評測：三星 Galaxy S7 / S7 Edge 效能較勁! Exynos 8890 拼 S820

Samsung 正式係香港發佈左 Galaxy S7 同埋 S7 edge 之後，亦確認了 Galaxy S7 將會用上 Exynos 8890 八核處理器而 S7 edge 就用左 Qualcomm S820 四核處理器。有不同的選擇固然係好事，但大家應該會問，兩部機用上兩個不同 CPU 邊個表現會比較好？睇完版主實機試你就知啦！



先簡單介紹下兩個處理器。上年 Samsung 憑住 14nm 製程的 Exynos 7420 成功將受過熱問題困擾的 Qualcomm S810 技術性擊到。來到今年 Samsung 就食住個勢推 Exynos 8890 ，同樣係用左 14nm 製程，但號稱與 7420 相比，效能增進 30%、但更省電 10%。而八核就係用左 big.LITTLE 設計，由四個 Samsung 製作的核心再加上四個 Cortex-A53 核心所組成，GPU 就用左 ARM 的 Mali-T880 。

Qualcomm 方面都可以話係技術趨向成熟的一年，其 S820 處理器由 S810 時的八核減至四核，但製程就進上 Samsung ，一樣係 14nm，官方提到呢個改變令 S820 的功耗比 S810 減少 30％ ！圖像表現亦都係 S820 的強項，因為採用全新 Kyro 核心同時用上  Hexagon 680 DSP 與 Adreno 530 GPU ，顯示效能提升左 40％ ，呢個優勢能否係今次 Galaxy S7 以及 S7 edge 的比拼中展現到出來呢？而家開始比拼！

勢均力敵？四大跑分成績比拼出爐

係之前 LG G5 同 Galaxy S7 edge 同日發佈時，版主就同大家分享過兩者的安兔兔跑分成績。當中就以用上 S820 的 LG G5 險勝 exynos 8890 的 S7 edge 作結。今次版主就用 S820 版本的 S7 edge 以及 Exynos 8890 版本的 S7 再作多次比拼。經過安兔兔、 Vellamo 、 Basemark 2.0 以及 Geekbench 3 四個軟件測試後，可以見到，其實 Qualcomm S820 的 S7 edge 整體其實雖然佔優，但其實沒有壓倒性的優勢，好似 Vellamo 上 Html 5 的測試以及 Geekbench 3 的多核分數， S7 edge 都不及對手。不過， Qualcomm S820 始終係圖像處理上目前來講係「屈機」的。

或多或少因為呢個原因， Samsung 係香港都改推 S820 版本的 S7 edge 。但調返轉頭諗，上年 Samsung 之所以係 Android 旗艦上威到盡，多多少少都因為自家處理器效能出色，今年輪到 S820 發力，而且打後會推出的 LG G5 、 Sony Xperia Performance 、小米 5 甚至係未發佈的 HTC One M10 ，都係用 S820 。大家又會唔會等埋 G5 開賣先再諗兩部 Samsung 手機呢？
 

安兔兔成績

▲呢個就係 Galaxy S7 的成績。留意，係 UX 性能以及 CPU 性能方面的分數！


▲ 呢個就係 S7 edge 版主第一次跑分得出的結果，竟然比起 Exynos 8890 的 S7 還要差！（不過留意下，係 3D 性能方面， S7 edge 仍然大勝對手）


▲ 見到 S7 edge 仲差過 S7 ，版主都唔多相信，再跑多次，有 134862 ，比起之前 LG G5 成績更出色， 3D 效能已經拋離 S7 兩萬分了⋯⋯
 

Vellamo 成績

▲ 來到 Vellamo 方面， Galaxy S7 反而搶到不少甜頭，好似 HTML 5 接近七千分就係一個相當亮眼的成績。


▲  S7 edge  不論係 HTML 5 還是多核心都輸比 S7 ，但係單核方面就小勝對手。

Basemark 2.0 成績

▲ Galaxy S7 係 Basemark 2.0 上有 59.43fps ，乎合旗艦的水準。


▲不過 Galaxy S7 edge 還是以 60.26fps 跑出。
 

Geekbench 3 成績

▲ Geekbench 3 顯示的結果跟 Vellamo 相乎，左邊的 Galaxy S7 係單核方面比起 S7 edge 差少少，但係多核方面表現就相當不錯。
 

總結：兩者效能相距不大，要打機當然揀 S7 edge 比較好

經過以上幾個跑分測試，可以見到，其實係一般使用上，兩者使用體驗唔會差好遠，呢個亦都乎合版主以超短時間上手體驗後，得出的感覺。不過， Qualcomm S820 係圖像效能表現上，有相當明顯的優勢，所以對將手機當遊戲機的朋友來講，選擇 S7 edge 看來是比較合適的，而且 S7 edge 電量有成 3600mAh ，係無得換電的情況下，當然係揀大電手機比較著數啦！（最後，好可惜今次版主未能作一個更深入的試玩分享，好多部份好似電量同夜拍都試唔到了，但係系統大唔大食，多唔多 bloatware ，版主有留意哦！以下是結果！）


▲其實，個人覺得 Galaxy S7 並唔算大食，系統佔 7GB 同上代 Galaxy S6 差不多一樣。


▲手機原本只有一版 apps ，當中 Microsoft apps 內的幾個 app 都係唔可以刪除的（ Samsung 自家 apps 更加不可能吧！）


▲不過，嚴格而言幾個 Microsoft app 都只能叫做 Shortcut ，所佔容量不大。

在文章發佈時， Samsung Galaxy S7 Edge 將於 3 月 11 日開賣，賣價為 $5398 ，按此看手機規格及最新賣價。
在文章發佈時， Samsung Galaxy S7 將於 3 月 11 日開賣，賣價為 $4698 ，按此看手機規格及最新賣價。​