新鮮熱辣開箱
講筆電，肯定先講規格：Teclast F5 採用 Intel 第八代 Gemini Lake 四核心的 Celeron N4100 處理器，8GB LPDDR4 記憶體 + 128GB SSD，內顯 UHD 600 足夠一般文書、睇片、玩小遊戲之用。 F5 還配備 11.6 吋觸控屏幕、Type C 充電、802.11ac 雙頻制式 WiFi，整個 Package 絕對靚仔，滿足一般用途需求。
▲ 近年大陸機都盡量精簡外盒，風格漸趨平實，連型號都見唔到，唔講唔知係 Tbook F5。
▲ 正面背面都差不多，但要留意係 F5 電量只有 3850mAh，後面我會詳細講解電量的情況。
▲成日見到有人話大陸機「過河買水」好過，但其實行貨除了有人幫你送翻廠保養維修之外，仲免除自己倒正體中文 Windows 系統 + 驅動程式，同埋配翻個英式腳比你。
▲ 開箱！ F5 最痴線係咁多個金屬面都貼好嗮保護膠，本 YK 要幫佢逐一脫衣～
▲ 跟機有 Micro USB 的 轉插頭。
▲ 歐規的雙腳 Type C 火牛都有跟比你。
▲ 留意係 12V / 2A 輸出，唔係個個尿袋都可以充得起！
▲ 港行就當然會跟足法律要求送埋個英規火牛，同樣 12V / 2A。
▲ 仲有張保修卡，記得 Keep 起佢，但希望唔需要上去。
規格入門、勝在造工
最令本 YK 驚訝係 Teclast F5 設計精細、甚至比大廠型號更好的造工。摸上手個金屬冰冷真係舒服，而且磨砂質感確實比部分劣質膠好太多喇～ 質感好的東西，你會想揸完又摸、摸完再揸，F5 就比到呢個感覺我。
▲ 乾淨的磨砂金屬外殼，只有左上角的 Telcast 字樣。
▲ 背面有四角防滑膠之外，還有左下角的 M.2 2242 SSD 擴充槽。
▲ 原裝行貨個貼紙唔知係咪可以拆走佢呢？ 值得一讚係防滑膠真係超級防滑，點推都推唔郁。。。
▲ 機身側面 I/O 接口：micro-sd 卡、收音孔、micro USB 接口、micro HDMI 接口、Type C 充電 + 數據口。
▲ 另一側竟然又有收音孔、保留 3.5mm 耳機孔，還有電源鍵和音量鍵，呢個係缺點黎，因為放在背囊很容易誤碰開機。
▲ 登場！ 芒上面有一層高清保護貼，本 YK 建議自己剪翻個磨砂貼，有助防反光 + 順滑觸控。
▲ 觸控屏幕係全貼合技術，11.6 吋 1920 x 1080 全高清，市面上確實無幾多部又防反光磨砂面、又可以觸控的選擇，連 Macbook 全系列都係反光機，所以都無得投訴。
▲ 觸控板順滑，可以再整大少少，因為本 YK 手掌太大。
▲ 按鍵空間比較狹窄，畢竟係 11.6 吋筆記本電腦，無咁多位擺放鍵盤。
▲ 估唔到 F5 保留 Cap Lock 燈，右邊有個 100 像素前鏡頭；轉軸鉸鏈係 360 度全角度，姐係可以翻轉。
▲ 呢種電視模式最適合戶外睇愛情片 / 動作片，尤其食住放題、睇埋套「愛回家」先肯回家的朋友。
▲ 要挑剔的地方係，鍵盤沒有獨立 HOME、END、PAGE UP、PAGE DOWN。 但保留左 Fn 模式的九宮格數字鍵，入 Excel 時絕對係「有好過無」。
▲ 左右兩側、上面的邊框都比較窄身，唯獨屏幕下方稍厚，估計是排線擺放的技術限制。 咩話？ 你想佢再窄身少少好似某某 XPS 咁？ 比多幾倍價錢囉～
▲ 機身細小的 F5 其實很有利攜帶，官方聲稱重量約 1KG，我量度過確實係只有 1.033 KG，對於入門機來講已經很不錯。
SSD 讀寫、跑分一覽
「要馬兒隊草」的朋友最關係都係性能係咪夠自己玩。 玩 PUGB 就肯定唔 WORK，最多夠你睇人玩 PUGB。下面有果粉最愛的 GeekBench 跑分結果。
▲ 單核心 1776，多核心 5431，唔夠高分？ 三千蚊你應該要買部國產 S845，留係屋企慢慢跑分。 但唔係打機的輕量文書用途已足夠有餘~
▲ SSD 讀寫速度自己睇，傳統 HDD 一般在 50MB/s 左右，根據本 YK 的經驗：SSD 連續讀取速度過 400MB/s 、連續寫入速度超過 100MB/s 都滿足到一般中小學生做功課。
體驗分享：平價移動機
Teclast F5 我前後用了快一個月才落筆寫文章，感覺是優點多於缺點，而所謂的缺點都有 Plan B 補救，最明顯的缺點莫過於電量，官方聲稱 5 小時播放影片、9 小時上網續航力，本人實測做寫文、用 Chrome 上網，大約 4 小時就差不多就充電。機身小又輕薄，續航力自然大打折扣， F5 支持 Type C 電源充電，但如果你用尿袋如 12V / 1.5A 充電，充電速度會減慢，甚至「充唔到」。
▲ 部機真係好細，放大腿都要緊緊夾住，慎防在兩腿之間滑落。
▲ 鍵盤反饋感一般，但鍵程遠比 Macbook 全系列好，但手指大之人如本 YK，需要三、四天時間適應細機鍵盤的佈局。
結論：定位清晰、平價致勝
在這部 Teclast F5 出現之前，市場上找不到一部符合本 YK 要求的隨身筆電：要價錢平、機身輕薄、11 - 12 吋屏幕、可以 Type C 充電。 曾經有想過某某大品牌的 Windows 平板，但奈何 Ram 少、SSD 少，鍵盤又難打，所以最後放棄了。所以，定價 2980 元的 Teclast 成為了當然之選。
平價移動辦公的方案最怕重，過大海幾日背著 F5 四處走都不會覺得重，隨時隨地開部機就可以做到野。題外話，我試過嘗試幫部 F5 安裝 ChromeOS，但觸控板反應遲滯、觸控屏幕失靈都成為絆腳石，如果有網友知道點搞請告訴我。
嗚謝：鵬勃電子科技提供實機測試