Nothing Phone (2) 的開箱同外觀部分，之前已經分享過，所以呢度就唔會再分享，而係會同大家集中性能同埋相機部分，去做一個簡單評測。
Nothing Phone (2) 性能
今代嘅 Nothing Phone (2) 用上 Qualcomm Snapdragon 8+ Gen 1 處理器，內置 12GB RAM，香港會有 256GB 以及 512GB 兩個版本，電池容量則為 4700mAh，並支持 45W 快速充電，充電 20 分鐘可以充電至 50%，並且加入了 15W Qi 無線充電以及 5W 反向充電。至於用上 Qualcomm Snapdragon 8+ Gen 1 處理器嘅 Nothing Phone (2)，具體性能表現如何呢？我哋就會用安兔兔評測，將 CPU、GPU 性能具體化，同時亦會用 AndroBench 5 應用程式，去測試一下 ROM 的讀寫速度，看看所用嘅 ROM 係屬於乜嘢嘅 Level。
▲ 配備 Qualcomm Snapdragon 8+ Gen 1、12GB RAM 以及 512GB ROM 嘅 Nothing Phone (2)，安兔兔總分為 1127830 分，符合 Snapdragon 8+ Gen 1 應有嘅水準，當中嘅 CPU 成績有 282326 分，而 GPU 成績則有 432890 分。
▲ 至於用來測試 ROM 讀寫速度嘅 AndroBench 5，我哋會比較注意嘅，係連續讀取以及連續寫入速度，兩者分別為 1917.68 MB/s 以及 522.33 MB/s，呢個速度代表 Nothing Phone (2) 所用嘅 ROM，係用上 UFS 3.1 嘅標準。
Nothing Phone (2) 相機
在相機方面，Nothing Phone (2) 具有雙鏡頭的設計，兩個鏡頭都是 5000 萬像素，其中廣角鏡頭用上 Sony IMX890 感光元件，光圈值為 F1.8，並且具有雙重影像穩定技術，並支持夜間模式、場景偵測等 AI 功能。另外，你亦可以將 Glyph Interface 調至最高度，隨時將佢變成便攜式環形閃光燈，以柔和光線去照亮主體。以下，我會同大家分享一下，用 Nothing Phone (2) 影出嚟嘅成像，畀大家睇下呢部手機影出嚟嘅質素係咪令人滿意：
 |
 |
 |
 |
 |
 |
 |
 |
我記得上年試玩部 Nothing Phone (1) 嘅時候，我覺得呢部手機最主要賣點都只係好睇，但當時影相我會覺得麻麻哋，但今年 Nothing Phone (2)，我完全唔覺得有呢種感覺，覺得喺相機方面都相當合格，色準、細緻度等方面，都好滿意，唔可以話好 Top，但一般用家望落去，至少唔會覺得差。不過今代價錢又比之前貴咗好多，無返咁上下質素升級，就未免太過唔去。
小結
之前同大家分享過 Nothing Phone (2) 嘅開箱，睇過佢真實外觀，設計同上代唔差太遠，但主要係一啲 Glyph 界面上功能嘅改進，更有助減少用家使用屏幕嘅時間。而硬件上今次改用 Qualcomm Snapdragon 8+ Gen 1 處理器，由上代嘅中階手機，突然一跳升級為一部旗艦手機，呢個係其中一樣令到價錢上升嘅因素，但價錢上升咗，我覺得整體表現係有返咁上下，相機又同一般旗艦手機質素唔太大差別，最重要係整體使用體驗相當順暢，唔會有窒機、變慢嘅問題。我個人係幾鍾意呢部 Nothing Phone (2)，唔知網友又點睇呢？Nothing Phone (2) 在文章發表時，建議零售價 $5499 起，按這裡有詳細規格及最新賣價。
