千四有找 真三卡防水機
唔使解釋咁多，相信網友一睇小標題，已經大致估到版主說的係邊一部，佢就係 Moto G Turbo。老老實實，今時今日想搵一部真三卡手機，堅係唔係咁容易。所謂真三卡，即係能夠同時插入兩張 SIM 卡以及一張 microSD 卡，有時候真係唔明某些廠商點諗，又唔係唔知網友的需要，又唔係做唔到，但偏偏硬係要採用「三選二卡槽設計」，一啲都唔方便網友。而 Moto G Turbo，雖然規格係比較入門 (呢個價位，你想有幾勁？你估係 X 米玩高性價比咩
），不過佢最主要的賣點，係真三卡、IP67 防塵防水，而且仲要行 Google 原生 Android 6.0 系統。衛訊 11 月做緊 Citibank 簽賬回贈優惠，將 Moto G Turbo 減價至 $1399，劈到同細舖差不多價錢了。當然，就算你無 Citibank，價錢都係一樣，只係爭在無左積分回贈。呢個價，網友會唔會考慮呢？
▲ 衛訊而家做緊 Citibank 優惠，其實似係清舊貨，Moto G Turbo 而家賣緊 $1399，算係一部抵玩真三卡 Android 6.0 防水機。
唔使 $1800 玩雙鏡頭
除了 Moto G Turbo 之外，其實大舖最近都將 LG X Cam 的價格稍微下調。原本 X Cam 的建議零售價為 $2398，大舖有「即減 $400」優惠，賣 $1998，而家建議零售價跌了 $200，大舖再「即減 $300」，最新賣價為 $1898，而深水埗細舖，最新賣價則大約 $1780 左右。同樣地，X Cam 的賣點並不是規格，版主會覺得，佢係一部「玩樂手機」。玩的是它的鏡頭，具有 V10 / V20 的雙鏡頭，能夠拍攝兩種視角的相片，加上一系列玩味十足的照片特效，包括 Pop-out Picture、動態相片模式等等，話佢係一部「玩樂手機」，亦未必有錯。$1800 唔使呢個價，網友又有沒有興趣呢？
▲ 最平 $1800 唔使玩雙鏡頭，網友會入部做「玩樂手機」嗎？
平過細舖！最平價 NFC 手機，有得玩 Android Pay！
講到最平價而又有 NFC 的手機，唔駛問阿貴，一定係 HTC Desire 530。早前版主 Keith 用過 Desire 530 實測 Android Pay 付款，用 Desire 530 俾錢完全無問題，大家可以放心使用。踏入 11 月，豐澤亦同恆生合作，推出 Desire 530 的減價優惠，賣價為 $998，相比深水埗細舖的 $1038 還要便宜。不過，同衛訊不同的是，豐澤的優惠一定要有恆生信用卡先可以享用，無的話就要原價賣，即係 $1498。有恆生信用卡的網友，會考慮入手 Desire 530 做後備機 / Android Pay 專用機嗎？
▲ 雖然不及之前 SmarTone 個優惠便宜，不過豐澤個優勢就係: 仲有貨。但係要恆生信用卡獨享，有恆生信用卡的網友，有興趣嗎？
Moto G Turbo 在文章發表時，大舖最平賣價為 $1399，按這裡有詳細規格及最新賣價。
LG X Cam 在文章發表時，大舖最平賣價為 $1898，按這裡有詳細規格及最新賣價。
HTC Desire 530 在文章發表時，大舖最平賣價為 $998，按這裡有詳細規格及最新賣價。
