台電 P70 詳細規格:
CPU:MTK MT8392 1.4GHz 八核屏幕尺寸:7 吋 1280×800 IPS 屏幕
RAM:1GB RAM
容量:8 GB ROM(可擴展,最大支持 64GB)
鏡頭:200 萬後置+30 萬前置
尺寸:187 ×113 ×8.9mm
重量:266g
電池容量:3200mAh
系統版本: Android 4.4
價格:699 元
台電 P70 開箱! $700 可以入手行貨+ 3G 通話八核平板
今之版主試玩的台電 P70 是香港行貨版本,所以本身已有 Google Play Store ,有壞亦都可以拎去整。再講下呢部主打平價的平板規格,除左有 7 吋 1280 x 800 解像度屏幕之外,處理器就用上 MTK 的 MT8392 1.7GHz 處理器,但只得 1GB RAM 同埋 8GB 內置容量(但可外置 64GB 插卡)。相機方面都唔算出色,只得 200 萬像素主鏡頭同埋 30 萬像素前鏡頭,電池容量就有 3200mAh 。坦白講,以 $700 行貨價錢來講,版主覺得性價比真係算不錯,亦都好難再要求更多了。當然,講缺點呢類平格平板都係有的,首先就係 8GB 內置容量呢個平價平板基本配置對唔少朋友來講相信都未必夠用,可以裝的 apps 都不會太多。鏡頭不足可以話係常識不過相信有興趣入手平價平板的朋友都不會好介意,反而版主試用時就稍嫌台電「太貼心」了,內置以及預設左唔少大陸常用不過香港無乜人用的應用程式,呢點稍後會再提。
▲ 同一般平價平板一樣,盒內只有平板本體、保養卡同 USB 線。
▲ 行貨台電 P70 保養一樣交俾唯一一間深水埗地鐵上蓋代理。
▲ 由於版主係個手細之人,要單手拎 7 吋平板都是好困難的,不過 P70 同一般 7 吋平板體積分別不大。
▲ 機背不算特別,最搶眼就係大大個台電 Logo 。
▲ 插 SIM 卡同 Micro SD 卡短位置都係機頂,同時 USB 以及耳機孔都係機頂。
▲ 首先要留意P70 都係要用 Micro SIM 卡,版主試用時輕易上到 3G 。
▲ 來 1280 x 800 7 解像度來講 P70 的 7 吋屏幕算係可接受範圍內。
▲ 低角度之下睇, P70 的屏幕表現仍然算係不錯,顏色亮度都無大變化。
八核跑分過三萬, Basemark 表現有驚喜!
睇到呢到如果好記性的朋友應該會記得一月尾的時候版主 Eddie 都介紹過一部規格同賣價都相近的水貨平板 Colorfly G708 。的確, Colorfly G708 同台電 P70 規格相近但其實 P70 的硬件效能係更強的。主要原因在於 P70 所用的 MT8392 比 G708 的 MT6592 高一級。呢點係安兔兔跑分上可以睇到, P70 分數係 32890 ,比起 Qualcomm S600 機種好似 HTC One M7 好但就略遜於 Qualcomm S800 水平。不過令版主驚訝係 P70 係 Basemark 2.0 上的表現,居然得到 64.53fps 呢個高分數,不禁令版主懷疑呢部平板係咪出貓。。。再黎講下初步使用感覺,同上次介紹過的台電 X98 Air 3G 一樣,今次 P70 一樣係用左台電仿 iOS 風格的自家介面。除左無 Apps Drawer 之外大家可以見到本身已輕預載左百度衛士同埋淘寶呢類大陸熱門 apps ,但偏偏港人常用的 Google 服務就唔見左,而軟件方面台電 P70 預載 Android 4.4 版本。
▲ 安兔兔分數係 32890 分,成績比起 S600 機種好但不及 S800 ,以 700 蚊貨仔來講算係不錯啦!
▲ Basemark 2.0 分數真係令人驚訝!居然有 64.53 ,理論上打機真係無難度。
▲ 用左P70 台電自家沒有 App Drawer 的介面,比較煩係「貼心地」預載左不少大陸 apps 。
▲ 系統方面係 Android 4.4.2 。要留意,本身 P70 係只有百度搜尋而沒有 Google Now 的,要下載 Google 服務先可以用到。
版主小結: $700 行貨 7 吋 3G HD 芒平版台電 P70 ,效能再提升!性價比夠唔夠吸引?
如果同版主 Eddie 分享過的 Colorfly G708 相比,今次台電的 P70 無疑係更吸引的!除左係行貨之外效能亦都有所提升,以 $700 呢個價位來講實在好難對台電 P70 有更多要求。如果想選擇廉價 7 吋平板的話呢部的確係一個不錯的選擇。唔知大家有點睇呢?不妨留言分享下啦!▲ 如果要想大啲嘅屏幕又要用到 3G 通話,可能 Colorfly 的 G808 都係一個可以考慮的選擇,除左有 8 吋 IPS 1280 x 800 像素屏幕之外,亦有 MTK8382 四核 1.3GHz 處理器同埋 1GB RAM 以及 8GB 內置容量(支援32GB 插卡),同台電 P70 一樣係 200 萬像素主鏡頭同埋 30 萬像素前鏡頭。比台電 P70 更好係有 4000mAh 內置容量。不過 G808 推出左都有一段時間,目前賣價要 $999 ,抵唔抵就留返大家自己衡量啦。
查詢: K Digital 27299881