 2199？再有消息指小米 Max 最平千六蚊
之前大陸有媒體提到，小米 Max 價錢將會係 2199 人仔，計落要成 $2624 港幣，定價比起小米 5 仲要貴。雖然有埋圖作為佐證，但小米一向以高性價比做賣點，所以近日都有其他人提出，小米 Max 將會有兩個版本，分別係 2GB RAM 配 16GB ROM 賣 1299 人仔（$1548 港幣）的標準版同埋 3GB RAM 配 32GB ROM 賣 1499 人仔（$1786）的高配版。最終價錢又會係幾多？留意一陣發佈會，兩點半就開波啦！
▲到底係咪真係咁貴，一陣就有答案！
來源：mydrivers 、 cnBeta
更多有關小米 Max 的消息：
狙擊三星 A9 Pro！6.4 吋芒小米 Max 四大賣點發佈前搶先睇定價、實機照曝光！6.4 吋芒小米 Max 外型降級，仲要貴過米 5？
五千大電 Asus Zenfone Max 有行貨！小米 Max 香港會賣
4GB RAM + 128GB ROM! 6.44 吋巨電小米 Max 好抵玩?
外型拼小米 5! 小米 Max 屏幕、跑分一手試!
小米 Max 在文章發表時，香港上市日期未定，按這裡有詳細規格及最新賣價。