主題:新 iPad Pro 將至! 大舖清舊貨,12.9 吋版本瘋狂勁減!

ePrice HK
  • 發表時間:2016-03-22 15:54 收錄檢舉
    上年 9 月的時候,Apple 就發表左一部 12.9 吋巨芒的 iPad Pro,並於 11 月正式推出香港市場。雖然版主我成日話,香港人普遍中意大芒機,但係只局限於智能手機,當 12.9 吋 的 iPad Pro 推出之後,非但無法吸引到網友,反而大受批評,一來機身實在大得誇張,不便攜帶,二來擁有咁大個芒,但用 iOS 系統,即使有 keyboard 的配件,但依舊無法取代手提電腦。而昨日 Apple 在春季新品發佈會上,除左有 4 吋的 iPhone SE,仲發表左一部全新 9.7 吋的 iPad Pro。咁有新機出場,舊機就自然開始跌價,12.9 吋 iPad Pro 在大舖瘋狂勁減,減左幾多呢? 一齊睇睇!

    新 iPad Pro 將至! 大舖清舊貨,12.9 吋版本瘋狂勁減!

    豐澤 128GB Wi-Fi + Cellular 版本即減六百
    隨着新 iPad Pro 的登場,大舖開始為 12.9 吋的 iPad Pro 進行減價優惠,無它嘅,本身 iPad Pro 都不太受歡迎,而家再推出埋相對合網友心水的新 iPad Pro,大舖仲唔快快手想清左啲舊貨佢? 版主剛才就去左豐澤、衛訊、百老匯等大舖問價,咁首先就講左豐澤先。其實呢,豐澤就好直接咁擺個牌係度,話俾人知 iPad Pro 有優惠,不過你知啦,iPad Pro 係有三個版本,分別為 32GB (Wi-Fi)、128GB (Wi-Fi) 以及 128GB (Wi-Fi + Cellular),但並唔係個個版本都有減價,留意一點的是,豐澤 iPad Pro 即減 $600 的優惠,只適用於 Wi-Fi + Cellular 版本,亦即係 128GB 果款,而且仲要係金色或者銀色先有得減,黑色無得減,原價 $8288,減完即係 $7688,一次過付款又得,分期付款都得。

    新 iPad Pro 將至! 大舖清舊貨,12.9 吋版本瘋狂勁減!
    ▲ 無論你係一 tick 過付款抑或分期都好,只要你係購買金色或者銀色版本的 iPad Pro 128GB (Wi-Fi + Cellular),就即享「減 $600」的優惠。

    衛訊全數付款,個個版本都有減,最多減六舊
    至於衛訊方面又點呢? 衛訊就唔似得豐澤咁,直接豎個牌話俾人知有減價,要直接問職員,佢先會話你知。咁而家版主就幫你問埋,唔洗自己問咁麻煩,得出結果係,如果你係要分期付款的話,咁就對唔住了,無得減。不過咁,如果你一次過俾哂全數,無論你係用現金抑或 EPS,咁就有減價優惠。選購不同的 iPad Pro 版本,可享的折扣都有不同,32GB (Wi-Fi) 版本減 $300,減完即係 $5788,而 128GB (Wi-Fi) 版本就減 $400,即係 $6888。至於最貴果部 128GB (Wi-Fi + Cellular) 版本,只要你係一次過付全數的話,就可以享有同豐澤一樣的「減 $600」優惠,減完之後賣緊 $7688。

    新 iPad Pro 將至! 大舖清舊貨,12.9 吋版本瘋狂勁減!
    ▲ 衛訊方面,真正價錢係要自己去問的,如果全數付款的話,就可以享有減 $300、減 $400 或者減 $600 的優惠 (視乎選購版本而定)。

    蘇寧、百記企硬! 12.9 吋 iPad Pro 堅持不減價
    雖然全新的 9.7 吋 iPad Pro 將至,不過並不是間間大舖都會進行清舊貨減價優惠。就好似蘇寧、百老匯咁,堅持以官方建議零售價發售,不過百老匯就會額外送多個保護殻 (價值 $178) 以及保護貼一張,真係多謝哂。

    新 iPad Pro 將至! 大舖清舊貨,12.9 吋版本瘋狂勁減!

    新 iPad Pro 將至! 大舖清舊貨,12.9 吋版本瘋狂勁減!
    ▲ 無論係百記定係蘇寧,暫時都未有減價的優惠。

    在文章刊登時,iPad Pro 12.9 吋 Wi-Fi (32GB) 的賣價為 $5788,按這裡有詳細規格及最新賣價
    在文章刊登時,iPad Pro 12.9 吋 Wi-Fi (128GB) 的賣價為 $6888,按這裡有詳細規格及最新賣價
    在文章刊登時,iPad Pro 12.9 吋 Wi-Fi + 4G (128GB) 的賣價為 $7688,按這裡有詳細規格及最新賣價

    立即加入Facebook 專頁,新聞/消息/優惠,最快知。

    01樓 ▲TOP 回列表頁